Skip to main content
x
የሁለት ሥራ ተቋራጭ ኩባንያዎች ኃላፊዎች ክስ ተቋረጠ

የሁለት ሥራ ተቋራጭ ኩባንያዎች ኃላፊዎች ክስ ተቋረጠ

  • የአቶ ዛይድ ወልደ ገብርኤልን ክስ ለማሻሻል ቀጠሮ ተሰጠ

በቀድሞ የኢትዮጵያ መንገዶች ባለሥልጣን ዋና ዳይሬክተር የመዝገብ ቁጥር 204154 ከባድ የሙስና ወንጀል ክስ ተመሥርቶባቸው የነበሩት የሳትኮንና የሀዚአይአይ ኮንስትራክሽን ድርጅቶች ኃላፊዎችን ክስ ማቋረጡን፣ ጠቅላይ ዓቃቤ ሕግ ለፌዴራል ከፍተኛ ፍርድ ቤት ልደታ ምድብ ተረኛ ችሎት ዓርብ መስከረም 26 ቀን 2010 ዓ.ም. አስታወቀ፡፡

የሳትኮን ኮንስትራክሽን ኃላፊነቱ የተወሰነ የግል ማኅበር ድርጅት ዋና ሥራ አስኪያጅ አቶ ሳሙኤል ተክላይና የፋይናንስ መምርያ ሥራ አስኪያጁ አቶ ፍሰሐ ታደሰ፣ በሌሉበት ዋስትና የሚከለክል ክስ የተመሠረተባቸው ቢሆንም፣ ክሱ እንዲቋረጥ መደረጉ ታውቋል፡፡

ጠቅላይ ዓቃቤ ሕግ ለምን ክሱን እንዳቋረጠ በዝርዝር ባያሳውቅም በአዋጅ ቁጥር 943/2008 አንቀጽ 6(3ሠ) እና የወንጀለኛ መቅጫ ሥነ ሥርዓት ሕግ ቁጥር 122 መሠረት ክሱን ማንሳቱን ተናግሯል፡፡ አቶ ሳሙኤል ከኢትዮጵያ መንገዶች ባለሥልጣን 23,456,481 ብር የሚያወጣ አስፋልት በውሰት ወስደው ባለመመለሳቸው በፍትሐ ብሔር ክስ ተመሥርቶባቸው 17,592,361 ብር የመለሱ ቢሆንም፣ ቀሪ 6,812,046 ብር ባለመመለሳቸው ክስ ተመሠርቶባቸው ነበር፡፡ አቶ ፍሰሐም ሐሰተኛና አሳሳች ሰነዶችን በመጻፍ አብረው ተከሰው ነበር፡፡ ዓቃቤ ሕግ ግን ምንም ሳይል ክሱን ለማቋረጥ ያቀረበውን ጥያቄ ፍርድ ቤቱ ተቀብሎታል፡፡

የሀዚአይአይ ጠቅላላ ኮንስትራክሽንና የንግድ ድርጅት ዋና ሥራ አስኪያጅና ባለቤት አቶ ዛኪር አህመድም አስፋልት ተበድረው አልከፍል በማለታቸው ክስ ተመሥርቶባቸው 3,135,200 ብር ክፍያ የፈጸሙ ቢሆንም፣ መንግሥት ሕግ ለማስከበር የሰው ኃይልና ገንዘብ እንዲያባክን አድርገዋል በማለት ክስ መሥርቶባቸው ዋስትና ተከልክለው ማረሚያ ቤት ነበሩ፡፡ ዓቃቤ ሕግ በተመሳሳይ ሁኔታ ክሱን ለማቋረጥ ለፍርድ ቤቱ ያቀረበው ጥያቄ ተቀባይነት በማግኘቱ፣ ከእስር እንዲፈቱ ለማረሚያ ቤቱ ትዕዛዝ ተላልፏል፡፡

ከሳትኮንና ከሀዚአይአይ ኩባንያዎች ኃላፊዎች ጋር ክስ የተመሠረተባቸው አቶ ዛይድ ወልደ ገብርኤል ላይም ዓቃቤ ሕግ ክሱን እንዲያሻሽል በወንጀለኛ መቅጫ ሥነ ሥርዓት ሕግ ቁጥር 119 መሠረት ለፍርድ ቤቱ አመልክቷል፡፡ ፍርድ ቤቱ ግን ጥያቄ ወይም አቤቱታ መቅረብ የነበረበት በጽሕፈት ቤት በኩል መሆኑን አስረድቶ፣ የተከሰሱ ዜጎችን መብት ለመጠበቅ ብቻ ሲል መቀበሉን አስታውቋል፡፡ በመሆኑም አቶ ዛይድ በክስ ማሻሻል ላይ የሚሉት ካላቸው ለመጠባበቅ ለጥቅምት 3 ቀን 2010 ዓ.ም. ቀጠሮ ሰጥቷል፡፡