Skip to main content
x
አዲስ የነዳጅ ኩባንያ በነዳጅ ማከፋፈል ሥራ እንዲሰማራ ፈቃድ ተሰጠው

አዲስ የነዳጅ ኩባንያ በነዳጅ ማከፋፈል ሥራ እንዲሰማራ ፈቃድ ተሰጠው

ኢትዮጵያ ነዳጅ ንግድ ሥራ ዘርፍ የተሰማሩ ኩባንያዎች 18 መድረሳቸውን የኢትዮጵያ ነዳጅ ድርጅት ይፋ አደረገ፡፡ ከድርጅቱ የተገኘው መረጃ እንደሚያሳየው፣ በአገሪቱ የነዳጅ ችርቻሮ ሥራና ተያያዥ ተግባራት ውስጥ የሚገኙ ኩባንያዎች ቁጥር እየጨመረ ሲሆን፣ 18ኛውን አዲስ ኩባንያ ወደ ሥራ ሊያስገባ የሚያስችለው ፈቃድ ተሰጥቷል፡፡

‹‹ተባረክ›› በሚል መጠሪያ ወደ ሥራ የሚገባው አዲሱ አገር በቀል የነዳጅ ኩባንያ በቅርቡ ሥራ እንደሚጀምር ከኢትዮጵያ ነዳጅ ድርጅት ለመረዳት ተችሏል፡፡ በሥራ ላይ የሚገኙት 17 የነዳጅ ድርጅቶች በመላ አገሪቱ 815 ማደያዎችን ከፍተው እየሠሩ እንደሚገኙ ሲታወቅ፣ በግል ከተቋቋሙት የነዳጅ ድርጅቶች በተጨማሪ መንግሥት የራሱን የነዳጅ ማደያዎች ለማቋቋም ዕቅድ እንዳለው መግለጹ ይታወሳል፡፡ ይህም ሆኖ ለማደያዎች የሚሆን ቦታ ባለማግኘታቸው ምክንያት በርካታ ድርጅቶች ወደ ሥራ ሊገቡ እንዳልቻሉ የነዳጅ ድርጅቱ አመላክቷል፡፡

በሌላ በኩል የነዳጅ ኩባንያዎች ከኢትዮጵያ ነዳጅ ድርጅት ተረክበው የሚያሠራጩትን ነዳጅ የሚስተናግድበት አሠራር፣ እስካሁን ከነበረው በተለየ መንገድ እንዲስተናገድ ለማድረግ ሐሳብ መኖሩ ታውቋል፡፡ የነዳጅ ድርጅቶች ከዚህ ቀደም ከኢትዮጵያ ነዳጅ ድርጀት ነዳጅ ሲረከቡ የቆዩት በዱቤ የነበረ ሲሆን፣ በአዲሱ አሠራር ግን ይህንን በማስቀረት በቅድሚያ አሥር በመቶ ክፍያ በመፈጸም እንዲወስዱ ሊደረግ ይችላል ተብሏል፡፡ ይህንን የመንግሥት ሐሳብ ተፈጻሚ ለማድረግ ዝግጅቶች ሲደረጉ ቆይቷል ቢባልም፣ ተግባራዊው እንቅስቃሴ ለጊዜው እንዲቆም መደረጉ ተነግሯል፡፡ ምክንያቱ ምን እንደሆነ ግን አልተገለጸም፡፡

በአሁኑ ወቅት የነዳጅ ማደያዎችን ገንብተው እየሠሩ የሚገኙት 17ቱ የነዳጅ ድርጅቶች ኖክ፣ የተባበሩት ፔትሮሊየም፣ ኮቢል፣ ኦይል ሊቢያ፣ ዋዲ፣ ታፍ ኦይል፣ ቶታል ኢትዮጵያ፣ ዳሎል፣ ኦልዌይስ፣ ጎምጁ፣ የሺ፣ ብሌን፣ ገነት፣ ዛጎል፣ ኤርታሌና ሙለጌ የሚባሉት የነዳጅ ማደያዎች ናቸው፡፡ ከእነዚህ ውስጥ አራቱ የውጭ ኩባንያዎች ሲሆኑ፣ ቀሪዎቹ አገር በቀሎች ናቸው፡፡