Skip to main content
x
በፊፋ የአገሮች ወርኃዊ ደረጃ ኢትዮጵያ አሽቆለቆለች

በፊፋ የአገሮች ወርኃዊ ደረጃ ኢትዮጵያ አሽቆለቆለች

የዓለም አቀፍ እግር ኳስ ማኅበር (ፊፋ) በየወሩ በሚያወጣው የአገሮች የእግር ኳስ ደረጃ፣ የኢትዮጵያ ውጤት በአንድ ወር ልዩነት ብቻ ሰባት ደረጃ ማሽቆልቆሉ ይፋ ሆኗል፡፡ ለዚህ በምክንያትነት የተጠቀሰው ደግሞ ብሔራዊ ቡድኑ በተከታታይ ባደረጋቸው ሁለት የወዳጅነት ጨዋታዎችና ለአፍሪካ ዋንጫ ባደረጋቸው የማጣሪያ ጨዋታዎች ያስመዘገባቸው ውጤቶች ናቸው፡፡

በአሠልጣኝ አሸናፊ በቀለ እየሠለጠነ የሚገኘው ብሔራዊ ቡድኑ፣ በቅርቡ ከቦትስዋናና ከሞሮኮ ጋር ባደረጋቸው ሁለት የፊፋ የወዳጅነት ጨዋታዎች 2 ለ0 እና 4 ለ0 ተሸንፎ መመለሱ አይዘነጋም፡፡ ቡድኑ ከዚያ በፊት ለ2019 የአፍሪካ ዋንጫ ማጣሪያ ባደረገው የምድብ ጨዋታ በጋና አቻው 5 ለ0 ሽንፈት የምድቡን ጨዋታ መጀመሩ ይታወሳል፡፡ ከ2018 የአፍሪካ አገሮች ዋንጫ (ቻን) ደግሞ በኬንያ አቻው በድምር ውጤት 2 ለ1 ተሸንፎ ከሻምፒዮናው ውጪ መሆኑም ይታወቃል፡፡  

ይህንኑ ውጤት መነሻ በሚያደርገው የፊፋ ወርኃዊ የአገሮች ደረጃ የጥቅምት ወር የኢትዮጵያ ደረጃ 151ኛ ሆኗል፡፡ በመስከረም ወር ይፋ በሆነው የአገሮች የእግር ኳስ ደረጃ ደግሞ 144ኛ ላይ መቀመጧ አይዘነጋም፡፡

የአፍሪካን እግር ኳስ ከመሠረቱ አራት አገሮች አንዷ እንደነበረች የሚነገርላት ኢትዮጵያ በተለይም በዚህ ወር በተደረገው የአፍሪካ አገሮች የእግር ኳስ ደረጃ 45ኛ ላይ ተቀምጣለች፡፡ ቀዳሚዋ አገር በአሁኑ ወቅት ደግሞ ከመጨረሻዎቹ ስምንት አገሮች ቀዳሚ ሆና ትገኛለች፡፡

በኋላ የኢትዮጵያ እግር ኳስ ፌዴሬሽን ከሦስት ሳምንት በኋላ በአፋር ርዕሰ ከተማ ሰመራ በሚያደርገው መደበኛ ጠቅላላ ጉባኤ፣ አዲስ የሥራ አመራር ምርጫም ያከናውናል፡፡ ይህንኑ መነሻ በማድረግ ጉባኤው ለዚህ ተቋም የሚያስቀምጣቸው አመራሮች ላይ ጥንቃቄ ሊያደርግ እንደሚገባው እየተነገረ ይገኛል፡፡