Skip to main content
x

የሳምንቱ ገጠመኝ

‹‹ጦር ከፈታው ወሬ የፈታው›› የሚለውን ቢሂል እንደ ዋዛ ከሚመለከቱት መካከል አንዱ ነበርኩ ብል ማጋነን አይሆንም፡፡ በቅርቡ የወሬ ሞገድ ያደረሰው መናወፅ ምስቅልቅሌን ካወጣው በኋላ፣ እንደ ገብስ ያልተፈተገ ወሬ በሰው ልጅ ሕይወት ውስጥ የሚፈጥረው አደጋ ለሰዎች ማስተማሪያ ይሆን ዘንድ በገጠመኝ መልክ አቀረብኩት፡፡ ወሬ በቤተሰብ፣ በመኖሪያ አካባቢ፣ በመሥሪያ ቤትና በተለያዩ ቦታዎች በተካኑበት ሰዎች ተከሽኖ ሲቀርብ እውነት ይመስላል፡፡ ነገር ግን እንደ ወንፊት ሳያጣሩ እንዳለ የሚቀበሉትና የሚያስተጋቡት ሲያገኝ ደግሞ እንደ ሰደድ እሳት ከፍተኛ አደጋ ይፈጥራል፡፡

በቅርቡ አለቃዬ ‹‹በግል ላነጋግርህ እፈልጋለሁ›› ይሉኝና ምሳ ጋብዘውኝ አንድ ሬስቶራንት እንገናኛለን፡፡ የምንፈልገውን ምሳ እየበላን የባጥ የቆጡን ስናወራ ቆይተን ቡናችንን ፉት ማለት ስንጀምር፣ ወደ ዋናው የተፈለግኩበት ርዕሰ ጉዳይ አመራን፡፡ አለቃዬ ዙሪያ ዙሪያውን ሲሉ ቆይተው፣ ‹‹አንተና እከሊት ግንኙነታችሁ በምን ላይ ነው የተመሠረተው?›› በማለት ያልጠበቅኩትን ጥያቄ አቀረቡልኝ፡፡ ‹‹እከሊት›› በማለት የምገልጻት የሥራ ባልደረባዬ ባለትዳርና የሁለት ልጆች እናት ስትሆን፣ እኔ ምንም እንኳን ላጤ ብሆንም በቅርቡ በትዳር የምቆራኛት ጓደኛ አለችኝ፡፡ የአለቃዬ ጥያቄ ግን በጣም አስደነገጠኝ፡፡

‹‹እኔና እሷ የሥራ ባልደረባ ከመሆናችን በተጨማሪ በበርካታ ጉዳዮች ላይ ሐሳብ ለሐሳብ ስለምንለዋወጥ እንግባባለን፡፡ የምናነባቸውን መጻሕፍትም እንዋዋሳለን፡፡ ከዚህ ውጪ ምንም ዓይነት ግንኙነት የለንም፡፡ ነገር ግን በሁለታችን መቀራረብ ወይም ግንኙነት ማን ምን አግብቶት ነው ይኼ ዓይነቱ ጥያቄ የቀረበልኝ?›› ብዬ ቱግ አልኩ፡፡ ሰውነቴ ተንቀጠቀጠ፡፡ እኛ ሐበሾች በሰው ልጆች ግላዊ ጉዳይ ውስጥ ገብተን ለምን መፈትፈት እንደምንወድ እያሰብኩ በጣም ተናደድኩ፡፡

አለቃዬ ትክ ብለው ሲያዩኝ ቆይተው፣ ‹‹አየህ አንተነህ አንተ ወንደ ላጤ ነህ ገና ያላገባህ፡፡ እሷ ባለትዳርና የልጆች እናት፡፡ የሁለታችሁ መቀራረብ በጣም ሲበዛ ሊፈጥረው የሚችለውን አደጋ አይታሰብህም? አንድ ወንድና አንዲት ሴት በጣም በተቀራረቡ ቁጥር ሰይጣን በመሀል ገብቶ የሚፈጥረው ችግር አይታይህም? . . .›› እያሉ የማወጣጣት ይሁን የማራራቅ ዓይነት ወሬያቸውን ሲደረድሩ አናደዱኝ፡፡ እኔና ይህች ንፁህ ሴት አብረን በሥራ ዓለም የቆየንባቸውን ሰላማዊ ጊዜያት እያሰብኩ ስለሷ ማሰላሰል ስጀምር፣ ንዴቴን መቆጣጠር የማልችልበት ደረጃ ላይ ደረስኩ፡፡

‹‹እርስዎ በዕድሜም ሆነ በዕውቀት፣ በሥራ ልምድም ሆነ በበርካታ ጉዳዮች ለእኔም ሆነ ለሌሎች የሚተርፍ አርዓያነት ይኖርዎታል ብዬ አስብ ነበር፡፡ ነገር ግን ምንም መያዣ መጨበጫ በሌለው ወሬ ወይም አሉባልታ ላይ ተመሥርተው እንዴት የእኔንም ሆነ የዚችህን የተከበረች ሴት መልካም ስም የሚያጎድፍ ንግግር ያደርጋሉ? ወንድ ከወንድ፣ ወይም ሴት ከሴት ጋር ጓደኛ የሚሆኑትን ያህል እኮ ወንድና ሴትም የልብ ጓደኛሞች ይሆናሉ፡፡ ባይገርምዎት ለእኔ እየነገሩኝ ያለውን አሉባልታ ይህች የተከበረች ሴት ብትሰማ ችግር ይፈጠራል፤›› ብያቸው ራሴን በሐዘን ወዝውዤ ዝም አልኩ፡፡ በመካከላችን ረዥም ፀጥታ ሆነ፡፡

አለቃዬ እንደምንም ብለው ጉሮሮአቸውን ካፀዳዱ በኋላ፣ ‹‹ምን መሰለህ? የሁለታችሁ በጣም የጠነከረ ግንኙነት ያሳሰባቸው በጣም ጨዋ የምላቸው ሁለት የሥራ ባልደረቦች እስኪ ምከራቸው ስላሉኝ ነው እንጂ፣ እኔማ በሰዎች ግላዊ ጉዳይ ውስጥ መግባት ፈልጌ አይደለም፡፡ እንደ ነገርከኝ ግንኙነታችሁ ከእንከን የፀዳ ከሆነ ጥሩ ነው፡፡ ሆኖም እነዚህ ጥሩ ሰዎች እንደነገሩኝ የሁለታችሁ ግንኙነት የተዛባ ከሆነ አደጋ ሊፈጠር ይችላል፡፡ ለምሳሌ ባለቤቷ ቀንቶ እዚህ ያለህበት ቦታ ድረስ መጥቶ ቢገድልህስ? አንተም አሟሟትህ አሳፋሪ ይሆናል፡፡ የድርጅታችንም መልካም ስም ይጠፋል፡፡ አየህ ለአንተም ሆነ ለድርጅቱ ደኅንነት በማሰብ ነው ይኼንን አሳሳቢ ጉዳይ ያነሳሁብህ . . .›› እያሉ ሲቀባዥሩ ውስጤ ታመመ፡፡

‹‹እርስዎ የምትሏቸው ጨዋ መካሪዎች እነማን ናቸው?›› በማለት ጥያቄ ሳቀርብ ሊነግሩኝ ፈቃደኛ አልሆኑም፡፡ ‹‹በደንብ መወያየት ካለብን ይንገሩኝና መፍትሔውን እንፈልግ . . .›› በማለት ማሳሰቢያ ባቀርብም የወሬ ፈብራኪዎቹን ማንነት መናገር አልፈለጉም፡፡ ብላቸው ብሠራቸው ለጥያቄዬ መልስ ጠፋ፡፡ ‹‹አዩ ጌታዬ! እኔ ከእርስዎ በዕድሜም ሆነ በተለያዩ ጉዳዮች ባንስም በመልካም ሰብዕናዬና በጨዋነቴ እበልጥዎታለሁ፡፡ የወሬ ምንጩን ብቻ ሳይሆን፣ ተጨባጭ ሁኔታውን ሳልመረምርና ሳላረጋግጥ አደባባይ አልወጣም፡፡ በስማ በለው የሰው ስም እያነሳሁ ጭቃ አልቀባም፡፡ በአሉባልታ ፈረስ እየጋለብኩ የሰው ስም አላጠፋም፡፡ እርስዎ ግን ይኼንን የማድረግ ድፍረት ስለሌለዎት ንቄዎታለሁ . . .›› ብያቸው የተቀመጡበት ጥያቸው ሄድኩ፡፡ ቢሮ መግባት ስላስጠላኝ በቀጥታ ወደ ቤቴ ነው የሄድኩት፡፡ ያቺን ጥሩ የሥራ ባልደረባዬን ጨምሮ አንዳንድ ጓደኞቼ ስልክ ቢደውሉም፣ ለጊዜው ራሴን ስላመመኝ ቤት መሄዴን ከመግለጽ ውጪ ለማንም ምንም ነገር አልተነፈስኩም፡፡

ሌሊቱን ሙሉ እንቅልፍ አጥቼ አድሬ በጠዋት ቢሮ የደረስኩት የሥራ መልቀቂያ ደብዳቤዬን ጽፌ ነበር፡፡ አየሩ በወሬ የተበከለበት ቦታ ብዙ መቆየት ጥሩ ስላልነበር ሥራ መልቀቄ ትክክል ነበር፡፡ ደመወዙ በጣም ጥሩ ቢሆንም ሌላ ቦታም አገኘዋለሁ፡፡ ለአዕምሮ ሰላም ሲባል ክፉዎች ያሉበትን ሥፍራ ለቆ ወደ ሌላ ቦታ መሄድ ለእኔ የተሻለ ምርጫ ነበር፡፡ የሥራ መልቀቂያ ደብዳቤዬ የደረሳቸው አለቃዬ እየበረሩ መጥተው፣ ‹‹ና እንነጋገር እፈልገሃለሁ፤›› ሲሉኝ፣ ‹‹መፈላለግ ድሮ ቀረ፤›› ብዬ ሸኘሁዋቸው፡፡ በአለቃዬ የፀፀት ንግግር ያፈተለከው ሚስጥር መሥሪያ ቤታችን ውስጥ የዚያኑ ዕለት ሲሰማ የአማላጅ ብዛት ቢሮዬን አጥለቀለቀው፡፡ ‹‹የወሬው ምንጭ መታወቅ አለበት›› የሚለው ግትር አቋሜ በመበርታቱ አለቃዬ እጅ ሰጥተው ሰዎቹ ተጋለጡ፡፡ አንዷ የእሳቸው ጸሐፊ፣ ሌላዋ ደግሞ የአንድ ክፍል ኃላፊ ናት፡፡ ምክንያታቸው ሲጠየቅ የሚናገሩት ጠፋ፡፡ በዕድሜ የገፉት የፋይናንስ ክፍል ኃላፊ፣ ‹‹ሁለቱንም አውቃቸዋለሁ፡፡ ውስጣቸው ያለው ምቀኝነት እንኳን የሰውን ልጅ ብረት ይገዘግዛል፤›› ብለው ሲወርፏቸው የሥራ ባልደረቦቻችን በሐዘን አንገታቸውን ደፉ፡፡ ወሬኛና አሉባልተኛ እንደ አሸን በፈላበት አገር ውስጥ መጠየቅና መመርመር ማንን ገደለ? ኧረ ንፁኃን እየተጎዱ ነው፡፡

 

(አንተነህ ደረሰ፣ ከሐዋሳ)