Skip to main content
x
ሦስት ክልሎች የእግር ኳስ ፌዴሬሽኑን ውሳኔ አወገዙ
ከግራ ወደ ቀኝ የሐረሪ ክልል እግር ኳስ ፌዴሬሽን ፕሬዚዳንት አቶ አብዱልሃኪም አብዱረህማ፣ የአፋር እግር ኳስ ፌዴሬሽን ፕሬዚዳንት አቶ መሐመድ ያዮና የጋምቤላ ክልል እግር ኳስ ፌዴሬሽን ተወካይ አቶ ቻን ጋትኮት

ሦስት ክልሎች የእግር ኳስ ፌዴሬሽኑን ውሳኔ አወገዙ

  • ጉባዔውም የፊፋን የውሳኔ ሐሳብ እንዲያከብር ጠይቀዋል

በአፋር ክልል ሊካሄድ ቀን ተቆርጦለት የነበረውና ሐሙስ ጥቅምት 30 ቀን 2010 ዓ.ም. በአዲስ አበባ ሒልተን የሚካሄደው ጉባዔ ሦስት ክልሎች ተቃወሙ፡፡ የአፋር ክልል ሊያስተናግደው የነበረው ጉባዔ ወደ አዲስ አበባ መቀየሩን በመቃወም ከሕግም ከሞራልም አኳያ ተገቢነት የሌለው ድርጊት በማለት የፌዴሬሽኑን ውሳኔ አውግዘዋል፡፡

      የአፋር፣ የጋምቤላና የሐረሪ ክልል እግር ኳስ ፌዴሬሽኖች በጋራ ሰኞ ጥቅምት 27 ቀን በአዲስ አበባ ኢትዮጵያ ሆቴል በሰጡት መግለጫ፣ ብሔራዊ ፌዴሬሽኑ ጥቅምት 30 ቀን ሊያካሂድ ያሰበውን ጉባዔ በአፋር ክልላዊ መንግሥት ለማካሄድ ሲወስን ያለማንም ጣልቃ ገብነት ነበር፡፡ የፌዴሬሽኑን ውሳኔ በደስታ የተቀበለው የአፋር ክልልም ጉባዔው በታቀደለት ፕሮግራም መሠረት መካሄድ ይችል ዘንድ ዝግጅቱን አጠናቆ የነበረ መሆኑን ጭምር የክልሉ እግር ኳስ ፌዴሬሽን ፕሬዚዳንት አቶ መሐመድ ያዮ ተናግረዋል፡፡

      የአፋር ብሔራዊ ክልላዊ መንግሥት እንደተቀሩት የአገሪቱ እህትትማማች ክልሎች፣ አደረጃጀቶችን በመፍጠር የክልሉን እግር ኳስ ለማሳደግ እንቅስቃሴ እያደረገ እንደሚገኝ የገለጹት አቶ መሐመድ፣ ክልሉ በተለይም በአሁኑ ወቅት 35,000 ተመልካቾችን ማስተናገድ የሚችል ዘመናዊ ስታዲየም ግንባታ በማጠናቀቅ ላይ መሆኑን፣ በውድድር ዓመቱም ክለብ በማቋቋም በብሔራዊ ሊግ እየተወዳደረ እንደሚገኝም ተናግረዋል፡፡

እንደ አቶ መሐመድ፣ የአፋር ክልል በእግር ኳሱ እያደረገ ያለውን እንቅስቃሴና የመሠረተ ልማት ግንባታ ግምት ውስጥ በማስገባት የኢትዮጵያ እግር ኳስ ፌዴሬሽን የዘንድሮውን ጉባዔ በሰመራ ከተማ እንደሚያደርግ በተደጋጋሚ ካረጋገጠ በኋላ ግልጽ ባልሆነ ምክንያት ጉባዔውን ከአፋር ወደ አዲስ አበባ እንዲየቀር የተደረገበት ውሳኔ ተቀባይነት የለውም፡፡

‹‹በክልሉ የፀጥታም ሆነ ሌላ ተዛማጅ ችግር የለም፡፡ ይኼ በሌለበት የኢትዮጵያ እግር ኳስ ፌዴሬሽን ውሳኔውን ለምን ሊቀይር እንደቻለ እንደ ክልል ብቻ ሳይሆን እንደ አገርም ግልጽ አይደለም፤›› ያሉት አቶ መሐመድ ፌዴሬሽኑ አሁንም ውሳኔውን ሊያጤን እንደሚገባ አስረድተዋል፡፡

የፌዴሬሽኑ ፕሬዚዳንት ሌላው በመግለጫው ያካተቱት፣ ብሔራዊ ፌዴሬሽኑ የሚመራበትን መተዳደሪያ ደንብ በመጣስ ክልሎች ለፌዴሬሽኑ ፕሬዚዳንታዊና ሥራ አስፈጻሚ ምርጫ የሚያቀርቧቸው ዕጩዎች አንድ፣ አንድ ተወካይ እንዲያቀርቡ ያደረገበት አሠራርም ትክክል እንዳልሆነ ‹‹ክልሎች ገደብ ሳይደረግባቸው ይመጥናሉ የሚሏቸውን ተወዳዳሪዎች አቅርበው፣ በትክክለኛ ምርጫ ትክክለኞቹ አመራሮች ተመርጠው የኃላፊነት ቦታ ሊረከቡ ይገባል፤›› የሚል እምነት እንዳላቸውም አቶ መሐመድ ተናግረዋል፡፡

በመግለጫው ከታደሙት የጋምቤላ እግር ኳስ ፌዴሬሽን ተወካይ አቶ ቻን ጋትኮት ይጠቀሳሉ፡፡ እንደ አቶ ቻን ጋትኮት፣ የኢትዮጵያ እግር ኳስ ፌዴሬሽን ጉባዔውን እንዲያስተናግድ ለአፋር ክልል የሰጠውን ዕድል ነጥቆ ለአዲስ አበባ አሳልፎ የሰጠበትን አግባብ አይደግፉትም፡፡ ተወካዩ፣ ‹‹አሁንም ሆነ ወደፊት ብሔራዊ ፌዴሬሽኑ ግምት ውስጥ ማስገባት የሚጠበቅበት የአፋር ክልል ጉባዔ የማስተናገድ አቅም አለኝ ካለ መብቱ መሆኑን ነው፤›› ብለዋል፡፡ 

አቶ ቻን ሌላው ያነሱት ነጥብ፣ የዓለም አቀፍ እግር ኳስ ማኅበር (ፊፋ) ፌዴሬሽኑ ሊያካሂደው ያሰበው ምርጫ የአካሄድ ስህተት እንዳለው በመግለጽ ያስተላለፈው ማስጠንቀቂያ በፌዴሬሽኑም ሆነ በጠቅላላ ጉባዔው ትኩረት ሊሰጠው ይገባል የሚል ነው፡፡

የአፋር እግር ኳስ ፌዴሬሽን ፕሬዚዳንት፣ የጋምቤላ እግር ኳስ ፌዴሬሽን እንደ ሥጋት ያነሱትን ጉዳይ እንደሚጋሩት ነው ያስረዱት፡፡ የሐረሪ ክልል እግር ኳስ ፌዴሬሽን ፕሬዚዳንት አቶ አብዱልሃኪም አብዱረህማን በበኩላቸው የሁለቱን ክልል እግር ኳስ ፌዴሬሽኖች አቋም እንደሚጋሩ ተናግረዋል፡፡