Skip to main content
x
ኦሮሚያ ኢንተርናሽናል ባንክ ከወለድ አልባ አገልግሎት ከሁለት ቢሊዮን ብር በላይ ተቀማጭ አሰባሰበ
የኦሮሚያ ኢንተርናሽናል ባንክ ፕሬዚዳንት አቶ አቢ ሳኖ

ኦሮሚያ ኢንተርናሽናል ባንክ ከወለድ አልባ አገልግሎት ከሁለት ቢሊዮን ብር በላይ ተቀማጭ አሰባሰበ

ኦሮሚያ ኢንተርናሽናል ባንክ ከወለድ ነፃ በሆነው የባንክ አገልግሎት ዘርፍ ያሰባሰበው ተቀማጭ ገንዘብ ከሁለት ቢሊዮን ብር በላይ ሲደርስ ከዚሁ ዘርፍ ያገኘው የትርፍ መጠን ከካቻምናው ይልቅ ከፍተኛ ብልጫ ማሳየቱ ተገለጸ፡፡

በአገሪቱ ፋይናንስ ኢንዱስትሪ ውስጥ ከወለድ ነፃ የባንክ አገልግሎት በመጀመር ቀዳሚ የሆነው የኦሮሚያ ኢንተርናሽናል ባንክ በ2009 የሒሳብ ዓመት ከወለድ አልባ የባንክ አገልግሎት ያገኘው ትርፍ 132 ሚሊዮን ብር ደርሷል፡፡

ባንኩ የ237 በመቶ ብልጫ በማሳየት በ2008 ዓ.ም. ከወለድ ነፃ በሆነው ዘርፍ 39.08 ሚሊዮን ብር ቢያተርፍም፣ በ2009 ዓ.ም. የተመዘገው ትርፍ ግን ወደ 132 ሚሊዮን ብር በማደጉ የ237 በመቶ ጭማሪ እንደታየበት ባንኩ አስታውቋል፡፡

ቅዳሜ፣ ጥቅምት 25 ቀን 2010 ዓ.ም. ባንኩ ባካሄደው ጠቅላላ ጉባዔ ወቅት ይፋ እንደተደረገው፣ ከወለድ አልባ የባንክ አገልግሎት ያስገኘው የትርፍ መጠን በኢንዱስትሪው ውስጥ ከፍተኛው ሊባል እንደሚችል ተጠቅሷል፡፡ ከዚህም ባሻገር ባንኩ በዓመቱ ካገኘው አጠቃላይ ዓመታዊ ትርፍ ውስጥ ከወለድ አባል አገልግሎት ያገኘው ትርፍ የ34.8 በመቶ ድርሻ እንዲይዝ አድርጎታል፡፡

የኦሮሚያ ኢንተርናሽናል ባንክ በወለድ አልባ የባንክ አገልግሎት ማሰባሰብ የቻለው የገንዘብ መጠንም በ2008 ዓ.ም. ከተበሰበሰው መጠን አንፃር የ175.4 በመቶ በማደግ ወደ 2.19 ቢሊዮን ብር ደርሷል፡፡ ይኸውም በ2008 ዓ.ም. አሰባስቦት ከነበረው 1.25 ቢሊዮን ብር የወለድ አልባ ገንዘብ አንፃር ሲታይ፣ በ237 በመቶ አድጓል፡፡፡ ባንኩ በ2007 ዓ.ም. ያሰባሰበው የወለድ አልባ ገንዘብ 874 ሚሊዮን ብር እንደነበር ይታወሳል፡፡

በወለድ ነፃ አገልግሎት ዘርፍ ከተሰባሰበው ገንዘብ ውስጥ ለተለያዩ የኢኮኖሚ ዘርፎች ፋይናንስ (ብድር) የተደረገው የገንዘብ መጠን 1.05 ቢሊዮን ብር መድረሱንም የባንኩ ሪፖርት ያመለክታል፡፡ ይህም ከ2008 ዓ.ም. አፈጻጸሙ አኳያ የ107.3 በመቶ ዕድገት ታይቶበታል፡፡ ይሁን እንጂ በወለድ አልባ ዘርፍ ከተሰባሰበው ገንዘብ አንፃር ከወለድ ነፃ በሆነው መስክ ፋይናንስ ያደረገው (ያበደረው) የገንዘብ መጠን አነስተኛ እንደሆነ ለማወቅ ተችሏል፡፡ ባንኩ ይህንኑ በተመለከተ በዓመታዊ ሪፖርቱ እንደጠቀሰው፣ በወልድ አልባ አገልግሎቱ ከሰበሰበው ተቀማጭ ገንዘብ አንፃር ተመጣጣኝ ‹‹ብድር›› እንዳልተሰጠና ይህንን ክፍተት ለመሙላትም የበለጠ መሠራት እንዳለበት ይጠቅሳል፡፡ በ2008 ዓ.ም. ከወለድ አልባ የባንክ አገልግሎት ካሰባሰበው ተቀማጭ ገንዘብ ውስጥ ፋይናንስ ያደረገው 509 ሚሊዮን ብር እንደነበር ይታወሳል፡፡ በወለድ ነፃ አገልግሎት ዘርፍ ስኬታማ ሆኖ የታየው የባንኩ አፈጻጸም የ38.4 ሚሊዮን ብር የውጭ ምንዛሪ የተገኘበት አግባብ ሲሆን፣ ከካቻምናው አኳያም በ47 በመቶ ጭማሪ አሳይቷል፡፡  

ከወለድ ነፃ የባንክ አገልግሎት መስክ ባንኩ ያገኘው አጠቃላይ ገቢ 160.19 ሚሊዮን ብር እንደሆነ ባንኩ አስታውቆ፣ ይህ የገቢ መጠን ከካቻምናው የ181 በመቶ ዕድገት እንደታየበት ጠቅሷል፡፡ በ2008 ዓ.ም. ከወለድ አልባ አገልግሎት የተገኘው ገቢ 57 ሚሊዮን ብር ነበር፡፡

በሌሎች የባንክ አገልግሎቶች አኳያ ሲታይ፣ የባንኩ ተቀማጭ ገንዘብ መጠን  በ44 በመቶ አድጎ 13.4 ቢሊዮን ብር ሲደርስ፣ ዓመታዊ ገቢው ደግሞ በ28 በመቶ ጨምሮ ወደ 1.49 ቢሊዮን ብር ከፍ ማለቱን የባንኩ ሪፖርት ያሳያል፡፡ የባንኩ አጠቃላይ የሀብት መጠንም እንደዚሁ በ44 በመቶ እንደጨመረና ባንኩ በ2009 ዓ.ም. መጨረሻ ያካበተው የሀብት መጠንም 16.7 ቢሊዮን ብር እንደደረሰ አስታውቋል፡፡

በ2009 ዓ.ም. አሮሚያ ኢንተርናሽናል ባንል የሰጠው አጠቃላይ የብድር መጠን 8.23 ቢሊዮን ብር ሲሆን፣ ይህም ከ2008 ዓ.ም. አኳያ በ43 በመቶ ብልጫ ማሳየቱ ተጠቅሷል፡፡ አምና ባንኩ ከሰጠው አጠቃላይ ብድር ውስጥ ከፍተኛውን ደረጃ የሚይዘው በአገሪቱ ውስጥ ንግድና አገልግሎት ዘርፎች የዋለው ነው፡፡ የ2.66 ቢሊዮን ብር ብድር የተሰጠ ሲሆን፣ በሁለተኛ ደረጃ ከፍተኛው ብድር የተሰጠው ለወጪ ንግድ ዘርፍ ነው፡፡ ባንኩ ለወጪ ንግድ የሰጠው ብድር 1.6 ቢሊዮን ብር ነው፡፡ ለቤትና ለኮንስትራክሽን መስኮች 951.5 ሚሊዮን ብር ያበደረ ሲሆን፣ ይህ ዘርፍ በሦስተኛ ደረጃ ከፍተኛ ብድር በማግኘት ተመድቧል፡፡

ባንኩ በ2009 ዓ.ም. በጥቅል ያገኘው የውጭ ምንዛሪ መጠን፣ በ2008 ዓ.ም. ካስዘመገበው አኳያ መጠነኛ ቅናሽ አሳይቷል፡፡ እንደ ባንኩ መረጃ፣ ካቻምና የውጭ ምንዛሪ ግኝቱ በ1.36 በመቶ ቀንሶ የ219.84 ሚሊዮን ዶላር ገቢ አግኝቷል፡፡ ይህ የውጭ ምንዛሪ ግኝት ግን በ2007 ዓ.ም. ከነበረውም ያነሰ እንደሆነ ለማወቅ ተችሏል፡፡ ባንኩ በ2007 ዓ.ም. 225 ሚሊዮን ዶላር፣ በ2008 ዓ.ም. ደግሞ የ223 ሚሊዮን ዶላር ገቢ አስመዝገቦ ነበር፡፡

የባንኩ የተጣራ ትርፍ 290.2 ሚሊዮን ብር የደረሰ ሲሆን፣ በ2008 ዓ.ም. ከወለድ አልባ አገልግሎት የተገኘውን ትርፍ በተናጠል የሚያሳየው የባንኩ ሪፖርት፣ ከመደበኛው የባንክ አገልግሎት የተገኘው ትርፍ ግን ቅናሽ እንዳሳየ ጠቁሟል፡፡ በ2009 ዓ.ም. የባንኩ የትርፍ ድርሻ ክፍፍል መጠኑም የ278 በመቶ በመሆን ቅናሽ አሳይቷል፡፡ በ2008 ዓ.ም. ይህ መጠን 310 በመቶ ነበር፡፡