Skip to main content
x

ፀሐይ ኢንሹራንስ የገበያ ድርሻውንና የአረቦን ገቢውን ከፍ እንዳደረገ አስታወቀ

የአገሪቱን የኢንሹራንስ ኢንዱስትሪ ዘግይቶ በመቀላቀል አንዱ የሆነው ፀሐይ ኢንሹራንስ አክሲዮን ማኅበር፣ በ2009 ዓ.ም. ያሰባሰበው የአረቦን መጠን በ47 በመቶ እንዳደገና የገበያ ድርሻውም እንደጨመረ አስታወቀ፡፡  

ፀሐይ ኢንሹራንስ የ2009 ዓ.ም. አፈጻጸሙን ቅዳሜ፣ ጥቅምት 25 ቀን 2010 ዓ.ም. ይፋ ባደረገበት ወቅት እንደተገለጸው፣ በ2008 ዓ.ም. ሁለት በመቶ የነበረው የገበያ ድርሻውን አምና ወደ 3.1 በመቶ ማሳደግ ችሏል፡፡ የኩባንያው ሪፖርት እንዳመለከተው፣ ለገበያ ድርሻው ከፍ ማለት በዋናነት የተጠቀሰው ከጠቅላላ የመድን ሽፋን ያሰባሰበው የአረቦን መጠን በ47 በመቶ በማሳደግ፣ ወደ 225.7 ሚሊዮን ብር ማድረስ በመቻሉ ነው፡፡

ኩባንያው ካስቀመጠው ዕቅድ አኳያም የ12 በመቶ ብልጫ ያለው አረቦን ማሰባሰብ እንደቻለና የገበያ ድርሻውም ከፍ እንዲልለት አስተዋጽኦ ማድረጉ ተጠቅሷል፡፡ በሒሳብ ዓመቱ የአገሪቱ የመድን ኢንዱስትሪዎች በጥቅል ያሰባሰቡት የአረቦን መጠን በአማካይ ዕድገቱ 16 በመቶ ከመሆኑ አኳያ፣ የፀሐይ ኢንሹራንስ የዓረቦን መጠን ዕድገት ከፍተኛ ሊባል እንደሚችል ተጠቅሷል፡፡  

የመድን ድርጅቱ በ2005 ዓ.ም. የነበረው የገበያ ድርሻ ከአንድ በመቶ በታች እንደነበር ይታወሳል፡፡ በ2006 ዓ.ም. ወደ 1.6 በመቶ በማሳደግ ቀስ በቀስ የገበያ ድርሻውን እየጨመረ በመምጣት በ2009 ዓ.ም. 3.1 በመቶ ከፍ ማድረጉን ኩባንያው አስታውቋል፡፡

የፀሐይ ኢንሹራንስ የአረቦን ዕድገት በኩባንያው ዓመታዊ ትርፍ ላይም አዎንታዊ ውጤት እንዳሳረፈ ሲጠቀስ፣ የትርፍ ዕድገቱም ቢሆን ከ2008 ዓ.ም. አኳያ ሲታይ በኢንዱስትሪው ውስጥ ከፍተኛ የሚባል አፈጻጸም እንዳሳየ ተጠቅሷል፡፡  

የ21.9 ሚሊዮን ብር ትርፍ ያስመዘገበው ፀሐይ ኢንሹራንስ፣ ከ2008 ዓ.ም. አኳያ በ43 በመቶ ብልጫ ያለው ትርፍ ማግኘቱን ጠቅሷል፡፡ የአገሪቱ መድን ድርጅቶች በ2009 ዓ.ም. ያስመዘገቡት አማካይ የትርፍ ዕድገት 19 ከመቶ ነው፡፡ ቀደም ያሉት የኩባንያው ሪፖርቶች እንደሚያሳዩት፣ ሥራ በጀመረበት በ2005 ዓ.ም. ኩባንያው 8.3 ሚሊዮን ብር ከስሮ ነበር፡፡ ከ2006 ዓ.ም. ጀምሮ ግን ከ4.07 ሚሊዮን ብር አንስቶ ወደ 11.6 ሚሊዮን ብር ያደገው ትርፉ፣ በ2008 ዓ.ም. ወደ 15.6 ሚሊዮን ብር ማደጉን ለማሳየት ችሏል፡፡

በአረቦን ዕድገትና በትርፍ ዕድገት ብሎም በትርፍ ድርሻ ክፍፍል ረገድ ዕድገት  ያስመዘገበው ኩባንያው፣ ካቀረበው ሒሳብ ሪፖርት መረዳት እንደተቻለው፣ በ2008 ዓ.ም. የነበረው የትርፍ ክፍፍል ድርሻው 24 በመቶ ነበር፡፡ በ2009 ዓ.ም. ግን በ13 በመቶ ጨምሮ ወደ 27 በመቶ ከፍ ብሏል፡፡ ይህም የ100 ብር ዋጋ ያለው አክሲዮን የሚያስገኘው የትርፍ ድርሻ 27 ብር ነው ማለት ነው፡፡ በመሆኑም የትርፍ ክፍፍል ድርሻውን ካሳደጉ ጥቂት የፋይናንስ ተቋማት አንዱ አድርጎታል፡፡  

የመድን ድርጅቱ ጠቅላላ የሀብት መጠን የ29 በመቶ ዕድገት አሳይቶ 305 ሚሊዮን ብር ደርሷል፡፡ ፀሐይ ኢንሹራንስ ለካሳ ክፍያ ያዋለው አጠቃላይ የገንዘብ መጠን 118.7 ሚሊዮን ብር ሲሆን፣ የካሳ ክፍያ ከ2008 ዓ.ም. አኳያ የ43 በመቶ ጭማሪ አሳይቷል፡፡ ከጠቅላላው የካሳ ክፍያ ውስጥም የሞተር ኢንሹራንስ 87 በመቶ ድርሻ ይዟል፡፡

ፀሐይ ኢንሹራንስ ካፒታሉን 74.5 ሚሊዮን ብር በማድረስም ውጤታማ ጊዜ አሳልፏል፡፡ ብሔራዊ ባንክ የኢንሹራንስ ኩባንያዎች ዝቅተኛ ካፒታላቸውን 75 ሚሊዮን ብር እንዲያደርሱ ካስቀመጠው መጠን አኳያ ግማሽ ሚሊዮን ብር ብቻ ማሟላት ቢጠበቅበትም፣ በጠቅላላ ጉባዔው ወቅት በተወሰነው መሠረት፣ በበጀት ዓመቱ የተገኘው ትርፍ ለካፒታል ማሳደጊያ እንዲውል በተደረገው ስምምነት መነሻነት፣ የሚጠበቅበትን  ካፒታል ማሟላት ችሏል፡፡ የፀሐይ ኢንሹራንስ የተፈቀደ ካፒታል 120 ሚሊዮን ብር ነው፡፡