Skip to main content
x
ለክቡር ሚኒስትሩ አንድ ኢንቨስተር ይደውልላቸዋል

ለክቡር ሚኒስትሩ አንድ ኢንቨስተር ይደውልላቸዋል

[ክቡር ሚኒስትሩ ቢሯቸው ከአንድ የውጭ አገር የዕርዳታ ድርጅት ኃላፊ ጋር እያወሩ ነው]

  • ክቡር ሚኒስትር ስለተገናኘን ደስ ብሎኛል፡፡
  • እኔም በጣም ደስተኛ ነኝ፡፡
  • ዛሬ የመጣነው ለኢትዮጵያ መንግሥት ድጋፍ በምናደርግበት ፕሮጀክት ላይ ለመነጋገር ነው፡፡
  • ሁሌም ስለምታደርጉልን ድጋፍ እናመሰግናለን፡፡
  • የዛሬው አመጣጤ ስለዛ ፕሮጀክት ለማውራት ነው፡፡
  • ስለየትኛው ፕሮጀክት?
  • ለሚኒስትር መሥሪያ ቤትዎት ውስጥ አስገነባዋለሁ ስላሉት ፕሮጀክት ነዋ፡፡
  • የቱ ፕሮጀክት ነበር?
  • የላይብረሪው ፕሮጀክት፡፡
  • በእውነት በመጀመርያ ለዚህ ፕሮጀክት የምታደርጉትን ድጋፍ በመንግሥትና በሕዝብ ስም ላመሰግን እወዳለሁ፡፡
  • ሁሌም ከጎናችሁ ነን ክቡር ሚኒስትር፡፡
  • በእናንተ ድጋፍ ፕሮጀክቱን በአፋጣኝ ነው ዕውን የምናደርገው፡፡
  • ክቡር ሚኒስትር ትንሽ ስለፕሮጀክቱ ቢነግሩኝ ደስ ይለኛል፡፡
  • የመንግሥታችን ዋና ዓላማ ሕዝቡን ከሁለት ነገር ማላቀቅ ነው፡፡
  • ከምንና ከምን?
  • ከድህነትና ከኋላ ቀርነት፡፡
  • ደስ ይላል ክቡር ሚኒስትር፡፡
  • እነዚህን ሁለት ጠላቶቻችንን የምናጠፋው ደግሞ የሕዝቡን ዕውቀት በማጎልበት ነው፡፡
  • እስማማለሁ ክቡር ሚኒስትር፡፡
  • በመሆኑም ድህነትንና ኋላ ቀርነትን ለማጥፋት ይኼን ወሳኝ ፕሮጀክት ከመሥሪያ ቤታችን ለመጀመር ወስነናል፡፡
  • የጠቢብ ዓይኖች በራሱ ላይ ናቸው የሚለውን አባባል አስታወሱኝ፡፡
  • እኛ እንኳን ይኼንን ፕሮጀክት ለመሥራት ያሰብነው በራሳችን ነበር፡፡ ሆኖም አንዳንድ እንቅፋቶች እያጋጠሙን ነው፡፡
  • ምን ዓይነት እንቅፋት?
  • የውጭ ምንዛሪ እጥረት ነዋ፡፡
  • ክቡር ሚኒስትር እሱ ችግር በጣም አንገብጋቢ ይመስለኛል፡፡
  • እኛም አንገብጋቢነቱን ተረድተን የተለያዩ ዕርምጃዎችን እየወሰድን ነው፡፡
  • ሰሞኑን የተደረገው የብር የመግዛት አቅም መቀነስም ለዛው ይመስለኛል፡፡
  • ለዚህ ነው እኛም የተለያዩ ዕርምጃዎችን እየወሰድን ያለነው፡፡
  • ለማንኛውም ክቡር ሚኒስትር ይኼን ፕሮጀክት ሙሉ ለሙሉ እኛ ለመሸፈን ወስነናል፡፡
  • በእውነት በጣም ነው የምናመሰግነው፡፡
  • ለፕሮጀክቱ ግን ድጋፍ የምናደርገው በቁስ ነው፡፡
  • በቁስ ስትል?
  • ማለቴ ለፕሮጀክቱ የሚያስፈልገውን ግንባታ እንፈጽማለን፡፡
  • እሺ፡፡
  • ለላይብረሪው የሚያስፈልጉትን መጻሕፍት እናመጣለን፡፡
  • እሺ፡፡
  • በተመሳሳይም ኮምፒዩተሮች እናስመጣለን፣ ለላይብረሪው የሚያስፈልገውን የኢንተርኔት ወጪ እንሸፍናለን፡፡
  • በቃ?
  • ክቡር ሚኒስትር ለፕሮጀክቱ የሚያስፈልገውን በሙሉ እናሟላለን ስልዎት?
  • እየቀለድክ ነው?
  • ምነው ክቡር ሚኒስትር? አጠፋሁ እንዴ?
  • ቁም ነገር መስሎኝ የያዝነው፡፡
  • እኔም እኮ ቁምነገር ነው የማወራዎት፡፡
  • እኔ በጥሬው የምትሰጡን መስሎኝ ነው፡፡
  • ክቡር ሚኒስትር እኔ ጥሬ ሥጋ መልመድ እኮ አቅቶኛል፡፡
  • እኔ የማወራው ስለሌላኛው ጥሬ ነው?
  • ስለየትኛው ጥሬ?
  • ስለ ዶላር!

[ለክቡር ሚኒስትሩ አንድ ኢንቨስተር ይደውልላቸዋል]

  • ክቡር ሚኒስትር ሰሙ አይደል?
  • ምኑን?
  • ፌስቡክ ላይ የሚወራውን አልሰሙም እንዴ?
  • እኔ እኮ ፌስቡክን ስም አውጥቼለታለሁ፡፡
  • ምን ብለው?
  • ፌክቡክ፡፡
  • ለምን?
  • እንዴ ፌስቡክ እኮ የአደገኛ ቦዘኔዎች መፈንጫ ሠፈር ነው፡፡
  • እንዴት ክቡር ሚኒስትር?
  • ስማ እዛ የሚወራው ወሬ ፌክ ነው፣ ሰዎቹም ፌክ ናቸው፡፡
  • መረጃ ታዲያ ከየት ነው የሚያገኙት ክቡር ሚኒስትር?
  • እሱን ለእኛ ተወው፡፡
  • ከየት ነው የሚያገኙት?
  • ከተለያዩ የመረጃና ደኅንነት ምንጮቻችን አሊያም ከታወቁ ሚዲያዎች መረጃ እናገኛለን፡፡
  • ስለዚህ ፌስቡክ አይሆንም እያሉ ነው?
  • ነገርኩህ እኮ እሱ ፌክቡክ ነው፡፡
  • ለማንኛውም ከፌስቡክ ውጪ ከተማ ውስጥ እየተወራ ነው፡፡
  • ምንድነው እሱ?
  • በጣም በጣም አስደንጋጭ ዜና ተከስቷል፡፡
  • የምን አስደንጋጭ ዜና?
  • ወዳጃችን እኮ ተይዘዋል እየተባለ ነው፡፡
  • ማን?
  • እኛ ትልቁ ባለሀብት፡፡
  • እኔ ሳላውቅ ማን አባቱ ነው የሚነካቸው?
  • ቢሰሙስ ምን ያመጣሉ?
  • እዚህች አገር ላይ ምን እየተሠራ ነው?
  • ክቡር ሚኒስትር የታሰሩት እዚህ አገር ሳይሆን ሌላ አገር ነው፡፡
  • እስቲ ማን ነሽ ውኃ ስጪኝ፡፡
  • ምነው ክቡር ሚኒስትር?
  • ልቤ በጣም በኃይል መታ፡፡
  • ለምን ክቡር ሚኒስትር?
  • ቀረብኝ ማለት ነው እኮ፡፡
  • ምኑ ክቡር ሚኒስትር?
  • ጡረታዬ!

[ለክቡር ሚኒስትሩ ሌላ ኢንቨስተር ደወለላቸው]

  • ሄሎ ክቡር ሚኒስትር፡፡
  • ጉድ ሠራችሁኝ አይደል?
  • ሰሙ አይደል ወሬውን?
  • ይኼ እኮ ለእኔ መርዶ ነው፡፡
  • ለምን ክቡር ሚኒስትር?
  • ሜዳ ላይ ነው እኮ ያስቀራችሁኝ፡፡
  • እንዴት ሆኖ ክቡር ሚኒስትር?
  • ስማ ቼክአፔ እንደደረሰ ታውቃለህ?
  • አውቃለሁ፡፡
  • ውጭ የሚማሩት ልጆች ክፍያም ደርሷል፡፡
  • ልክ ነው ክቡር ሚኒስትር፡፡
  • የውጭ ምንዛሪ እንኳን ለእኔ ለመንግሥት ራሱ የራስ ምታት ሆኗል፡፡
  • እውነት ነው፡፡
  • ታዲያ ከየት አምጥቼ ነው የምከፍለው?
  • የደወልኩት እኮ አንድ መላ ልነግርዎት ነው፡፡
  • የምን መላ ነው? አንተ ነህ ለዚህ ሁሉ ያበቃኸኝ፡፡
  • ለምን አይሰሙኝም ክቡር ሚኒስትር?
  • ምንድነው የምሰማው?
  • ይኼ ለእኛ ጥሩ አጋጣሚ ነው፡፡
  • የምን አጋጣሚ?
  • ከሰማይ መና እንደወረደልን ቁጠሩት፡፡
  • እንዴት ሆኖ?
  • ሁላችንም የድርሻችንን እንከፋፈላለና፡፡
  • እንደዛ ይቻላል እንዴ?
  • ማን ይጠይቀናል?
  • እ…
  • ስለዚህ አሁን ጊዜው ነው፡፡
  • የምኑ?
  • የምንጠራበት ነዋ፡፡
  • ምን ተብለን?
  • እውነተኛ ሚሊየነር!

[ክቡር ሚኒስትሩ ለአማካሪያቸው ደወሉለት]

  • አንተ ቅድም አይደለም እንዴ ና ያልኩህ?
  • ሥራ ይዤ ነው፡፡
  • ከእኔ በላይ ሥራ አለ እንዴ?
  • ክቡር ሚኒስትር እኔ እኮ ብዙ ሥራ ያለብኝ ሰው ነኝ፡፡
  • በጣም ቀልደኛ ሆነሃል በል ቶሎ ና!

[አማካሪያቸው ቢሯቸው ገባ]

  • ለምንድን ነው የፈለጉኝ ክቡር ሚኒስትር?
  • አገሪቷ ላይ ያሉትን ነገሮች እንዴት ትመለከታቸዋለህ?
  • ለዚህ ነው የጠሩኝ?
  • አዎ፣ ችግር አለ?
  • ለዚህ ፍሬከርስኪ ወሬ እንዴት ይጠሩኛል?
  • ምንድነው ያልከው?
  • ያልኩትንማ ሰምተውኛል፡፡
  • በጣም ተናንቀናል መሰለኝ፡፡
  • ሥራ ባያስፈቱኝ ጥሩ ነው፡፡
  • ሥራ የምሰጥህ እኔ መስሎኝ? ከመቼ ጀምሮ ነው እንደዚህ የልብ ልብ የተሰማህ?
  • ክቡር ሚኒስትር እኔ ላይ ከመደንፋት ሥራዎን ቢሠሩ አይሻልም?
  • የምን ሥራ?
  • ለሕዝብ ጥያቄ ተገቢውን ምላሽ መስጠት ነዋ፡፡
  • እሱን ማን ንገረኝ አለህ?
  • ለነገሩ ሥራውን የት ያውቁታል?
  • ምን እያልክ ነው?
  • ትክክለኛ ሥራውን የምንሠራው እኛ፣ እርስዎ እኮ የእኛን ሪፖርት ነው በየቦታው የሚያቀርቡት፡፡
  • ምን ለማለት ፈልገህ ነው?
  • የፖለቲካ ሹመኛ ነዎት እያልኩዎት ነው፡፡
  • በጣም ተናንቀናል፡፡
  • እኛ ባንኖር እኮ መሥሪያ ቤቱ ቀጥ ነው የሚለው፡፡
  • እንዴት ነው ልብህ ያበጠው?
  • በፊት የነበሩበት መሥሪያ ቤት ሙሉ በሙሉ ውድቀት ውስጥ ገብቶ አይደል እንዴ ወደዚህ የመጡት?
  • ሥነ ሥርዓት ብትይዝ ይሻላል፡፡
  • ክቡር ሚኒስትር እኔ እኮ እውነቱን ነው የነገርኩዎት፡፡
  • የናቅከኝ አይመስልህም?
  • የናቅኩዎት እኔ አይደለሁም፡፡
  • ታዲያ ማን ነው?
  • ሕዝቡ!

[ለክቡር ሚኒስትሩ አንድ ዳያስፖራ ደወለላቸው]

  • እንዴት ነዎት ክቡር ሚኒስትር?
  • ደህና ነኝ፡፡
  • ምንድነው የምሰማው?
  • ምን ሰማችሁ ደግሞ?
  • በጣም ግራ እየተጋባን እኮ ነው፡፡
  • በምኑ ነው ግራ የተጋባችሁት?
  • ኢትዮጵያ ውስጥ ሰላም ማስፈን አልተቻለም ማለት ነው?
  • ይኼ የፀረ ልማት ኃይሎች ወሬ ነው፡፡
  • ኧረ ይኼን የድሮ ሙዚቃ አይተውትም እንዴ?
  • ለምንድነው መንግሥት የሚናገረውን እንደ ውሸት የምትወስዱት?
  • እውነት አውርቶ ስለማያውቅ ነዋ፡፡
  • ምን እያልክ ነው?
  • ክቡር ሚኒስትር እርስዎ ብቻ ሳይሆኑ ሁሉም በዓለማችን ያሉ ባለሥልጣናት ይዋሻሉ፡፡
  • እንደዚህ አትሳሳት፣ እንደውም መንግሥታችን ብቸኛው እውነት ተናጋሪ መንግሥት ነው ማለት እችላለሁ፡፡
  • ኪኪኪ…
  • ምን ያስቅሃል?
  • ግን ተስፋ አለን?
  • የምን ተስፋ?
  • ይኸው አንዱ ክልል ከሌላው ጋር እየተጋጨ በርካቶች እየሞቱ አይደል እንዴ?
  • ችግሮቻችንን ለመፍታት እየሠራን ነው፡፡
  • አገሪቷ የምትበታተን እኮ ነው የምትመስለው?
  • ይኼ የጠላቶቻችን ምኞት ነው፡፡
  • እኔ ለአገሬ ያለኝ ፍቅር ጥልቅ ነው፡፡
  • የአገር ፍቅር ስትል?
  • የተባለውን አልሰሙም እንዴ?
  • ምን ተባለ?
  • ኢትዮጵያዊነት እንደ ሃሺሽ ሱስ ያስይዛል የተባለውን ነዋ፡፡
  • እንደ ሃሺሽ?
  • ለነገሩ እርስዎን ሱስ ያስያዝዎትን አውቀዋለሁ፡፡
  • ምንድነው?
  • ሙስና!