Skip to main content
x
ቢጂአይ ኢትዮጵያ ራያ ቢራን ለመጠቅለል ከ2.5 ቢሊዮን ብር በላይ አቀረበ

ቢጂአይ ኢትዮጵያ ራያ ቢራን ለመጠቅለል ከ2.5 ቢሊዮን ብር በላይ አቀረበ

በአገሪቱ የቢራ ገበያ ከተቀላቀለ አምስተኛ ዓመቱን የያዘው የራያ ቢራ አክሲዮን ማኅበር ከፍተኛ ባለድርሻ የሆነው ቢጂአይ ኢትዮጵያ፣ ራያ ቢራን ሙሉ ለሙሉ ለመጠቅለል ከ2.5 ቢሊዮን ብር በላይ በማቅረብ እየተደራደረ መሆኑ ታወቀ፡፡

የሪፖርተር ምንጮች እንደገለጹት፣ በራያ ቢራ ውስጥ 42 በመቶ የአክሲዮን ድርሻ ያለው ቢጂአይ፣ ቀሪውን 58 በመቶ የአክሲዮን ድርሻ ለመጠቅለል ለራያ ቢራ ቦርድ ሐሳብ አቅርቧል፡፡ በዓለም አቀፉ ቢጂአይ ኩባንያ የሥራ ኃላፊዎችና በራያ ቢራ የቦርድ አባላት መካከል በፓሪስ ድርድር ሲደረግ መቆየቱም ታውቋል፡፡

ቢጂአይ ኢትዮጵያ ከራሱ ይዞታ ውጪ ያሉትን 58 በመቶ አክሲዮኖችን ለመጠቅለል ያቀረበው ሐሳብ፣ ለእያንዳንዱ አክሲዮን ሰባት እጥፍ (አንድ ሺሕ ብር ዋጋ ላለው አክሲዮን ሰባት ሺሕ ብር) ለመክፈል ዝግጁ መሆኑን በማረጋገጥ እንደሆነም ምንጮች ገልጸዋል፡፡

ሆኖም በቢጂአይና በራያ ቢራ ቦርድ አባላት መካከል እየተደረገ ነው የተባለው ድርድር ድምዳሜው ባይታወቅም፣ የቢጂአይ ሐሳብ በቅርቡ በሚካሄደው የራያ ቢራ አክሲዮን ማኅበር ጠቅላላ ጉባዔ ላይ ይቀርባል ተብሎ እየተጠበቀ ነው፡፡ ቢጂአይ ባቀረበው ሐሳብ ላይ ቀሪዎቹ ባለአክሲዮኖች ይስማሙ አይስማሙ ባይታወቅም፣ በራያ ቢራ ከቢጂአይ ቀጥሎ 25 በመቶ የአክሲዮን ድርሻ ያላቸው አቶ ዳዊት ገብረ እግዚአብሔር፣ ቢጂአይ ባቀረበው ሐሳብ ሳይስማሙ እንዳልቀረ የምንጮች መረጃ ያስረዳል፡፡ በዚህም ምክንያት ቀሪዎቹ ባለአክሲዮኖች ምን ዓይነት ውሳኔ ያስተላልፋሉ የሚለው ጉዳይ አጓጊ እንደሆነ ለማወቅም ተችሏል፡፡

ቀሪዎቹ ባለአክሲዮኖች አክሲዮናቸውን አንሸጥም የሚሉ ከሆኑ ያላቸውን የአክሲዮን ድርሻ ይዘው እንዲቀጥሉ የሚያስችል ዕድል እንደሚኖር ተገልጿል፡፡ ቢጂአይ ባቀረበው ሐሳብ መሠረት የራያ ቢራ ባለአክሲዮኖች የሚስማሙ ከሆነ፣ አንድ ሺሕ ብር ዋጋ ላለው አንድ አክሲዮን 7,000 ብር መክፈል የሚጠበቅበት ይሆናል፡፡ ይህም ቢጂአይን ከ2.5 ቢሊዮን ብር በላይ ወጪ ያስወጣዋል ተብሎ እንደሚገመት የተገኘው መረጃ ያስረዳል፡፡

ቢጂአይ ከዚህም ቀደም አሁን ከያዘው ከ42 በመቶ በላይ የባለቤትነት ድርሻ እንዲኖረው ተጨማሪ አክሲዮኖችን ለመግዛት አቅርቦት የነበረው ጥያቄ፣ በቦርድ አባላት ተቀባይነት ሳያገኝ መቅረቱ ይታወሳል፡፡ ለዚህ ምክንያቱ የአገሬው ዜጋ በዚህ ኢንቨስትመንት ውስጥ ያለው ድርሻ እንዳያንስ የሚል ነበር፡፡

ራያ ቢራ አክሲዮን ማኅበር በታሪካዊቷ ማይጨው ከተማ የተገነባ ሲሆን፣ ወደ ሥራ ከገባ አምስተኛ ዓመቱን ይዟል፡፡ በአሁኑ ወቅት በዓመት 700 ሺሕ ሔክቶ ሊትር ቢራ የማምረት አቅም አለው፡፡ ፋብሪካው በተመረቀበት ወቅት አጠቃላይ ወጪው 1.7 ቢሊዮን ብር እንደነበር ተገልጾ ነበር፡፡ ከዚያ በኋላ ተጨማሪ ማስፋፊያዎችን በማካሄድ ተጨማሪ ወጪ አውጥቷል፡፡ አሁን ባለበት ደረጃ አጠቃላይ የፋብሪካው ሀብት 4.45 ቢሊዮን ብር መገመቱን ለማወቅ ተችሏል፡፡

ቢጂአይ ኢትዮጵያ ራያ ቢራን ሙሉ ለሙሉ ለመጠቅለል ያሰበበትና የራያ ቢራ አመራሮችም በዚህ ጉዳይ ላይ ድርድር የጀመሩበት ምክንያት ግልጽ ባይሆንም፣ ጉዳዩን በተመለከተ የኩባንያዎቹን ኃላፊዎች ለማነጋገር የተደረገው ጥረት ሳይሳካ ቀርቷል፡፡

የቀድሞ የጦር ኃይሎች ጠቅላይ ኤታ ማዦር ሌተና ጄኔራል ፃድቃን ገብረ ትንሳዔን ጨምሮ በ58 ግለሰቦች በሁለት ሚሊዮን ብር ካፒታል ከተቋቋመ በኋላ፣ እንደገና ካፒታሉን ወደ 250 ሚሊዮን ብር በማሳደግ የአክሲዮን ሽያጭ በመጀመር የባለአክሲዮኖችን ቁጥር ከ2,440 በላይ በማድረስ ነው ራያ ቢራ ወደ ሥራ የገባው፡፡

በመቀጠል የኩባንያው ካፒታል ወደ 600 ሚሊዮን ብር ካደገ በኃላ፣ ባለአክሲዮኖች ክፍያቸውን ሙሉ ለሙሉ በመፈጸም ከኢትዮጵያ ንግድ ባንክ ከ914 ሚሊዮን ብር በላይ ብድር ማግኘት ተችሎ ነበር፡፡ በቢጂአይ ሐሳብ መሠረት ሽያጩ ከተከናወነ የባንኩ ዕዳም ሙሉ ለሙሉ ወደ ቢጂአይ ይተላለፋል፡፡

ራያ ቢራን ሙሉ ለሙሉ ለመጠቅለል ድርድር ጀምሯል የተባለው ቢጂአይ ኢትዮጵያ፣ በኢትዮጵያ የቢራ ኢንዱስትሪ ውስጥ ትልቁን የገበያ ድርሻ ይዟል፡፡ በአዲስ አበባ፣ በሐዋሳና በኮምቦልቻ ሦስት ፋብሪካዎችን ገንብቶ ቅዱስ ጊዮርጊስ ቢራንና ሌሎች የቢራ ምርቶችን በማምረት ይታወቃል፡፡ ከዚህም በተጨማሪ ካስቴል ወይን የተባለው ኩባንያም የቢጂአይ እህት ኩባንያ ነው፡፡