Skip to main content
x
ምርት ገበያው በአንድ ወር ውስጥ ከ2.2 ቢሊዮን ብር በላይ ግብይት ፈጸመ

ምርት ገበያው በአንድ ወር ውስጥ ከ2.2 ቢሊዮን ብር በላይ ግብይት ፈጸመ

የኢትዮጵያ ምርት ገበያ በዚህ ዓመት ጥቅምት ወር ብቻ ከ2.2 ቢሊዮን ብር በላይ ዋጋ ያላቸው 37,222 ቶን ያስመዘገቡ የግብርና ምርቶችን በማገበያየት ከመስከረም ወር ይልቅ ከ900 ሚሊዮን ብር በላይ ብልጫ ያለው ግብይት ማስፈጸሙን ገለጸ፡፡

የምርት ገበያው የጥቅምት ወር ግብይት፣ በመስከረም ወር ተመዝግቦ የነበረውን አነስተኛ የግብይት መጠን ያሻሻለ ሲሆን፣ በተለይ የቡና ግብይት ከቀደሙት ወራት የበለጠ ሆኖ ተመዝግቧል፡፡

የምርት ገበያው በጥቅምት ወር የግብይት አፈጻጸም እንደሚያሳየው፣ በወሩ ካገበያያቸው ምርቶች ውስጥ በቡና፣ በሰሊጥ፣ በቦሎቄና በማሾ ምርቶች በጠቅላላው የ37,222 ቶን የምርት መጠን ማገበያየት ችሏል፡፡ ከዚህ ግብይት ውስጥ 72 በመቶውን የያዘው ቡና ሆኗል፡፡ በጥቅምት ወር ብቻ 22,212 ቶን ቡና በምርት ገበያው እንደተስተናገደ የሚያሳየው መረጃ፣ በገንዘብ ሲተመንም በወሩ ውስጥ ከተገበያየው 2.2 ቢሊዮን ብር ውስጥ 87 በመቶው በቡና ግብይት የተመዘገበ እንደሆነ ታውቋል፡፡

በጥቅምት ወር የቡና ዋጋ በስምንት በመቶ ከመጨመሩም ባሻገር፣ ከመስከረም ግብይት ጋር ሲነፃፀር አጠቃላይ የግብይት ዋጋው  በ68 በመቶ፣ በምርት መጠን ደግሞ በ58 በመቶ አድጓል፡፡ በጥቅምት ወር የተገበያየው የቡና መጠን ከ2009 ዓ.ም. ተመሳሳይ ወር ጋር ሲነፃፀር፣ በመጠንም ሆነ በዋጋ ከእጥፍ በላይ እንደጨመረ መረጃው ያሳያል፡፡

በዚህ ወር በተለየ የሚታየው አፈጻጸም በምርት ገበያው ከሚስተናገዱ ምርቶች ውስጥ ወደ ውጭ የሚላከው የቡና ግብይት መጠን በቀዳሚነት እየመራ መሆኑን ነው፡፡ በጠቅላላው ግብይት ከተፈጸመባቸው ምርቶች ውስጥ ቡና የ72 በመቶ ድርሻ ይዟል፡፡ ከዚህ በተጨማሪ 4,850 ቶን ቡና ለአገር ውስጥ ፍጆታ፣ 2,679 ቶን የልዩ ጣዕም (ስፔሻሊቲ) ቡና ግብይት ተፈጽሟል፡፡ በቡና ግብይት በተለይ የስፔሻሊቲ ቡና በፈረሱላ ከፍተኛው ዋጋ 2,360 ብር እንዳወጣ የሚያመላክተው ምርት ገበያው፣ ዝቅተኛውን ደረጃ የያዘው ቡና 940 ብር በማውጣት እንደተሸጠ ይጠቁማል፡፡

ከቡና ባሻገር በጥቅምት ወር የሰሊጥ መሸጫ ዋጋም በ12 በመቶ እንደጨመረ ምርት ገበያው ያሳየ ሲሆን፣ በጥቅምት ወር የተሸጠው ሰሊጥ መጠን 8,990 ቶን  ሲሆን፣ የ265 ሚሊዮን ብር ግብይት እንደተፈጸመበት ለማወቅ ተችሏል፡፡ ከዚህ ውስጥ የሁመራ ጎንደር ሰሊጥ 68 በመቶ በግብይት መጠንና 70 በመቶ የገበያ ዋጋው ድርሻ በመያዝ እንደሚመራም ተጠቅሷል፡፡

ከመስከረም ወር ጋር ሲነፃፀር፣ የሰሊጥ ግብይት መጠን በ29 በመቶ፣ በዋጋ ረገድም በ46 በመቶ ጭማሪ በማሳየት፣ የጥቅምት ወር ግብይት ከቀደሙት ሦስት ተከታታይ ወራት በተሻለ ግብይት እንደተፈጸመበት፣ በርካታ መጠን ያለው ምርትም ለውጭ ገበያ እንደቀረበበት ምርት ገበያው አስታውቋል፡፡

በዚሁ በጥቅምት ወር 990 ቶን ነጭ ቦሎቄ በ15 ሚሊዮን ብር የተገበያየ ሲሆን፣ ይህም ካለፈው ዓመት ተመሳሳይ ወቅት ጋር ሲነፃፀር በግብይት መጠን የ40 በመቶ፣ በዋጋ ረገድም የ36 በመቶ ጭማሪ አሳይቷል፡፡ ከዚህ በተጨማሪም 30 ቶን ማሾ በ588 ሺሕ ብር ተገበያይቷል፡፡

ምርት ገበያው በመስከረም 2010 ዓ.ም. በአንድ ወር ውስጥ ያገበያየው 1.3 ቢሊዮን ብር ዋጋ ያስመዘገቡ 24,892 ቶን የግብርና ምርቶችን ሲሆን ቡና፣ ሰሊጥና ቦሎቄ ዋና ዋናዎቹ እንደነበሩ መዘገባችን ይታወሳል፡፡