Skip to main content
x
የ1950ዎቹ ኢትዮጵያውያን ጄኔራሎች

የ1950ዎቹ ኢትዮጵያውያን ጄኔራሎች

በመጨረሻው የኢትዮጵያ ንጉሠ ነገሥት መንግሥት (1923 - 1967) የጦር ኃይሎች ከፍተኛ ጄኔራል መኰንኖች መካከል ግንባር ቀደምቱ በፎቶው የሚታዩ ናቸው፡፡ ፎቶው ከ1953 ዓ.ም. የታኅሣሥ ግርግር በፊት የተነሳ መሆኑ ይታወቃል፡፡ ከግራ በመጀመሪያ ረድፍ ላይ የሚታዩት የጦር ኃይሎች ኤታማዦር ሹም ሜጀር ጄኔራል መርዕድ መንገሻ (የመከላከያ ሚኒስትር፣ የኢትዮጵያ ሕዝብ ስፖርት ኮንፌዴሬሽን (ኢሕስኮ) ፕሬዚዳንት የነበሩና የታኅሣሥ ግርግርን ያከሸፉ)፣ ሌተና ጄኔራል ከበደ ገብሬ (በ1967 በደርግ የተገደሉ)፣ ሪር አድሚራል እስክንድር ደስታ የባሕር ኃይል አዛዥ የነበሩ (በ1967 በደርግ የተገደሉ)፣ ሜጀር ጄኔራል ዋቅጅራ ሰርዳ፣ ብርጋዲየር ጄኔራል መንግሥቱ ነዋይ (የታኅሣሥ ግርግር መሪ የነበሩ ከአመፁ በኋላ የተሰቀሉ)፣ ሌተና ጄነራል አማን ሚካኤል አንዶም (ከደርግ ጋር ተታኩሰው ራሳቸውን ያጠፉ)፣ እና ሌተና ጄኔራል አሰፋ አያና ናቸው፡፡

                                                                                                                                                  ሔኖክ መደብር

                        ****************

‹‹ምን ያህል?›› ምንድን ነው?

‹‹እወድሻለሁ›› ስልሽ

ደግመሽ እየደገመሽ ‹‹ምን ያህል?›› አትበይኝ

የመውደድን ልኬት

በጭራሽ የማላውቅ የዋህ አፍቃሪ ነኝ

‹‹ዓይንሽ እንደምን ነው?

ጥርስሽ እንደምን ነው?

ከንፈርሽ እንዴት ነው?›› ብዬ ብጠይቅሽ

ምን  ዓይነት ነው መልስሽ?

ልክ እንደዛ ማለት የመውደድ ልኬት ነው

የሆነውን አውቀሽ ይህ ነው የማትይው

ከዚህ እስከ ሰማይ . . .

ያለውን ርቀት የትኛው ሰው ለካ?

የፀሐይን ሙቀት

የጨረቃን ደረት

የኮከብን ውበት

የምድሪቷን ክብደት የባህሩን ዲካ

የቱ ሰው አወቀ የትኛውስ ለካ?››

ልክ እንደዛ ማለት የመውደድ ልኬት ነው

የሆነውን አውቀሽ ይህ ነው የማትዪው

  • ሰሎሞን ሳህለ ‹‹የልብ ማኅተም›› (2010)

*************

የአፍሪማ ተሸላሚ ድምፃውያን

ሰሞኑን በናይጄሪያ መዲና ሌጎስ በተከናወነውና በምሕፃሩ ‹‹አፍሪማ›› በሚባለው የመላ አፍሪካ ሙዚቃ ሽልማት (All Africa Music Awards) መድረክ ኢትዮጵያውያኑ ድምፃውያን ሐመልማል አባተና ሔኖክ መሐሪ ተሸላሚ ሆነዋል፡፡ ሐመልማል ተሸላሚ የሆነችው በምርጥ የአፍሪካ ሙዚቃ ዘርፍ ሲሆን፣ ለሽልማት ያበቃትም ‹‹ሐረር›› የተሰኘው ሥራዋ ነው፡፡ ከምሥራቅ አፍሪካ ምርጥ ወንድ በሚለው ዘርፍ አሸናፊ የሆነት ሔኖክና መሐሪ ብራዘርስ ‹‹ፍቅር ይሻላል›› በሚለው ሥራቸው ነው፡፡ በሥነ በዓሉ የሙዚቃ፣ ፊልም፣ ፋሽን፣ ሚዲያና የሌሎች ዘርፎች ታዋቂ እንግዶች የተገኙ ሲሆን፣ ናይጄሪያውያን ሁለት ዋና ዋና ሽልማቶችን - የዓመቱ ምርጥ አርቲስት እና የዓመቱ ምርጥ ዘፈን - ጨምሮ የምዕራብ አፍሪካ ምርጥ ወንድና ሴት ድምፃውያን ክብርን አግኝተዋል፡፡ ከሰሜናዊ አፍሪካ ሞሮኮ፣ እንዲሁም ከደቡባዊ አፍሪካ ምድብ ደቡብ አፍሪካ የሁለቱንም ጾታ ሽልማቶች ተቀዳጅተዋል፡፡ ከምሥራቅ አፍሪካ ኢትዮጵያና ታንዛኒያ ሽልማቶቹን ሲጋሩ ሔኖክና መሐሪ ብራዘርስ የወንዱን፣ ናንሲ (ዋን ዴይ በሚለው ሥራዋ) መሸለማቸው ተዘግቧል፡፡

የአፍሪማ ተሸላሚ ድምፃውያን