Skip to main content
x
ባህር ትራንስፖርትና ሎጂስቲክስ ንግድ ባንክ ያስቀመጠውን ከ100 ሚሊዮን ዶላር በላይ ማንቀሳቀስ አልቻልኩም አለ

ባህር ትራንስፖርትና ሎጂስቲክስ ንግድ ባንክ ያስቀመጠውን ከ100 ሚሊዮን ዶላር በላይ ማንቀሳቀስ አልቻልኩም አለ

የኢትዮጵያ ባህር ትራንስፖርትና ሎጂስቲክስ አገልግሎት በኢትዮጵያ ንግድ ባንክ ያስቀመጠውን ከ100 ሚሊዮን ዶላር በላይ ገንዘብ ማንቀሳቀስ አለመቻሉ፣ በሚሰጠው የሎጂስቲክስ አገልግሎት ላይ እንቅፋት እንደሆነበት አስታወቀ፡፡

የሎጂስቲክስ አገልግሎት ድርጅቱ ዋና ሥራ አስፈጻሚ አቶ ሮባ መገርሳ ከሪፖርተር ጋር ባደረጉት አጭር ቆይታ፣ የአገሪቱን ገቢ ጭነቶች በሚፈለገው መጠንና ደረጃ ተቋሙ እንዳያጓጉዝ የሚያደርግ ከፍተኛ የፋይናንስ ቀውስ እንደገጠመው አስረድተዋል፡፡

ወደ አገር የሚገቡና ኤክስፖርት የሚደረጉ ጭነቶችን ለማጓጓዝ ተቋሙ የሚያስከፍለው በውጭ ምንዛሪ መሆኑን የገለጹት ዋና ሥራ አስፈጻሚው፣ የውጭ ምንዛሪውንም በዋናነት በኢትዮጵያ ንግድ ባንክ በከፈተው ሒሳብ ውስጥ ተቀማጭ እንደሚያደርግ አስረድተዋል፡፡

በአሁኑ ወቅት በኢትዮጵያ ንግድ ባንክ ሒሳብ ውስጥ ከ100 ሚሊዮን ዶላር እንደሚገኝ፣ በሌሎች የአገሪቱ ንግድ ባንኮች በተከፈቱ የባንክ ሒሳቦች ያስቀመጠው ከ50 ሚሊዮን ዶላር እንደሚበልጥ ጠቁመዋል፡፡

‹‹በሌሎች ንግድ ባንኮች የተቀመጠውን የውጭ ምንዛሪ የማንቀሳቀስ ችግር አልገጠመንም፡፡ ዋናው ችግራችን በኢትዮጵያ ንግድ ባንክ የሚገኘውን የውጭ ምንዛሪ ሒሳብ ማንቀሳቀስ አለመቻላችን ነው፤›› ብለዋል፡፡

የባህር ትራንስፖርትና ሎጂስቲክስ አገልግሎት ሥራውን በአግባቡ ለመወጣት በዓመት 600 ሚሊዮን ዶላር እንደሚያወጣም አስታውቀዋል፡፡

በአሁኑ ወቅት በተለያዩ የባህር ወደቦች መከፈል የሚገባቸውን የወጪ ግዴታዎች በወቅቱ መፈጸም ባለመቻሉ፣ አንድ ቀን ባደረ ቁጥር የዋናውን ክፍያ መጠን እጥፍ ለመክፈል መገደዱንና ይህም በተቋሙ እንቅስቃሴ ላይ ጫና እንደፈጠረ ተናግረዋል፡፡

ጉዳዩን አስመልክቶ ከኢትዮጵያ ንግድ ባንክ አመራሮች ጋር መወያየታቸውን የገለጹት አቶ ሮባ፣ የዶላር እጥረት አገራዊ ችግር መሆኑን እንደሚረዱ ነገር ግን የተቋማቸውን እንቅስቃሴ እስከሚፈትን ድረስ መሄድ እንደሌለበት፣ ወይም ሌሎች አማራጭ መፍትሔዎች ሊቀመጡ እንደሚገባ ያምናሉ፡፡

‹‹መንግሥት ከጂቡቲ መንግሥት ጋር በመነጋገር የክሬዲት ክፍያ ሥርዓት ወይም ዋስትና በመስጠት ሊደግፈን ይገባል፤›› ሲሉ አማራጭ ሊሆን ይችላል ያሉትን ለአብነት አንስተዋል፡፡

አስመጪዎች ለሚያስመጡት ንብረት ክፍያና የማጓጓዣ ወጪያቸውን ለመክፈል በአገሪቱ ባንኮች ሌተር ኦፍ ክሬዲት (ኤልሲ) እንደሚከፍቱ ያስረዱት ዋና ሥራ አስፈጻሚው፣ ከዚህ ውስጥ ለማጓጓዣ የሚከፍሉትን በመቀነስ በባህር ትራንስፖርትና ሎጂስቲክስ አገልግሎት የውጭ ምንዛሪ ሒሳብ ውስጥ ማስገባት እንዳለባቸው ገልጸዋል፡፡

ይህ አሠራር አስገዳጅና ቅድሚያ እንዲሰጠው ለማድረግም የኢትዮጵያ ብሔራዊ ባንክ በ2002 ዓ.ም. ባወጣው መመርያ፣ ሁሉም የአገሪቱ ባንኮች ኤልሲ ሲከፍቱ ለትራንዚት ትራንስፖርት የሚያስፈልገውን ወጪ በአጓጓዡ የባንክ ሒሳብ ውስጥ እንዲያስቀምጡ መወሰኑን ገልጸዋል፡፡

‹‹ሌሎቹ ባንኮች ይህንን መመርያ አክብረው ስለሚሠሩ የውጭ ምንዛሪ ሒሳባችንን በፈለግነው ጊዜ እናንቀሳቅሳለን፡፡ የኢትዮጵያ ንግድ ባንክ ግን በዚሀ መመርያ መሠረት እየሠራ ባለመሆኑ ነው ችግር የገጠመን፤›› ብለዋል፡፡ በማከልም፣ ‹‹ንግድ ባንክ ለአስመጪዎች ኤልሲ ከከፈተ በኋላ ለትራንስፖርት ከከፈሉት ከአጠቃላዩ ሒሳብ ሰባት በመቶ የሚሆን ገንዘብ በውጭ ምንዛሪ በእኛ ሒሳብ ውስጥ አለማስቀመጡ ምን ማለት ነው? ይህንን ማድረግ ካልቻለ ደግሞ ጭራሹን ኤልሲ መክፈት ማቆም አለበት፤›› በማለት ይከራከራሉ፡፡

ጉዳዩን አስመልክቶ ያነጋገርናቸው የባንኩ ኮሚንኬሽን ስራ አስኪያጅ አቶ በልሁ ታከለ የተባለውን ችግር ለመፍታት ከባህር ትራንስፖርትና ሎጀስቲክስ አገልግሎት ድርጅት አመራሮች ጋር በመመካከር የጋራ የድርጊትመርሐግብር ተዘጋጅቶ አየተሠራ መሆኑን ገልጸዋል። በዚህ የድርጊት መርሐግብር በወጣው የጊዜ ሠሌዳ ለመክፈል ስምምነት የተደረሠበትን መጠን ያህል የውጭ ምንዛሬ ባንኩ ለተቋሙ አየለቀቀ መሆኑን ተናግረዋል ።