Skip to main content
x
በተቃውሞ ጉዳት የደረሰበት የቻይናው ኢንዱስትሪ ፓርክ ግንባታው መጀመሩ ተነገረ

በተቃውሞ ጉዳት የደረሰበት የቻይናው ኢንዱስትሪ ፓርክ ግንባታው መጀመሩ ተነገረ

  • የአካባቢው ነዋሪዎች አዲስ አበባ በመምጣት ይቅርታ ጠይቀዋል

በሰሜን ሸዋ ዞን አረርቲ ከተማ ጥቅምት 29 ቀን 2010 ዓ.ም. በቻይናው ሲሲሲሲ አማካይነት ሲገነባ የነበረውን የኢንዱስትሪ ፓርክ በደረሰበት መጠነኛ ጉዳት ግንባታው ተቋርጦ ቢቆይም ከሰሞኑ ሥራው መጀመሩ ተገለጸ፡፡

በአረርቲ ከተማ ለሁለት ሳምንት ተቋርጦ በቆየው የኤሌክትሪክ ኃይል መነሻነት የተቀሰቀሰው የአካባቢው ነዋሪዎች ተቋውሞ በኢንዱስትሪ ፓርኩ ላይ ጉዳት በማስከተሉ ግንባታውን እንዲቆም ማድረጉን፣ የኢትዮጵያ ኢንቨስትመንት ኮሚሽን ከአካባቢው ነዋሪዎች ጋር ባደረገው የዕርቅ ፕሮግራም ወቅት ተገልጿል፡፡ ዓርብ፣ ጥር 15 ቀን 2010 ዓ.ም. የኢንዱስትሪ ፓርኩ ኃላፊዎች በተገኙበት፣ የአረርቲ ከተማ ነዋሪዎችና የአገር ሽማግሌዎች ባቀረቡት ይቅርታ መሠረት የቻይናው ኩባንያ የጀመረውን ሥራ ለመቀጠል ተስማምቷል፡፡

ከአዲስ አበባ በስተምሥራቅ 140 ኪሎ ሜትር ርቀት ላይ በምትገኘው አረርቲ ከተማ ጥቅምት 29 ቀን 2010 ዓ.ም. በተቀሰቀሰው ተቋውሞ ሳቢያ፣ በኢንዱስትሪ ፓርኩ ውስጥ የነበረ ጀኔሬተር ላይ አደጋ የደረሰ ሲሆን፣ በፓርኩ ቅጥር ግቢ ውስጥ ለተለያዩ የግንባታ ሥራዎች እንዲውሉ ታስበው በኮንቴይነር ውስጥ የተቀመጡ ንብረቶችም ጉዳት እንደደረሰባቸው በዕርቅ ሥነ ሥርዓቱ ወቅት ተጠቅሷል፡፡

በቅድመ ግንባታ ሒደት ላይ የሚገኘው የቻይናው ኢንዱስትሪ ፓርክ፣ ሲጠናቀቅ በግንባታ ቁሳቁሶች፣ በቤት እንዲሁም በቢሮ ዕቃዎች ምርት ላይ እንደሚሠማራ ይጠበቃል፡፡ በአረርቲ ከተማ ከቻይናው ኢንዱስትሪ ፓርክ በተጨማሪ በጨርቃ ጨርቅና አልባሳት ላይ የሚሠማራ የኢንዱስትሪ ፓርክ ለመገንባት መታቀዱን የኢትዮጵያ ኢንቨስትመንት ኮሚሽን ኮሚሽነር አቶ ፍፁም አረጋ ገልጸዋል፡፡

ከጊዜ ወደ ጊዜ በተለያዩ የክልል ከተሞች እየተከሰተ ባለው ግጭት አማካይነት በኢንቨስተሮች ላይ እየተፈጠረ ያለው ሥጋት መንግሥት መተማመኛ እየሰጠ ይገኛል  ያሉት ኮሚሽነሩ፣ በዚህ ሳቢያ በግንባታ ላይ መዘግየት እንደሚታይ አልሸሸጉም፡፡

በመጀመርያው ምዕራፍ የግንባታ ሒደት በ100 ሚሊዮን ዶላር ወደ ሥራው የገባው የቻይናው ኢንዱስትሪ ፓርክ 100 ሔክታር መሬት ላይ እየተገነባ የሚገኝ ነው፡፡

የፓርኩን ግንባታ የሚያካሒደው ኩባንያ ዋና ሥራ አስኪያጅ የሆኑት ቺን ዩሻን፣ ከሕዝቡ ጋር ዕርቅ ማውረዱ ሥራውን ሙሉ በሙሉ አጠናቆ በተቀመጠለት ጊዜ ለማጠናቀቅ ያግዛል ብለዋል፡፡ የኢንዱስትሪ ፓርኩ ግንባታ ሲጠናቀቅ፣ በውስጡ ከሚገነቡት መካከል የሴራሚክ ፋብሪካ እንደተገነባ ዋና ሥራ አስኪያጁ አስረድተዋል፡፡ የመጀመሪያው ምዕራፍ የሴራሚክ ውጤቶች ማምረቻ ፋብሪካ አሥር ሚሊዮን ዶላር እንደፈጀ ከዚህ ቀደም መገለጹ ይታወሳል፡፡

ለተከሰተው ተቃውሞ መነሻው ለሁለት ሳምንታት የቆየው የመብራት መጥፋት ቢሆንም፣ በውይይቱ ወቅት ግን ሕዝቡ የመልካም አስተዳደር ችግሮች እንዳሉበት ያሳየ ፍንጭ እንደነበር አስተያየት ሰጪዎች ተናግረዋል፡፡

የአማራ ክልል ኮሙዩኒኬሽን ቢሮ ኃላፊ አቶ ንጉሡ ጥላሁን በበኩላቸው ‹‹በደረሰው ጉዳት አፍረናል፡፡ የከተከሰተውም ሁከት ሕዝቡን አይወክልም፤›› በማለት ተናግረዋል፡፡

ባለፈው ዓመት ግንባታውን የጀመረው የኢንዱስትሪ ፓርክ፣ ለአገር ውስጥ ገበያ የሚቀርቡ የግንባታ፣ የቤትና የቢሮ ዕቃዎችን እንደሚያቀርብ ተገልጿል፡፡ በተቃውሞ ምክንያት በኢንዱስትሪ ፓርኩ የግንባታ ንብረቶች ላይ የደረሰው ጉዳት በገንዘብ ምን ያህል እንደሚገመት ለማወቅ ጥያቄ ቀርቦ፣ ጥናት እየተደረገ እንደሚገኝ ከመግለጽ ውጭ የተባለ ነገር የለም፡፡