Skip to main content
x
የጋምቤላ ከተማ አስተዳደር ገቢዎች ጽሕፈት ቤት ተቃጠለ
የጋምቤላ ከተማ አስተዳደር ከንቲባ አቶ አከነ ኦፓዳ

የጋምቤላ ከተማ አስተዳደር ገቢዎች ጽሕፈት ቤት ተቃጠለ

  • የጋምቤላ ከተማ መምህራን ሥራ አቁመው ነበር

የጋምቤላ ከተማ አስተዳደር ገቢዎች ጽሕፈት ቤት ለጊዜው ባልታወቀ ምክንያት፣ ቅዳሜ ኅዳር 16 ቀን 2010 ዓ.ም. ለእሑድ አጥቢያ ከሌሊቱ ሰባት ሰዓት ላይ በተነሳ ቃጠሎ ወደመ፡፡

የክልሉ ፖሊስ የጠረጠራቸውን አሥር ሠራተኞች በቁጥጥር ሥር ማዋሉ ተገልጿል፡፡ የጋምቤላ ከተማ አስተዳደር ከንቲባ አቶ አከነ ኦፓዳ ለሪፖርተር እንደገለጹት በቃጠሎው ኮምፒዩተሮች፣ ሰነዶችና የቢሮ ዕቃዎች ወድመዋል፡፡ ከቃጠሎው ጋር በተገናኘ አሥር ተጠርጣሪዎች በቁጥጥር ሥር ውለው ቃላቸውን እየሰጡ ነው ብለዋል፡፡  

አቶ አከነ የቃጠሎው መንስዔ ምን እንደሆነ ፖሊስ እያጣራ መሆኑን፣ በዚህም ምክንያት ዝርዝር መረጃ ከመስጠት ተቆጥበዋል፡፡

በሌላ በኩል የጋምቤላ ከተማ አስተዳደር ከቅርብ ወራት ወዲህ በወጪውና  ገቢው መካከል መመጣጠን ባለመኖሩ፣ ለሠራተኞች ደመወዝ ለመክፈል እየተቸገረ መሆኑ እየተገለጸ ነው፡፡

‹‹የመስከረም ወር ደመወዝ የተከፈለው በኅዳር ወር ነው፡፡ የጥቅምት ወር ደመወዝ እስካሁን አልተከፈለም፤›› ሲሉ ስማቸውን መግለጽ ያልፈለጉ የከተማው አስተዳደር ሠራተኛ ለሪፖርተር ገልጸዋል፡፡

የጋምቤላ ከተማ አስተዳደር በአጠቃላይ 1,547 ሠራተኞች ሲኖሩት፣ ከእነዚህ ውስጥ 513 ያህሉ መምህራን ናቸው፡፡

መምህራኑ፣ ‹‹በአግባቡ ደመወዝ እየተከፈለን አይደለም፣ ለህዳሴ ግድብ የገዛነው ቦንድ ሰርተፊኬት አልተሰጠንም፣ የመኖሪያ ቤት መሥሪያ መሬት ሊሰጠን ይገባል፤›› በሚሉ ምክንያቶች ባለፈው ሳምንት ሥራ በማቆማቸው የመማር ማስተማር ሒደት ተስተጓጉሎ ነበር፡፡

አቶ አከነ እንደገለጹት፣ የከተማ አስተዳደሩ በወርኃዊ ገቢውና ወጪው መካከል ክፍተት አለ፡፡ ከመምህራኑ ጋር በዚህ ጉዳይ ላይ ሰኞ ኅዳር 18 ቀን 2010 ዓ.ም ምክክር መደረጉንና ችግሩ ጊዜያዊ በመሆኑ እንደሚቀረፍ ጠቁመዋል፡፡ ማክሰኞ ኅዳር 19 ቀን 2010 ዓ.ም. መምህራን በሥራ ገበታቸው ላይ መገኘታቸውን አቶ አከነ አስረድተዋል፡፡