Skip to main content
x
ፊፋ ለ22 ኢትዮጵያውያን ለኢንተርናሽናል ዳኝነት ዕውቅና ሰጠ

ፊፋ ለ22 ኢትዮጵያውያን ለኢንተርናሽናል ዳኝነት ዕውቅና ሰጠ

የዓለም አቀፍ እግር ኳስ ማኅበር (ፊፋ) ለ22 ኢትዮጵያውያን የእግር ኳስ ዳኞችና ረዳቶች የኢንተርናሽናል ዳኝነት ዕውቅና ሰጠ፡፡ በሌላ በኩል በመጪው ክረምት በሩሲያ አስተናጋጅነት የሚካሄደውን የ2018 የዓለም ዋንጫ እንዲዳኙ በዕጩነት ከተመረጡ ስድስት አፍሪካውያን አንዱ በመሆን የተመረጠው ባምላክ ተሰማ፣ በውድድር ዓመቱ በምርጥ ብቃታቸው ከታጩ የመጀመርያው በመሆን መመረጡ ታውቋል፡፡

ፊፋ ለኢትዮጵያ እግር ኳስ ፌዴሬሽን በላከው የዕውቅና ማረጋገጫ እንደገለጸው፣  በወንዶች ዋና ዳኝነትና በረዳት ዋና ዳኝነት ሰባት ሰባት በድምሩ 14፣ በሴቶች በዋና ዳኝነትና በረዳት ዋና ዳኝነት አራት አራት በድምሩ ስምንት፤ በአጠቃላይ ለ22 የእግር ኳስ ዋናና ረዳት ዋና ዳኞች የኢንተርናሽናል ዳኝነት ዕውቅና መስጠቱ ታውቋል፡፡

በዝርዝሩ መሠረት በዋና ዳኝነት ባምላክ ተሰማ፣ በላይ ታደሰ፣ ለሚ ብርሃኑ፣ አማኑኤል ኃይለየሱስ፣ ብሩክ የማነ፣ ዳዊት አሳምነውና ቴድሮስ ምትኩ ሲሆኑ፣ በረዳት ዋና ዳኝነት ደግሞ ትግልግዛው በላቸው፣ ክንዴ ሙሴ፣ ተመስገን ሳሙኤል፣ ክንፈ ይልማ፣ ኃይለ ራጉኤል ወልዳይ፣ በላቸው ይታየውና ሸወንግዛው ተባባል ናቸው፡፡

በሴቶች በዋና ዳኝነት ፀሐይነሽ አበበ፣ አስናቀች ገብሬ፣ ሊዲያ ታፈሰና ጌራወርቅ አያሌው ሲሆኑ፣ በዋና ረዳት ዳኝነት ወይንሸት ካሳዬ፣ ወጋየሁ ዘውዱ፣ ይልፋሸዋ አበራና አዜብ አያሌው መሆናቸው ታውቋል፡፡

በሌላ በኩል የአፍሪካ እግር ኳስ ኮንፌዴሬሽን (ካፍ) በባለቤትነት በሚመራቸው አህጉራዊ ውድድሮች በዳኝነት ምርጥ ብቃታቸውን ካሳዩ ስድስት አፍሪካውያን የእግር ኳስ ዳኞች ኢትዮጵያዊው ባምላክ ተሰማን የመጀመርያው አድርጎ መምረጡ ይፋ አድርጓል፡፡

በወጣው ዝርዝር መሠረትም የ2018ቱ የዓለም ዋንጫ ዕጩ የእግር ኳስ ዳኛ ባምላክ ተሰማ ከኢትዮጵያ አንደኛ፣ ግሒድ ግርሻ ከግብፅ ሁለተኛ፣ ጃኒ ሲክዜዌይ ከዛምቢያ ሦስተኛ፣ ማላጋ ዳይድሂው ከሴኔጋል አራተኛ፣ ሜሒድ አብዴቻሪፍ ከአልጄሪያ አምስተኛና ፓፓ ባካሪ ጊሰማ ከጋምቢያ በስድስተኛ ደረጃ የተመረጡ የእግር ኳስ ዳኞች መሆናቸው ታውቋል፡፡