Skip to main content
x
የዕድገት በኅብረት 43ኛ ዓመት

የዕድገት በኅብረት 43ኛ ዓመት

የኢትዮጵያ ንጉሠ ነገሥት መንግሥት የመጨረሻው ንጉሠ ነገሥት ቀዳማዊ ኃይለ ሥላሴ (1923- 1967) መስከረም 2 ቀን 1967 ዓ.ም. ከሥልጣን ከወረዱ በኋላ መንበሩን የተቆጣጠረው ጊዜያዊ ወታደራዊ አስተዳደር ደርግ፣ በአራተኛው ወሩ ታኅሣሥ 11 ቀን ‹‹የኢትዮጵያን ሶሻሊዝም›› - ኅብረተሰብአዊት ኢትዮጵያ በማለት አወጀ፤ በርሱም ሳይወሰን መንግሥታዊ መጠርያውንም ‹‹የኅብረተሰብአዊት ኢትዮጵያ ጊዜያዊ ወታደራዊ አስተዳደር መንግሥት›› በማለት ሰይሞ የኢትዮጵያ ሕዝባዊ ዲሞክራሲያዊ ሪፐብሊክ (ኢሕዲሪ) እስከተመሠረተበት እስከ መስከረም 1 ቀን 1980 ዓ.ም. ድረስ ይጠራበት ነበር፡፡ የኢትዮጵያን ሶሻሊዝም ባወጀ በማግስቱ ታኅሣሥ 12 ቀን የሁለተኛ ደረጃ ተማሪዎች ከ10ኛ ክፍል በላይ፣ የኮሌጅና የዩኒቨርሲቲ ተማሪዎችን ከነመምህሮቻቸው በ60 ሺሕ የሚቆጠሩ በሁሉም የአገሪቱ አካባቢዎች ክተቱ ያለበትን ‹‹የዕድገት በኅብረት የዕውቀትና የሥራ ዘመቻ›› ተግባራዊ አደረገ፡፡ በአዲስ አበባም የሠልፍ ትርዒት ከጃንሜዳ በመነሣት ተደረገ፡፡ ‹‹በዕድገት በኅብረት እንዝመት ወንድና ሴት ሳንል ባንድነት›› በሚል ዜማ በታጀበውና እስከ 1968 ዓ.ም. በዘለቀው አገራዊ ዘመቻ ሕይወታቸውን ያጡ ቁጥር ጥቂት አይደለም፡፡ ከ43 ዓመታት በበፊት የነበረውን ዘመቻ ከሚያስታውሱት ፎቶዎች ጥቂቶቹ ከዘመቻው ዓርማ ጋር እዚህ ላይ ይታያሉ፡፡ ዘመቻውን ከሚያሳዩት ፎቶዎች በተጨማሪ የወቅቱ ሦስቱ ቁንጮ መሪዎች የደርጉ ሊቀመንበርና ርእሰ ብሔር ብርጋዲየር ጄኔራል ተፈሪ በንቲ (ከመሃል)፣ ተቀዳሚ ምክትል ሊቀመንበር ሻለቃ (በኋላ ሌተና ኮሎኔል) መንግሥቱ ኃይለ ማርያም (በግራ) እና ምክትል ሊቀመንበር ሌተና ኮሎኔል አጥናፉ አባተም በምስሉ ተጠቃሾች ናቸው፡፡

  • ሔኖክ መደብር

የዕድገት በኅብረት 43ኛ ዓመት