Skip to main content
x
ክቡር ሚኒስትሩ አማካሪያቸውን ቢሮ ያስጠሩታል

ክቡር ሚኒስትሩ አማካሪያቸውን ቢሮ ያስጠሩታል

  • ሰውዬ ምን እየሠራህ ነው?
  • ምን አጠፋሁ ክቡር ማኒስትር?
  • ትናንትና የሰጠሁን ሥራ ምን አደረግከው?
  • እየሠራሁት ነው ክቡር ሚኒስትር፡፡
  • ባለፈው ሥራ ያልኩህስ ሪፖርት?
  • አልደረስዎትም እንዴ ክቡር ሚኒስትር?
  • ይኼ ነው ሪፖርቱ?
  • ምነው ክቡር ሚኒስትር?
  • እየቀለድክ መሆን አለበት?
  • ለምን እቀልዳለሁ ክቡር ሚኒስትር?
  • ካልቀለድክማ ይኼን ሪፖርት ብለህ ማቅረብ አልነበረብህም፡፡
  • እንዴት ክቡር ሚኒስትር?
  • ከዚህ በፊት የምታቀርባቸውን ሪፖርቶች አውቃቸዋለሁ፡፡
  • ታዲያ ይኼኛው ምን ሆነ?
  • ምን ተገኝቶ ነው እንደዚህ ዓይነት የወረደ ሪፖርት የምታቀርበው?
  • ሪፖርቱን አልወደዱትም ማለት ነው?
  • ይኼን ሪፖርት ብለህ ስታቀርብ ራስህ አትፍርም?
  • ምን ያሳፍራል?
  • ይኼ አሁን ለፓርላማ የሚቀርብ ሪፖርት ነው?
  • ሌሎች ለፓርላማ የሚያቀርቡትን ሪፖርት አናውቅም እንዴ?
  • ምን እያልክ ነው?
  • የፓርላማ አባላት እጃቸው እስኪቀላ ያጨበጨቡለት ሪፖርት ውሸት ሆኖ ሲገኝ እናውቃለን አይደል እንዴ?
  • ስለእነሱ ሪፖርት ማን ጠየቀህ?
  • አይ ያው ነገሩን ስላነሱት ነው፡፡
  • ትኩረት ሰጥተህ እንድትሠራው አይደል እንዴ የነገርኩህ?
  • ለነገሩ ይኼኛው ትንሽ ወረድ ያለ እንደሆነ ይገባኛል፡፡
  • ስለዚህ ሆን ብለህ ነዋ የሠራኸው?
  • እ…
  • ለመሆኑ የትምህርት ደረጃህ ምንድው?
  • ሁለተኛ ዲግሪዬን ይዣለሁ፡፡
  • ለዚያውም በማዕረግ ነው የተመረቅኩት ብለኸኛል?
  • እሱማ ልክ ነው፡፡
  • መመረቂያ ጽሑፍህ ራሱ ስንቶችን ያስተምራል ሲባል አልነበር እንዴ?
  • እውነት ነው፡፡
  • ከዚህ በፊት በሠራሃቸው ሪፖርቶች እኔ ራሴ ሹመት አግኝቻለሁ አይደል እንዴ?
  • አልተሳሳቱም ክቡር ሚኒስትር፡፡
  • ታዲያ ይኼን ምን ብዬ ነው ሪፖርት ብዬ የምቀበለው?
  • አይ ክቡር ሚኒስትር እኔም እኮ ስለሚያምረኝ ነው?
  • ምንድነው የሚያምርህ?
  • ሥልጣን፣ የደረጃ ዕድገትና ሹመት፡፡
  • የምር እነዚህን ነገሮች ትፈልጋቸዋለህ?
  • በሚገባ እንጂ ክቡር ሚኒስትር፡፡
  • ታዲያ ሥራህን ለምን በአግባቡ አትሠራም?
  • ኪኪኪ…
  • ምን ያስገለፍጥሃል?
  • ሹመት ለማግኘት ሥራዬን በአግባቡ መሥራት አይጠበቅብኝም፡፡
  • እንዴት?
  • የመንግሥታችንን ባህል ስናውቀው ብቃት አያሾምም፡፡
  • ታዲያ ምንድነው የሚያሾመው?
  • ለፓርቲው ታማኝ መሆን፡፡
  • ሌላስ?
  • ሌሎች በርካታ ምክንያቶች አሉ፡፡
  • ምን እያልክ ነው ታዲያ?
  • እኔ አሁን ሹመት አምሮኛል፡፡
  • ምን ልታደርግ ነው ታዲያ?
  • አንድ ነገር ብቻ፡፡
  • እኮ ምን?
  • መስነፍ!

[ክቡር ሚኒስትሩ በወቅታዊ ጉዳዮች ላይ ሕዝባዊ ስብሰባ እየመሩ ነው፡፡ ክቡር ሚኒስትሩ ለሁለት ሰዓታት ያለማቋረጥ ሲያወሩ አንድ ተሳታፊ በንዴት እጁን አወጣ]

  • አንዴ ክቡር ሚኒስትር?
  • አልጨረስኩም እኮ?
  • ከዚህ በላይ እርስዎን መስማት አንችልም፡፡
  • ምንድነው?
  • የእርስዎ ዲስኩር አሁን መቆም አለበት፡፡
  • ምን እያልክ ነው?
  • ነስር ነስር አለን እኮ ክቡር ሚኒስትር፡፡
  • ቆይ ቆይ ቆይ ቆይ በአገር ጉዳይ እየመከርን አይደል እንዴ?
  • እየመከርን ሳይሆን እየመከሩን ነው እርስዎ፡፡
  • ዋናው ዓላማ መመካከር አይደል እንዴ?
  • እንደዚያ ከሆነ መመካከር ነው ያለብን፡፡
  • እኮ እንመካከራ?
  • ስለዚህ እኔ እርስዎን ልምከርዎት፡፡
  • አንተን የመሰለ አንድ ፍሬ ልጅ ምንድነው የምትመክረኝ?
  • ይኼ ችግራችሁ ነው እኮ ብዙ ነገር እየፈጠረ ያለው፡፡
  • ምን እያልክ ነው?
  • ከቅድም ጀምሮ ሕዝቡ ላይ ጣትዎን እየቀሰሩ ነው፡፡
  • ታዲያ ችግሩ በሕዝቡ ነዋ የመጣው፡፡
  • አይሳሳቱ ክቡር ሚኒስትር፡፡
  • እንዴት?
  • አንድ ጣትዎን ሕዝብ ላይ ሲቀስሩ ሦስቱ ራስዎት ላይ ነው የሚጠቁሙት፡፡
  • እ…
  • ስለዚህ ሕዝቡን ፀረ ሰላም፣ ፀረ ልማት፣ ኪራይ ሰብሳቢ እያላችሁ አታደንቁሩት፡፡
  • እንዴት?
  • በእርግጥ ኪራይ ሰብሳቢው ማን ነው?
  • እ…
  • ገበሬው ነው ወይስ እርስዎ?
  • ብንከባበር ጥሩ ነው፡፡
  • ይኼ የመከባበሪያ መድረክ ሳይሆን የመመካከሪያ መድረክ ነው፡፡
  • ስለዚህ ከአጀንዳው ወጥተህ እንድትናገር አልፈቅድልህም፡፡
  • እኔ እርስዎ የሚፈልጉትን ነገር ብቻ አላወራልዎትም፡፡
  • እ…
  • የሚሰማኝንና እውነቱን ነው የምናገረው፡፡
  • እውነቱ ምንድነው?
  • እውነቱማ አገሪቱ ላለችበት ችግር ተጠያቂው አመራሩ መሆኑ ነው፡፡
  • ምን?
  • ክቡር ሚኒስትር ያጠፋ መሪ የሚሾምበት ብቸኛ አገር የት እንደሆነ ያውቃሉ?
  • አላውቅም፡፡
  • ኢትዮጵያ ብቻ ናት፡፡
  • እኔ ጠፋሁ?
  • ለነገሩ አሁን የምንታወቅባቸው ነገሮች እየበዙ ነው፡፡
  • እንዴት ማለት?
  • በፊት ቀይ ቀበሮና ዋልያ የመሳሰሉ አራዊት የሚገኙባት ብቸኛ አገር ኢትዮጵያ ነበረች፡፡
  • አሁንስ?
  • አሁንማ መቶ ፐርሰንት ምርጫ ማሸነፍ የሚቻልባት አገር በመሆን እየታወቀች ነው፡፡
  • አንተ ፀረ ሰላም መሆንህን አውቄያለሁ፡፡
  • ክቡር ሚኒስትር ይኼ ጣት መቀሰር መቆም አለበት፡፡
  • ታዲያ መንግሥትን ስትተች ምን ልበልህ?
  • እናንተ እኮ ለሕዝቡ ከእኛ በላይ የሚያውቅልህ የለም እያላችሁ ነው?
  • ድሮስ ማን ያውቅለታል?
  • ለዚህ ነው አገሪቷ እንደዚህ እየታመሰች ያለችው?
  • ፀረ ሕዝብ ኃይሎች ናቸዋ፡፡
  • ክቡር ሚኒስትር ወደ ሌላ ጣትዎን አይቀስሩ?
  • ታዲያ መንግሥት ሲተች ቁጭ ብዬ ላዳምጥ?
  • ዋናው ችግራችሁ እሱ ነው፡፡
  • ምንድን?
  • አለማዳመጥ!

[ክቡር ሚኒስትሩ የፓርቲ ስብሰባ ተጠርተው እየተወቀሱ ነው]

  • ክቡር ሚኒስትር በጣም አደገኛ አካሄድ እየሄዱ ነው፡፡
  • ምን ማለት ነው አደገኛ አካሄድ?
  • እኛ በዝግ የምናደርገውን ስብሰባ እየወጡ ለሚዲያ የሚሰጡ እርስዎ መሆኑን ደርሰንበታል፡፡
  • ማን? እኔ?
  • አዎን እርስዎ፡፡
  • እኔ ከሚዲያ ጋር?
  • አዎን ክቡር ሚኒስትር፡፡
  • በጣም ተሳስታችኋል፡፡
  • እንዴት?
  • እንዲያውም ከሁላችሁም ይልቅ ከሚዲያ ጋር ፀበኛና ጦረኛ እኔ ነኝ፡፡
  • መረጃውና ማስረጃው የሚለው ግን ሌላ ነው፡፡
  • ምን እያላችሁ ነው?
  • እዚህ የምንነጋገረውን ነገር እየወጡ የሚያወሩት እርስዎ ነዎት፡፡
  • እኔ ይኼን አልቀበልም፡፡
  • ለማንኛውም በእርስዎ ምክንያት አገሪቷ እየታመሰች ናት፡፡
  • በምንድነው እኔ አገሪቷን የማምሰው?
  • ገና ስብሰባ ስንጀምር ሕዝቡ በአጀንዳችን ላይ ሠልፍ ይወጣል፡፡
  • ታዲያ እኔ ምን ላድርግ?
  • ይባስ ብሎ የስብሰባው አጀንዳ ስብሰባው ሳይጠናቀቅ በተለያዩ ድረ ገጾችና ሶሻል ሚዲያ ላይ ይወጣል፡፡
  • እኔ ስለምትሉት ነገር የማውቀው ነገር የለም፡፡
  • ክቡር ሚኒስትር እንደዚህ አይበሉ፡፡
  • የምን ድረ ገጽ ነው የምታወሩት?
  • ክቡር ሚኒስትር በእርስዎ ምክንያት ነው ስብሰባው ውስጥ ስልክ እንዳይገባ የተደረገው፡፡
  • እንደዚያ የወሰናችሁት በእኔ ምክንያት መሆኑን አላውቅም ነበር፡፡
  • በወቅቱ ምክንያቱን መግለጽ አላስፈለገም ነበር፡፡
  • ምን አድርግ ነው ታዲያ የምትሉኝ?
  • አሁን ይኼ ጉዳይ የፓርቲው ህልውና ላይ አደጋ እየጋረጠ ነው፡፡
  • ወይ ጣጣ?
  • በእርስዎ ላይ ወደፊት ዕርምጃ መውሰዳችን አይቀርም፡፡
  • በእኔ ላይማ ማንም ዕርምጃ መወሰድ የለበትም፡፡
  • ክቡር ሚኒስትር የሚያደርጉት ነገር ከፓርቲያችን ባህል ውጪ በመሆኑ ዕርምጃ ይወሰድብዎታል፡፡
  • እኔ በዚህ አልስማማም፡፡
  • ክቡር ሚኒስትር ከፓርቲው ባህል እያፈነገጡ ነው፡፡
  • እኔ ፓርቲዬን የምወድና አንገቴን የምሰጥ ነኝ፡፡
  • ለማንኛውም አሁን ራስዎን እንዲያሞካሹ አይደለም የተጠሩት፡፡
  • ምን ላድርግ ታዲያ?
  • የቀጣይ ስብሰባችን ቦታ ይቀየራል፡፡
  • የት ሊሆን?
  • ለራሳችን ደኅንነት ሲባል ኤሌክትሮኒክስ የማይገባበት ቦታ ስብሰባችን ይካሄዳል፡፡
  • የት ሊደረግ?
  • እንትን እየወሰድን ነው የምናደርገው?
  • ምን?
  • ስቲም ባዝ!

[ክቡር ሚኒስትሩ ቢሮ የውጭ ኢንቨስተሮች ይመጣሉ]

  • በጣም በአጭር ቆይታ ስለተገናኘን እናመሰግናለን፡፡
  • ምን ችግር አለው?
  • ያው የአንድ አገር ሚኒስትር ማግኘት ከባድ ነው ብለን ነው፡፡
  • ለእናንተ በራችን ሁሌም ክፍት ነው፡፡
  • እዚህ አገር ከፍተኛ መዋዕለ ንዋይ ለማፍሰስ ነው የመጣነው፡፡
  • እኔም በጣም ላበረታታችሁ እፈልጋለሁ፡፡
  • እንዴት ክቡር ሚኒስትር?
  • ላለፉት አሥርት ዓመታት በላይ አገሪቷ በሁለት አኃዝ እያደገች ነው፡፡
  • እሱንማ ሰምተናል ክቡር ሚኒስትር፡፡
  • ስለዕድገታችን ዓለም ሁሉ መስክሮልናል፡፡
  • እኛም ለዕድገቱ ተጨማሪ አስተዋጽኦ እናደርጋለን ብለን እናስባለን፡፡
  • በዚያ ላይ አገሪቱ ከሙስና የፀዳ ሥርዓት ያላት ናት፡፡
  • እ…
  • ስለዚህ አካውንተቢሊቲና ኢንተግሪቲ ያለበት ገበያ ውስጥ ነው የምትገቡት፡፡
  • እንግዲህ ይኼን ወደፊት የምናየው ነው የሚሆነው፡፡
  • አሁን ምን ትፈልጋላችሁ?
  • ለፕሮጀክታችን ሰፊ መሬት እንፈልጋለን፡፡
  • መሬት እንኳን እንዲህ በቀላሉ አይገኝም፡፡
  • ለምን እንደምንፈልገው በፕሮፖዛላችን ተገልጿል እኮ?
  • ለመሬት ፕሮፖዛል ብቻ አይበቃም፡፡
  • ሌላ ምን ያስፈልጋል?
  • ኮሚሽን፡፡
  • እንዴ ክቡር ሚኒስትር?
  • ምነው?
  • እኛ እኮ ኢንቨስት ልናደርግ ነው የመጣነው?
  • ለእኔ እናንተ ከኢንቨስተር በላይ ናችሁ፡፡
  • ሌላ ምን?
  • ለገና ስጦታ የሚሰጠው ነዋ፡፡
  • አልገባንም፡፡
  • የገና አባት!