Skip to main content
x
ዶ/ር መረራ ጉዲና ዓቃቤ ሕግ ላቅርብ ባለው ተጨማሪ ማስረጃ ላይ ያቀረቡት አቤቱታ ውድቅ ተደረገ
ዶ/ር መረራ ጉዲና

ዶ/ር መረራ ጉዲና ዓቃቤ ሕግ ላቅርብ ባለው ተጨማሪ ማስረጃ ላይ ያቀረቡት አቤቱታ ውድቅ ተደረገ

ዶ/ር መረራ ጉዲና የፌዴራል ጠቅላይ ዓቃቤ ሕግ ካሰማቸው የደረጃ ምስክሮች በተጨማሪ የኦዲዮ፣ የቪዲዮና የፎቶግራፍ ማስረጃዎችን እንዲያቀርብ ለፍርድ ቤት ያቀረበውን ጥያቄ በመቃወም አቤቱታ ያቀረቡ ቢሆንም፣ ፍርድ ቤት ውድቅ አደረገው፡፡

ዓቃቤ ሕግ ክሱን ሲመሠርት በዶ/ር መረራ ላይ በማስረጃነት እንደሚያቀርብ  በማስረጃ ዝርዝሩ በተራ ቁጥር አምስት ላይ መግለጹን በማስታወስ ያዘጋጃቸውን ኦዲዮ፣ ቪዲዮና ፎቶግራፎችን እንዲያቀርብ ፍርድ ቤቱን ጠይቆ ነበር፡፡

ዶ/ር መረራ ደግሞ በጠቆቻቸው አማካይነት ባቀረቡት ተቃውሞ ዓቃቤ ሕግ ማስረጃዎቹን ማቅረብ ያለበት እያረፈ ሳይሆን ክሱን እንዳቃረበ መሆኑን ገልጸው፣ የደረጃ ምስክሮቹን አሰምቶ ከጨረሰና ፍርድ ቤቱም ብይን ለመስጠት በምርመራ ላይ እያለ ተጨማሪ ማስረጃ እንዲያቀርብ ጥያቄ ማንሳቱ ተገቢ ያልሆነና የሕግ ድጋፍም የሌለው መሆኑን አስረድተዋል፡፡ የደንበኛቸውን (የዶ/ር መረራን) ሕገ መንግሥታዊ ጥበቃ ያለው ነፃ ሆነው የመገመት መብታቸውንም የሚጎዳ ነው ብለዋል፡፡

በሌላ በኩል በልዩ ድንጋጌ በፀረ ሽብርተኝነት አዋጁ የተፈቀደ የማስረጃ አቀራረብ መሆኑን በመጠቆም ዶ/ር መረራ ግን የሽብር ተግባር ወንጀል ተከሳሽ ባለመሆናቸው፣ ተጨማሪ ማስረጃው ሊቀርብ እንደማይችል አስረድተው ነበር፡፡ ዓቃቤ ሕግ በሰጠው ምላሽ ላቅርብ ያለው ማስረጃ አዲስ ሳይሆን ክስ ሲመሠርት በማስረጃ ዝርዝር ውስጥ በተራ ቁጥር አምስት ጠቅሶ ማቅረቡን በመጠቆም፣ ተከሳሹ ያቀረቡት ታቃውሞ አግባብ አለመሆኑን በመግለጽ ተቃውሞው ውድቅ እንዲደረግ ጠይቋል፡፡

ፍርድ ቤቱም የሁለቱን ወገኖች ክርክር ከተገቢው ሕግ ጋር መመርመሩን ገልጾ፣ ዶ/ር መረራ ያነሱዋቸው ተቃውሞዎች የሕግ ድጋፍ እንደሌላቸው በመግለጽ እንዳልተቀበላቸው አስታውቋል፡፡ ፍርድ ቤቱ የዶ/ር መረራ ጠበቆች በተለይ ዶ/ር ያዕቆብ ኃይለ ማርያም በማረሚያ ቤት ተገኝተው ዶ/ር መረራን እንዳያነጋግሯቸው መከልከላቸውን በተመለከተ ትዕዛዝ ሰጥቷል፡፡ በሕገ መንግሥቱ አንቀጽ 19(5) መሠረት ማንኛውም ተከሳሽ በሕግ ባለሙያ መወከል እንደሚችል መደንገኑን በመግለጽ፣ ማረሚያ ቤቱ ባለው የመጠየቂያ ጊዜ እንዲፈቅድ ብሏል፡፡ ራሳቸው ጠበቆቹ ትዕዛዙን ወስደው እንዲሰጡ፣ የማይቀበሏቸውን ከሆነ ለፍርድ ቤቱ ሲያመለክቱ ተገቢውን ዕምርጃ እንደሚወሰድ ገልጿል፡፡

ማረሚያ ቤቱ ግን ተጠይቆ በሰጠው ምላሽ ዶ/ር መረራ እንዲጠይቋቸው የሚፈልጓቸውን ሰዎች ማስመዝገባቸውን ጠቁሟል፡፡ ባስመዘገቡት መሠረት እየጠየቋቸው መሆኑንና የተከለከለ ሰው እንደሌለ ማስታወቁን ፍርድ ቤቱ አስታውቋል፡፡

ዶ/ር መረራ የሚናገሩት እንዳላቸው ፍርድ ቤቱን አስፈቅደው፣ እሳቸው የተከሰሱት መንግሥት አሥር ቢሊዮን ብር በጀት ይዞ ድንጋይ የሚወረውረውን ወጣት እንዳይወረውር እያደረገ ስላለው ሁኔታ የአገር ሽማግሌዎችን ሰብስቦ ሕዝቡን ይቅርታ እየጠየቀ ስላለበት ሁኔታ በመናገራቸው መሆኑን ጠቁመው፣ ፍርድ ቤቱ ምን ሊወስንባቸው እንደሚችል ጠይቀዋል፡፡ ፍርድ ቤቱም በሰጠው ምላሽ ሁሉም ነገር ግልጽ በሆነ ችሎት ክሱን እያየ መሆኑን አስረድቶ፣ የውሳኔውን ሁኔታ በሒደት የሚያየው መሆኑን አስረድቷል፡፡

የዶ/ር መረራ ጠበቆች ዓቃቤ ሕግ የሚያሰማውና የሚያሳየው የኦዲዮ፣ የቪዲዮና ፎቶግራፍ ማስረጃ እንዲሰጣቸው ሲጠይቁ ዓቃቤ ሕግ ተቃውሟል፡፡ በማስረጃው ሌላ ወንጀል ሊሠራ ስለሚችል በችሎት ከሚቀርብ በስተቀር ሊሰጣቸው እንደማይገባም አክሏል፡፡ ፍርድ ቤቱ ብይን ለመስጠት ለታኅሳስ 23 ቀን 2010 ዓ.ም. ቀጠሮ ሰጥቷል፡፡ ተጨማሪ የዓቃቤ ሕግ ማስረጃ ለመስማት ለታኅሳስ 25 ቀን 2010 ዓ.ም. ቀጠሮ ሰጥቷል፡፡