Skip to main content
x
በነዳጅ ችርቻሮ ንግድ ላይ ለመሰማራት አራት ኩባንያዎች ፈቃድ ወሰዱ

በነዳጅ ችርቻሮ ንግድ ላይ ለመሰማራት አራት ኩባንያዎች ፈቃድ ወሰዱ

በአገሪቱ የነዳጅ ችርቻሮ ንግድ ላይ የሚሰማሩ ኩባንያዎችን ቁጥር ወደ 22 የሚያሳድጉ አራት አዳዲስ አገር በቀል የነዳጅ ኩባንያዎች፣ ወደ ገበያ ሊያስገባቸው የሚችል ፈቃድ መውሰዳቸው ተገለጸ፡፡ በተመሳሳይ ሥራ ለመሰማራት የሚፈልጉ ሌሎች ኩባንያዎች ጥያቄ እያቀረቡ ነው፡፡

ከኢትዮጵያ ነዳጅ አቅራቢ ድርጅት የተገኘው መረጃ እንደሚያመለክተው፣ በነዳጅና ተያያዥ ሥራዎች ለመሰማራት ፈቃድ የወሰዱት አራቱ አዲስ ኩባንያዎች ሐበሻ፣ ካሉብ፣ ካርናል እና ሃላይ የሚባል ስያሜ አላቸው፡፡

የእነዚህ አራት የነዳጅ ኩባንያዎች ወደ ገበያ መግባት በነዳጅ ዕደላና ተያያዥ ሥራዎች ላይ የሚንቀሳቀሱ ኩባንያዎችን ቁጥር 22 የሚያደርሰው ሲሆን፣ በዚህ ዘርፍ የሚንቀሳቀሱ አገር በቀል ኩባንያዎችን ቁጥርም ከፍ ያርገዋል፡፡

ከኢትዮጵያ ነዳጅ አቅራቢ ድርጅት ዕውቅና የወሰዱት አራቱም አዳዲስ ኩባንያዎች አገር በቀል ናቸው፡፡ ከ22 ኩባንያዎች ውስጥ ከአራቱ በቀር 18 የአገር ውስጥ ኩባንያዎች መሆናቸውን ለማወቅ ተችሏል፡፡ ከነዳጅ አቅራቢ ድርጅት የተገኘው መረጃ እንደሚያመለክተው፣ ሌሎች በተመሳሳይ ሥራ ለመሰማራት ፍላጎት ያላቸው ኩባንያዎች እያመላከቱ በመሆኑ በዘርፉ የሚሰማሩ ኩባንያዎች ቁጥራቸው ይጨምራል፡፡

እንደ ኢትዮጵያ ነዳጅ አቅራቢ ድርጅት መረጃ በአሁኑ ወቅት በሥራ ላይ የሚገኙት 18 የነዳጅ ኩባንያዎች በጥቅሉ በመላ አገሪቱ ከ820 በላይ የነዳጅ ማደያዎች ያላቸው ሲሆን፣ የአዳዲሶቹ ኩባንያዎች ወደ ሥራ መግባትም የነዳጅ ማደያ ጣቢያዎችን ቁጥር ከፍ ያደርገዋል ተብሎ ይጠበቃል፡፡

እነዚህ የነዳጅ ኩባንያዎች ከነዳጅ ዕደላ በተጨማሪ የተለያዩ የተሽከርካሪ ቅባቶችንና ዘይት የሚያከፋፍሉ ሲሆን፣ ለመንገድ ግንባታ ሥራ የሚውል አስፋልት የማስመጣት ፈቃድ ማግኘት የሚችሉ ናቸው፡፡ አራቱን አዳዲስ ኩባንያዎች ሳይጨምር እስካሁን በገበያው ውስጥ ያሉት የነዳጅ ድርጅቶች፣ ኖክ፣ የተባበሩት ፔትሮሊየም፣ ኮቢል፣ ኦይል ሊቢያ፣ ዋዲ፣ ታፍ ኦይል፣ ቶታል ኢትዮጵያ፣ ዳሎል፣ ኦልዌይስ፣ ጎመጁ፣ የሺ፣ ብሌን፣ ገነት፣ ዛጎል፣ ኤርታሌ፣ ሙለጌና ተባረክ ተጠቃሽ ናቸው፡፡