Skip to main content
x
የአማራና የትግራይ ክለቦች በአዲስ አበባ እንዲጫወቱ ተወሰነ

የአማራና የትግራይ ክለቦች በአዲስ አበባ እንዲጫወቱ ተወሰነ

እግር ኳስ አሁን ላይ ከመዝናኛነት ባሻገር አዋጪ የኢንቨስትመንት ዘርፍ ከሆነ ውሎ አድሯል፡፡ በዚህ ብቻም ሳይወሰን ከተለያዩ የዓለም ክፍሎች የተወጣጡ የሰው ልጆች በአንድ መድረክ ተገናኝተው ቋንቋ፣ ዘርና ሃይማኖት ሳይወስናቸው መግባባት የሚችሉበትም መድረክ ከሆነ ዓመታት ተቆጥረዋል፡፡

ኢትዮጵያ ለአፍሪካ እግር ኳስ እዚህ ደረጃ መድረስ ትልቁን ድርሻ ከተወጡት በጣት ከሚቆጠሩ አገሮች አንዷና የመጀመርያ ብትሆንም፣ የእግር ኳሷ ዕድገትና የብቃት ደረጃ ግን የዕድሜውንና የአርአያነቷን ያህል ተጠቃሽ ሊሆን አልቻለም፡፡ ይባስ ብሎ ‹‹በእንቅርት ላይ ጆሮ ደግፍ›› እንዲሉ ውድቀቱ ሳያንስ፣ አሁን አሁን ለዜጎች መራራቅና መለያየት ምክንያት እየሆነ ይገኛል፡፡

መደበኛ የውድድር መርሐ ግብሮች በታቀደላቸው ቀንና ሰዓት እንዲሁም ቦታ ማከናወን የተሳነው የኢትዮጵያ እግር ኳስ ፌዴሬሽን፣ በዚሁ ውዝግብ ምክንያት ውድድሮችን በአዲስ አበባ ስታዲየም ለማድረግ ተገዷል፡፡ አራቱ የአማራና የትግራይ ክለቦች ማለትም ፋሲል ከተማ፣ ወልድያ ከተማ፣ ወልዋሎ አዲግራትና የመቐለ ከተማ ቡድኖች ቀሪ የአንደኛ ዙር ጨዋታዎችን በአዲስ አበባ ስታዲየም እንዲጫወቱ ተወስኗል፡፡

የፌዴሬሽኑ የውድድር ዳይሬክተር አቶ ሰለሞን ገብረ ሥላሴ እንደሚናገሩት ከሆነ፣ ወልዋሎ አዲግራት ዩኒቨርሲቲ ከወልድያ ከተማ በ30/04/2010 ዓ.ም.፣ ወልድያ ከተማ ከመቐለ ከተማ በ09/05/2010 ዓ.ም. በዚሁ በአዲስ አበባ ስታዲየም እንዲጫወቱ ተወስኗል፡፡ ፋሲክ ከተማና መለ ከተማ በ05/05/2010 ዓ.ም. በተመሳሳይ በአዲስ አበባ ስታዲየም እንዲጫወቱ ይደረጋል ተብሏል፡፡

የሁለቱ ክልል ክለቦች በውድድር ዓመቱ መጀመርያ አዲግራት ላይ ወልዋሎ አዲግራት ዩኒቨርሲቲና ፋሲል ክተማ ጨዋታው እየተከናወነ ባለበት ሰዓት፣ እንዲሁም ወልድያ ላይ ወልድያ ከተማና መለ ከተማ ደግሞ ጨዋታው ሳይጀመር በተፈጠረ ውዝግብ ሁከትና ብጥብጥ መፈጠሩ አይዘነጋም፡፡