Skip to main content
x
የአቫንዛ ታክሲ ደንበኞች በዳሸን ባንክ የካርድ ክፍያ መጠቀም ጀመሩ
የዳሸን ባንክ ኃላፊዎችና የአቫንዛ ታክሲ ባለንብረቶች ስለ ኢ-ታክሲ አዲሱ አገልግሎት መግለጫ ሲሰጡ

የአቫንዛ ታክሲ ደንበኞች በዳሸን ባንክ የካርድ ክፍያ መጠቀም ጀመሩ

ኢትዮጵያ ታክሲ (ኢታ) ሶልዩሽንስ ከዳሸን ባንክ ጋር በመተባበር የሜትር ታክሲ ተጠቃሚዎች የአገልግሎት ክፍያዎችን በካርድ መፈጸም የሚችሉበትን አሠራር ይፋ አደረጉ፡፡ በኢትዮጵያ የካርድ ባንኪንግ አገልግሎት ጅማሮ በቀዳሚነቱ የሚጠቀሰው ዳሸን ባንክ፣ የሜትር ታክሲ ደንበኞች የሚገለገሉበትን የቅድመ ክፍያ ካርድ አዘጋጅቷል፡፡

ቅድመ ክፍያ ካርዱ እንደ ሞባይል ካርድ ሚስጥራዊ ቁጥሮች ያሉት ሲሆን፣ በካርዱ የሰፈሩትን ሚስጥራዊ ቁጥሮች በኢታ የሞባይል ማስተግበሪያ (አፕሊኬሽን) ላይ በመሙላት አገልግሎቱን ማግኘት እንደሚቻል የድርጅቱ መሥራችና ማኔጂንግ ዳይሬክተሩ አቶ ተመስገን ገብረ ሕይወት፣ ረቡዕ ታኅሳስ 25 ቀን 2010 ዓ.ም. አገልግሎቱ ይፋ በተደረገበት ወቅት ገልጸዋል፡፡

ካርዱ ከ500 ብር ጀምሮ የተለያየ ዋጋ ላላቸው ክፍያዎች የተዘጋጀ መሆኑን፣ አገልግሎቱ በተጀመረ በቀናት ውስጥም ለ2,300 ተጠቃሚዎች ካርዱ መሸጡን አቶ ተመስገን ለሪፖርተር ተናግረዋል፡፡

የሜትር ታክሲ ተጠቃሚዎች የአገልግሎት ክፍያቸውን በዳሸን ባንክ በኩል ቀጥታ መክፈል የሚችሉበትን አገልግሎት የሚሰጡ ተሽከርካሪዎች ከዓመት በፊት መንግሥት በሰጠው የቀረጥ ነፃ ዕድል ወደ አገር ውስጥ የገቡ ‹‹አቫንዛ›› ታክሲዎች  ናቸው፡፡ እንደ አቶ ተመስገን ገለጻ፣ ከአቫንዛዎቹ በተጨማሪ የሊፋን ሜትር ታክሲዎችንም ለማካተት ዕቅድ ታቅዷል፡፡ ታክሲዎቹ የመነሻ 40 ብር በማካተት፣ በኪሎ ሜትር 13 ብር የሚያስከፍሉ ሲሆን፣ ክፍያው ከምሽት 4፡00 ሰዓት በኋላ ለውጥ ይደረግበታል፡፡ ከ4፡00 ሰዓት በኋላ መነሻው ወደ 30 ብር ዝቅ የሚደረግ ሲሆን፣ በኪሎ ሜትር ደግሞ ወደ 19 ብር ከፍ ተደርጎ ይቆጥራል፡፡ በአምስት መንገዶች የተዘጋጀው ይህ አገልግሎት፣ የቴሌኮም ኔትወርክ ባይኖርም እንኳ ለ24 ሰዓት እንደሚሠራ ተነግሮለታል፡፡

የዳሸን ባንክ ፕሬዚዳንት አቶ አስፋው ዓለሙ፣ ጅምሩ ከተመሳሳይ ዓለም አቀፍ አሠራሮች ጋር እንደሚወዳደር ተናግረዋል፡፡ ‹‹ጥሬ ገንዘብ አልባ›› ወይም ‹‹ካሽለስ›› ማኅበረሰብ ለመፍጠር በሚደረገው እንቅስቃሴ ውስጥ እንዲህ ያለው አገልግሎት መጀመሩ ጥሬ ገንዘብን ከግብይት ሥርዓት ውስጥ ለማስወጣት ከመጀመርያቹ ዕርምጃዎች መካከል እንደሚጠቀስ አክለው ገልጸዋል፡፡

በኢትዮጵያ ከሚገኙ የግል ባንኮች መካከል በቀዳሚነት ከሚጠቀሱት አንዱ የሆነው ዳሸን ባንክ፣ 1.8 ሚሊዮን ደንበኞች እንዳፈራ ይታወቃል፡፡ በተለያዩ የኢትዮጵያ ክፍሎችም ከ340 በላይ ቅርንጫፎች አሉት፡፡ ዳሸን ባንክ በኢትዮጵያ የአሜሪካ ኤክስፕረስ ካርድን በመቀበል የፋይናንስ አገልግሎት እየሰጠ ይገኛል፡፡ ከግማሽ ሚሊዮን በላይ የሚሆኑ የቪዛና የአሜክስ ብራንድ ካርዶችን ለደንበኞቹ ስለማሠራጨቱም መረጃዎች ይጠቁማሉ፡፡