Skip to main content
x
በሕገወጥ መንገድ የተማሩ ሦስት ሺሕ የጤና ባለሙያዎች ዕውቅና አግኝተዋል

በሕገወጥ መንገድ የተማሩ ሦስት ሺሕ የጤና ባለሙያዎች ዕውቅና አግኝተዋል

በግል ከፍተኛ የትምህርት ተቋማት በማታው ክፍለ ጊዜ የጤና ዘርፍ ትምህርቶች እንዳይሰጡ በሕግ ከተከለከለ ዓመታት ቢያስቆጥርም፣ አሁንም ከመንግሥት ዕውቅና ውጪ ለተማሪዎች አግባብ ባልሆነ መንገድ እየተሰጡ እንደሆነ ለማወቅ ተችሏል፡፡ በ2009 ዓ.ም. ብቻ ሦስት ሺሕ ያህል ተማሪዎች በዋናነት በማኅበረሰብ ጤና፣ በነርሲንግ፣ በፋርማሲ፣ በአዋላጅነትና በጥርስ ሕክምና በማታው ክፍለ ጊዜ ተምረው ከግል ከፍተኛ ትምህርት ተቋማት መመረቃቸው ታውቋል፡፡ ከምረቃቸውም በኋላም ሕግ መጣሱ እየታወቀ ዕውቅና ተሰጥቷቸዋል፡፡

ከዚህ ቀደም በወጣው መመርያ መሠረት ከላይ የተጠቀሱት የትምህርት ዘርፎች በማታው ክፍለ ጊዜ እንዳይሰጡ ሲከለከል፣ በዋናነት የትምህርት ጥራትን ለመጠበቅ ሲባል ነበር፡፡ በማታው ክፍለ ጊዜ የሚማሩ የጤና ዘርፍ ተማሪዎች አብዛኛዎቹ በግል ሥራቸው የተሰማሩ በመሆናቸው፣ ሊሰጣቸው የሚገባውን የተግባር ትምህርት በአግባቡ በቂ ጊዜ ተመድቦ መስጠት ስለሚያስቸግር፣ በእነዚህና በሌሎችም ተያያዥ ጉዳዮች ሳቢያ ታካሚዎችን የጤና አደጋ ውስጥ እንደሚከቱ ስለታመነ ነበር ክልከላ የተደረገው፡፡

በዋናነት የግል የትምህርት ተቋማቱን የመቆጣጠርና የመከታተል ሥልጣን ከተሰጠው የከፍተኛ ትምህርት አግባብና ጥራት ኤጀንሲ ዕውቅና ውጪ፣ ሦስት ሺሕ ተማሪዎች በማታው ዘርፍ ተምረው መመረቃቸው ታውቋል፡፡

ከእነዚህ ውስጥ 1,159 በነርሲንግ፣ 646 በማኅበረሰብ ጤና፣ 747 በፋርማሲ፣ 403 በአዋላጅነት፣ እንዲሁም ሰባት በጥርስ ሕክምና ተመርቀዋል፡፡

‹‹እነዚህ ተማሪዎች ወደ ተቋማችን መጥተው የእኛን የዕውቅና ሰርተፊኬት እስከሚጠይቁ ድረስ ስለመኖራቸው አናውቃቸውም ሲሉ፤›› የኤጀንሲው የሕዝብ ግንኙነት ኃላፊ አቶ ታረቀኝ ገረሱ ለሪፖርተር ተናግረዋል፡፡

ነገር ግን እነዚህ ተማሪዎች በሕገወጥ መንገድ ትምህርታቸውን መማራቸው እየታወቀ፣ ከጤና ጥበቃ ሚኒስቴር ጋር በተደረገ ምክክር ዕውቅና እንዲሰጣቸው መደረጉን አስረድተዋል፡፡

‹‹በጉዳዩ ላይ ያለንን ቅሬታና በተማሪዎች የብቃት ውስንነት ላይ ለጤና ጥበቃ  ሚኒስቴር አሳውቀን፣ በቀጣይ ሚኒስቴሩ ለተማሪዎቹ ተጨማሪ የሥልጠና ዕገዛ እንደሚያደርግ ምላሽ ሰጥቶናል፤›› ሲሉ  አቶ ታረቀኝ አክለዋል፡፡

ከተመረቁት ሦስት ሺሕ የጤና ዘርፍ ተማሪዎች በተጨማሪ፣ አሁን በማታው ክፍለ ጊዜ የጤና ትምህርት የሚከታተሉ የሦስተኛና የአራተኛ ዓመት ተማሪዎች ትምህርታቸውን ወደ መደበኛው ክፍለ ጊዜ እንዲቀይሩ እንደተነገራቸው ገልጸዋል፡፡

የግል ከፍተኛ ትምህርት ከላይ የተጠቀሱትን ሦስት ሺሕ ተማሪዎች ያላግባብ አስተምረው ያስመረቁ ተቋማት ክትትል ተደርጎባቸው እንደሚቀጡ አቶ ታረቀኝ ጠቁመዋል፡፡