Skip to main content
x
ዓለም አቀፉ የሠራተኛ ማኅበራት ኮንፌዴሬሽን የኢትዮጵያን የሠራተኞች ደመወዝ ብዝበዛ ነው ሲል ወቀሰ

ዓለም አቀፉ የሠራተኛ ማኅበራት ኮንፌዴሬሽን የኢትዮጵያን የሠራተኞች ደመወዝ ብዝበዛ ነው ሲል ወቀሰ

የዓለም አቀፍ የሠራተኛ ማኅበራት ኮንፌዴሬሽን የኢንዱስትሪ ባለቤቶች ለሠራተኞቻቸው የሚከፍሏቸው ክፍያዎች ዝቅተኛ በመሆናቸው ወቀሳ ሰነዘረ፡፡ የኮንፌዴሬሽኑ ዋና ጸሐፊ ሳሃራ ባሮው በአዲስ አበባ በተዘጋጀው የሠራተኛ ዝቅተኛ ክፍያ የውይይት መድረክን ዛሬ ጥር 9 ቀን 2010 ዓ.ም. ሲያስጀምሩ እንዳሉት፣ የሺ የምትባል የሦስት ልጆች እናት ሠራተኞችን አግኝተው እንዳነጋገሩና በወር 600 ብር (20 ዶላር) እንደሚከፈላት እንዳወቁ ተናግረው፣ እንደ የሺ ያሉ ሠራተኞች ሊያኖራቸው የሚችል ክፍያ ሊከፈላቸው እንደሚገባና ይህም ለየትኛውም አገር ወሳኝ እንደሆነ አስረድተዋል፡፡

በኢትዮጵያ የሚከፈሉ ክፍያዎችን በተመለከተ፣ በኢትዮጵያ ብቻ ሳይሆን በአፍሪካ ደረጃ ጭምር ብዝበዛ የማቆሚያው ጊዜ አሁን ነው ሲሉ ዋና ጸሐፊዋ አስረድተዋል፡፡

‹‹ብዝበዛን በአፍሪካ ለማቆም ጊዜው አሁን ነው፡፡ ለአፍሪካ ሠራተኞች ክብር አይሰጣቸውም፡፡ የሥራቸው ፍሬም ዋጋ አይሰጠውም፡፡ ክፍያቸውም የሚያበረክቱትን እሴት አያሳይም፡፡ ክፍያዎች በፍጹም የጋራ የመደራደር ደረጃን አያሳዩም፤›› ሲሉ አክለዋል፡፡

በዓለም አቀፉ ኮንፌዴሬሽን፣ በአፍሪካ ኮንፌዴሬሽንና በኢትዮጵያ ሠራተኛ ማኅበራት ኮንፌዴሬሽን ትብብር ለሁለት ቀናት የተሰናዳው የውይይት መድረክ ኢትዮጵያን ጨምሮ ከስምንት አገሮች የመጡ ተሳታፊዎችን አሰባስቧል፡፡ ኮንፌዴሬሽኑ ‹‹መቶ በመቶ እሴት፣ ክብር ያላቸው ክፍያዎች ለአፍሪካ›› የሚል ዘመቻ ያስጀመረ ሲሆን፣ የቀጣሪ የድርጅቶችን ስግብግብነት ለመታገል ያለመ ተልዕኮ መሰነቁ ታውቋል፡፡