Skip to main content
x
እነ አቶ በቀለ ገርባን ማረሚያ ቤት ሳያቀርባቸው በመቅረቱ ፍርድ ሳይሰጥ ቀረ
አቶ በቀለ ገርባ

እነ አቶ በቀለ ገርባን ማረሚያ ቤት ሳያቀርባቸው በመቅረቱ ፍርድ ሳይሰጥ ቀረ

  • በእነ አቶ ጉርሜሳ አያና መዝገብ የዘጠኝ ተጠርጣሪዎች ክስ ተቋርጧል

በመከላከያ ምስክርነት የቆጠሯቸው ምስክሮች እንደማይጠሩ ፍርድ ቤት ብይን ከሰጠ በኋላ፣ ለሐሙስ ጥር 10 ቀን 2010 ዓ.ም. ለፍርድ ተቀጥረው የነበሩት እነ አቶ በቀለ ገርባ (አራት ተከሳሾች)፣ የአዲስ አበባ ማረሚያ ቤት አስተዳደር ሳያቀርባቸው በመቅረቱ ፍርድ ሳይሰጥ ቀረ፡፡

ፍርድ ቤቱ ለምን ተከሳሾችን እንዳላቀረበ የማረሚያ ቤት ተወካይን ጠይቆ በተሰጠ ምላሽ፣ ቀጠሮው ለጥር 10 ቀን 2010 ዓ.ም. መቀጠሩን እንዳላወቁ ተወካዩ ተናግረዋል፡፡ ፍርድ ቤቱ ግን መዝገቡ ታኅሳስ 19 ቀን 2010 ዓ.ም. በሰጠው ትዕዛዝ ለፍርድ መቀጠሩን አስታውሶ፣ የማረሚያ ቤቱ ተወካዮች ሥራቸውን በአግባቡ እንዲሠሩ አስጠንቅቋል፡፡

በመዝገቡ ከአምስተኛ ተከሳሽ እስከ 22 ተከሳሾች ድረስ (ቀደም ብለው በነፃ የተሰናበቱ ተጠርጣሪዎች አሉ) ጠበቃ የሆኑት አቶ ወንድሙ ኢብሳ ለፍርድ ቤቱ ባቀረቡት አቤቱታ፣ ማረሚያ ቤቱ ሆን ብሎ ደንበኞቻቸውን ለማጉላላት ያደረገው መሆኑን ተናግረዋል፡፡ በተጨማሪም ደንበኞቻቸው የመከላከያ ምስክሮችን እንደሚያሰሙ አሳውቀው እያለ ፍርድ ይሰጣል መባሉንም ተቃውመዋል፡፡

ፍርድ ቤቱ በሰጠው ምላሽ አምስተኛና ስድስተኛ ተከሳሾችን ጨምሮ ከ15ኛ እስከ 22ኛ ያሉት ተከሳሾች ክስ መቋረጡን (ዘጠኝ ናቸው) ዓቃቤ ሕግ በማሳወቁ፣ ከእስር እንዲፈቱ ትዕዛዝ መስጠቱን አስረድቷል፡፡

ቀሪ ተከሳሾች ያላቸውን የመከላከያ ምስክር ለጥር 28 ቀን 2010 ዓ.ም. እንዲያቀርቡ በማስታወቅ በአቶ ጉርሜሳ አያኖ፣ በአቶ አዲሱ ቡላና በአቶ በቀለ ገርባ ላይ ፍርድ ለመስጠት ለጥር 28 ቀን 2010 ዓ.ም. ቀጠሮ ሰጥቷል፡፡