Skip to main content
x
የኤርትራ ፕሬዚዳንትን መግለጫ መንግሥት አጣጣለው

የኤርትራ ፕሬዚዳንትን መግለጫ መንግሥት አጣጣለው

የኤርትራ ፕሬዚዳንት ኢሳያስ አፈወርቂ ሰሞኑን ለመገናኛ ብዙኃን የሰጡትን መግለጫ መንግሥት አጣጣለው፡፡ ፕሬዚዳንት ኢሳያስ ኢትዮጵያ ውስጥ ለተፈጠረው ቀውስ የሕገ መንግሥቱ አንቀጽ 39 ምክንያት መሆኑን ገልጸው፣ የሻዕቢያ መንግሥት የኢትዮጵያን መንግሥት አፍርሶ የሽግግር መንግሥት እንደሚያቋቁም ገልጸዋል፡፡

የውጭ ጉዳይ ሚኒስቴር ቃል አቀባይ አቶ መለስ ዓለም የፕሬዚዳንቱ መግለጫ ፍሬ አልባና ትኩረትን ከመፈለግ የመጣ ነው ብለው፣ ፕሬዚዳንቱ አልሞትኩም ብዬ አልዋሽም ለማለት ፈልገው መሆኑን ለሪፖርተር ገልጸዋል፡፡

ባለፈው ሳምንት ለስድስተኛ ጊዜ ካይሮ በተካሄደው የኢትዮጵያና የግብፅ የሚኒስትሮች የጋራ ስብሰባ ወቅት የኤርትራ መንግሥት ለአካባቢው አለመረጋጋትና ሥጋት መሆኑን ኢትዮጵያ ገልጻ፣ ጉዳዩን በቅርብ እንደምትከታተለውና ቸል እንደማትለው አሳስባለች፡፡

ሐሙስ ጥር 10 ቀን 2010 ዓ.ም. በካይሮ ጠቅላይ ሚኒስትር ኃይለ ማርያም ደሳለኝና የግብፅ ፕሬዚዳንት አብዱልፈታህ አልሲሲ በተገናኙበት ወቅት፣ ግብፅ የኢትዮጵያን ሰላምና መረጋጋት፣ እንዲሁም ብሔራዊ ጥቅም የሚጎዳ ነገር ውስጥ እጇ እንደማይኖርበት ፕሬዚዳንቱ ገልጸዋል፡፡ በስብሰባው ወቅት ኢትዮጵያና ግብፅ በአካባቢያቸው እንዲሁም በቀይ ባህር ሰላምና መረጋጋትን ለማስፈን፣ ሽብርተኝነትንና ፅንፈኝነትን ለመዋጋትና ሕገወጥ የሰዎች ዝውውርን ለመከላከል በጋራ ለመሥራት መስማማታቸው ታውቋል፡፡

ሁለቱ መሪዎች በተገናኙበት ወቅት ጠቅላይ ሚኒስትር ኃይለ ማርያም የዓባይ ውኃ በየጓሯችን እየፈሰሰና 65 በመቶ የአገሪቱ ሕዝብ በጨለማ እየኖረ ሊቀጥል አይገባም ብለው፣ የህዳሴ ግድቡ ይህንን ችግር ለመፍታት ኢትዮጵያዊያን የጀመሩት ፕሮጀክት መሆኑን ተናግረዋል፡፡

‹‹ኢትዮጵያን ለማልማት ግብፅና ሱዳን መጥፋት አለባቸው ብለን አናምንም፤›› ያሉት ጠቅላይ ሚኒስትሩ፣ ምንም እንኳን ሸክሙን ለብቻችን ተሸክመን ብንገባበትም ግድቡ ለሁላችን የሚጠቅም ነው ብለዋል፡፡ የዓባይ ውኃ ለግብፅ ሕይወት እንደሆነ ሁሉ፣ ለኢትዮጵያም ከድህነት የመውጣትና ያለመውጣት ጉዳይ መሆኑን አክለው ገልጸዋል፡፡

በስድስተኛው የኢትዮጵያና የግብፅ የሚኒስትሮች የጋራ ስብሰባ ላይ ሁለት ስምምነቶች ተደርገዋል፡፡ የመጀመርያው ሁለቱ አገሮች በኤክስፐርት ደረጃ ቋሚ የፖለቲካ ምክክር ለማድረግ ሲሆን፣ ሌላው ይህ የሚኒስትሮች የጋራ ስብሰባ በመሪዎች ደረጃ ከፍ ብሎ በቋሚነት እንዲደረግ ነው፡፡ በመሪዎች ደረጃ የሚደረገውም የጋራ መድረክ በየዓመቱ እንደሚሆን ታውቋል፡፡