Skip to main content
x
አይኤምኤፍ የልማት ባንክ የተዛባ ብድር አሰጣጥን ለማስተካከል የሚደረገው ጥረት ተጠናክሮ ይቀጥል አለ

አይኤምኤፍ የልማት ባንክ የተዛባ ብድር አሰጣጥን ለማስተካከል የሚደረገው ጥረት ተጠናክሮ ይቀጥል አለ

የዓለም የገንዘብ ድርጅት (አይኤምኤፍ) የኢትዮጵያ ልማት ባንክን የተዛባ ብድር አሰጣጥን ለማስተካከል፣ በመንግሥት የተጀመረው ጥረት ተጠናክሮ መቀጠል አለበት አለ፡፡

አይኤምኤፍ ረቡዕ ጥር 9 ቀን 2010 ዓ.ም. የኢትዮጵያን ኢኮኖሚያዊ ሁኔታዎች ከገመገመ በኋላ ባወጣው መግለጫ፣ መንግሥት የልማት ባንክን ለማስተካከል የጀመረውን ጥረት በመደገፍ ተጠናክሮ እንዲቀጥል ጥሪውን አቅርቧል፡፡

የባንኩን የተበላሹ ብድሮች ለማስተካከል የተጀመረውን እንቅስቃሴም አይኤምኤፍ በአዎንታዊነት ተቀብሎታል፡፡

የኢትዮጵያ ልማት ባንክ በጋምቤላ ክልል በግል አልሚዎች ለተጀመሩ ሰፋፊ እርሻዎች የለቀቀው ከፍተኛ መጠን ያለው ብድር መመለስ ባለመቻሉ ምክንያት፣ የባንኩን አጠቃላይ መመለሳቸው አጠራጣሪ የሆኑ ብድሮች መጠን 8.6 ቢሊዮን ብር እንዳደረሰው መዘገባችን ይታወሳል፡፡

የአገሪቱን ባንኮች በሚቆጣጠረው የኢትዮጵያ ብሔራዊ ባንክ መመርያ፣ የአንድ ባንክ የተበላሸ ብድር መጠን ከአጠቃላይ ብድሩ ከአምስት በመቶ ሊበልጥ እንደማይችል ቢደነግግም፣ የልማት ባንክ የተበላሸ ብድር (በወቅቱ መመለስ ያልቻለ) ክምችት ከአጠቃላይ ብድሩ 25.3 በመቶ መድረሱን መዘገባችን አይዘነጋም፡፡

ልማት ባንክ የሚያንቀሳቀሰው ገንዘብ እንደ ንግድ ባንኮች ከማኅበረሰቡ የሚሰበሰበውን ተቀማጭ በመጠቀም ባይሆንም፣ ብሔራዊ ባንክ በሁሉም ንግድ ባንኮች ላይ የጣለውን የ27 በመቶ ቦንድ ከመግዛት የሚገኘውን ገንዘብ፣ እንዲሁም መንግሥት የሚያገኘውን የውጭ ብድር በመጠቀም ለተበዳሪዎች እንደሚያቀርብ ይታወቃል፡፡ በመሆኑም በተዘዋዋሪ መንገድ የሕዝቡ ተቀማጭ ሀብት በልማት ባንክ እየባከነ እንደሚገኝ ባለሙያዎች ያስረዳሉ፡፡

አይኤምኤፍ የኢትዮጵያ ኢኮኖሚ እ.ኤ.አ. በ2018 ዕድገቱን እንደሚቀጥል የሚጠቁም ትንበያ አስቀምጧል፡፡ በድርጅቱ ትንበያ መሠረትም፣ የኢትዮጵያ ኢኮኖሚ በ8.5 በመቶ ያድጋል፡፡

መንግሥት በሚወስደው ዕርምጃም የአገሪቱ የውጭ የዕዳ መጠን እየቀነሰ ስለመምጣቱ ድርጅቱ ጠቁሟል፡፡ መንግሥት ከፍተኛ ወለድ የሚከፍልባቸውንና በተነፃፃሪነት የአጭር ጊዜ ብድሮችን (Commercial Loans) የመበደር አዝማሚያው እየቀነሰ እንደሚገኝ አይኤምኤፍ ጠቅሷል፡፡ ሆኖም አገሪቱ ያላት ዓለም አቀፍ የመጠባበቂያ ክምችት መጠን 3.2 ቢሊዮን ዶላር ብቻ መሆኑንና ይህም ለ1.8 ወራት ብቻ የሚበቃ መሆኑን፣ ከመንግሥት ጋር ያካሄደውን ድርድር ባጠናቀቀበት ወቅት ይፋ ባደረገው መግለጫው አስፍሯል፡፡

አይኤምኤፍ በጥቅምት ወር የተደረገውን የምንዛሪ ማስተካከያ ቢያወድስም፣ የወጪ ንግድ ገቢው ግን ያን ያህል ለውጥ እንዳላሳየ አስታውቋል፡፡ የወጪ ንግዱ ገቢ እንዳይሻሻል ምክንያት ከተባሉት ውስጥ የዓለም የሸቀጦች ዋጋ መቀነስ ይገኝበታል፡፡

 የአገሪቱ የድህነት መጠን እ.ኤ.አ. በ2000 ከነበረበት 44 በመቶ እ.ኤ.አ. በ2016/17 ወደ 23.5 በመቶ መውረዱንም ድርጅቱ አስታውሷል፡፡