Skip to main content
x
በፀረ ሽብር አዋጁ ላይ የሚደረገው ድርድር መቋጫ አላገኘም

በፀረ ሽብር አዋጁ ላይ የሚደረገው ድርድር መቋጫ አላገኘም

በተለያዩ የአገሪቱ የምርጫ ሕጎችና ፖለቲካዊ ጉዳዮች ላይ ከአንድ ዓመት በላይ በመደራደር ላይ የሚገኙት ኢሕአዴግና ሌሎች 15 አገር አቀፍ ተቃዋሚ ፖለቲካ ፓርቲዎች፣ በፀረ ሽብር ሕጉ ላይ የሚያደርጉትን ድርድር መቋጨት አልቻሉም፡፡

ተቃዋሚ የፖለቲካ ፓርቲዎች በአብዛኛው ያቀረቡት የድርድር ጥያቄ ምላሽ ባለማግኘቱ ኢሕአዴግ ምላሹን እስኪሰጥ ድረስ ድርድሩ በይደር እንዲቆይ የ11 ፖለቲካ ፓርቲዎች ስብስብ ረቡዕ ጥር 16 ቀን 2010 ዓ.ም. ለአምስተኛ ጊዜ በአዋጁ ላይ በተደረገ ድርድር ጠይቋል፡፡

ሆኖም ኢሕአዴግን ወክለው በድርድሩ እየተሳተፉ የሚገኙት አቶ ሽፈራው ሽጉጤ፣ ‹‹ያነሳችሁት ሐሳብ የሕግ እውቀት የሚጠይቅ በመሆኑ የሕግ ባለሙያዎች ዝርዝሩን እስኪያቀርቡልን ድረስ በሌሎች አጀንዳዎች ላይ ውይይቱን እንቀጥል፤›› በማለት አስተያየት ሰጥተዋል፡፡

ምንም እንኳን አቶ ሽፈራው ይህን ቢሉም በተለይ የ11 ፖለቲካ ፓርቲዎች ስብስብ ለድርድር ከቀረቡት ሐሳቦች ላይ በኢሕአዴግ በኩል ቁርጥ ያለ ምላሽ እስከሚሰጥ ድረስ፣ በሌላ አጀንዳ ላይ ከመወያየት ድርድሩ በይደር እንዲቆይ ጠይቀዋል፡፡

በዚህም መሠረት አደራዳሪዎቹ ኢሕአዴግ የሚያቀርበውን ምላሽ መሠረት አድርጎ ለመደራደር፣ የኢሕአዴግን ምላሽ እንዳገኙ ለተደራዳሪዎቹ ጥሪ እንደሚያስተላልፉ በመግለጽ ጥር 16 ቀን 2010 ዓ.ም. የተካሄደው ድርድር ተጠናቋል፡፡

ይህ በእንዲህ እንዳለ ከመጀመርያው አንስቶ በድርድር ሲሳተፍ የቆየው የኢትዮጵያ ራዕይ ፓርቲ (ኢራፓ) ‹‹የድርድሩ የዓመት ጉዞ ለአገራችንም ሆነ ለሕዝባችን ያበረከተው ቁንፅል ታህል ፋይዳ አልነበረውም፡፡ ከእንግዲህም ሊኖረው አይችልም፤›› በማለት ከጥር 16 ቀን 2010 ዓ.ም. ጀምሮ ራሱን ከድርድሩ ማግለሉን አስታውቋል፡፡   

‹‹እኛ ኢትዮጵያውያን አሁን ካለንበት የጥፋት ቋፍ ተላቀን ህልውናችንን አስጠብቀን መጓዝ ወደሚያስችለን ሁሉን አቀፍ ብሔራዊ መግባባት እንመጣ ዘንድ፣ የሰላማዊ ትግል መንገዶች ሁሉ ተዘግተውብናል በማለት ነፍጥ አንግበው በትጥቅ ትግል ላይ የሚገኙ ኢትዮጵያውያንን ጨምሮ ሁሉንም ባለድርሻ አካላት የማስተባበር ተነሳሽነቱንና ኃላፊነቱን ለመውሰድ ኢራፓ በሙሉ የሞራል አቅም ላይ እንደሚገኝና የራሱን አስተዋጽኦ ለማበርከት ከመቼውም ጊዜ በላቀ ሁኔታ ዝግጁ ነው፤›› በማለት ኢራፓ አስታውቋል፡፡

እስካሁን በተደረጉት ድርድሮች ገዥው ፓርቲና አገር አቀፍ ተቃዋሚ የፖለቲካ ፓርቲዎች፣ የፖለቲካ ፓርቲዎች ምዝገባ አዋጅ ቁጥር 573/2003 እና የተሻሻለውን የኢትዮጵያ የምርጫ አዋጅ ቁጥር 532/99 ለማሻሻል መስማማታቸው የሚታወስ ነው፡፡