Skip to main content
x
ንግድ ምክር ቤቱ ለአዲሱ ዋና መሥሪያ ቤት የመሠረት ድንጋይ ሊያስቀምጥ ነው

ንግድ ምክር ቤቱ ለአዲሱ ዋና መሥሪያ ቤት የመሠረት ድንጋይ ሊያስቀምጥ ነው

የአዲስ አበባ ንግድና ዘርፍ ማኅበራት ምክር ቤት በአዲስ አበባ ከተማ ለማስገንባት ያቀደውን የዋና መሥሪያ ቤት ሕንፃ ዲዛይን በማሻሻል ወደ ግንባታ ለመግባት ነገ ጥር 24 ቀን 2010 ዓ.ም. የመሠረት ድንጋይ ሊያስቀምጥ ነው፡፡

ከአዲስ አበባ ከተማ አስተዳደር ዝቅተኛ በሆነ የሊዝ ዋጋ በቦሌ ክፍለ ከተማ ዳያስፖራ አደባባይ (የቀድሞው ዘርፈሽዋል ትምህርት ቤት) አካባቢ በተረከበው ቦታ የሚያስገነባው ሕንፃ፣ ከ300 እስከ 350 ሚሊዮን ብር የሚፈጅ እንደሆነ ንግድ ምክር ቤቱ የሕንፃ ግንባታውን በተመለከተ ያወጣው መግለጫ ያስረዳል፡፡

ከአምስት ዓመታት በላይ ሲንከባለል የቆየው የንግድ ምክር ቤቱ የዋና መሥሪያ ቤት ሕንፃ ግንባታ አዲስ ባሠራው ዲዛይን መሠረት የሚገነባ ነው፡፡ ከንግድ ምክር ቤቱ የተገኘው ተጨማሪ መረጃ የዲዛይን ለውጡ የተደረገው በተሰጠው ቦታ ተስማሚ የሆነ ዲዛይን የሚያስፈልግ በመሆኑ ነው፡፡ ከዚህም ሌላ ቀደም ብሎ የተሠራው ዲዛይን የሚገነባው ሕንፃ 12 ወለሎች የነበሩት በመሆኑና አሁን ግን ተጨማሪ ወለሎችን በማከል እንዲሠራ በመወሰኑ ነው፡፡ በዚሁ መሠረት ንግድ ምክር ቤቱ ይህንን ዲዛይን ለመቀየር ባቋቋመው ኮሚቴ አማካይነት የቀደመውን ዲዛይኑን የሠራው አማካሪ ያደረገው ማሻሻያ ተቀባይነት አግኝቶ ሕንፃው እንዲሠራ ተወስኗል፡፡  

ንግድ ምክር ቤቱ ለሕንፃ ግንባታው የተረከበው 3,000 ካሬ ሜትር ቦታ ሲሆን፣ በአዲሱ ዲዛይን መሠረት ሕንፃው 22 ወለሎች ይኖሩታል፡፡

ምክር ቤቱ የንግዱን ኅብረተሰብ ጥቅም ለማስከበርና ተፈላጊ የሆኑ ዘመናዊ የንግድ አገልግሎቶችን በተሻለ ብቃት ለማቅረብ እንዲችል ተቋማዊ ቁመናውን በማጠናከር የራሱ ሕንፃ ለመገንባት የመጨረሻው ምዕራፍ ላይ መድረሱ ተገልጿል፡፡ ነጋዴው በራሱ የሚመክርበትና ደረጃውን የጠበቀ አገልግሎትን መስጠት የሚችል የራሱ ዋና መሥሪያ ቤት ሕንፃ እንዲኖረው ለማድረግ እንቅስቃሴ እያደረገ እንደሚገኝ ያመለከተው የንግድ ምክር ቤቱ መግለጫ፣ የመሠረት ድንጋዩን የአዲስ አበባ ከተማ ከንቲባና የአዲስ አበባ ንግድና የዘርፍ ማኅበራት ምክር ቤት ፕሬዚዳንት ያስቀምጣሉ ተብሎ ይጠበቃል፡፡

አዲሱን ሕንፃ ለመገንባት የሚያስችል ድጋፍ ለማስገኘትም የተለያዩ የገቢ ማሰባሰቢያ ሥልቶችና ፕሮግራሞች ተቀርፀው በእንቅስቃሴ ላይ እንደሚገኙ የንግድ ምክር ቤቱ መግለጫ አመልክቷል፡፡

ለሕንፃ ግንባታ የሚውለውን ገንዘብ ለማሰባሰብም የመጀመርያውን ፕሮግራም በመጪው ሚያዝያ 4 ቀን 2010 ዓ.ም. አንድ ሺሕ በላይ የሚሆኑ የምክር ቤቱ አባል የአገር ውስጥና ውጭ አገር ትልልቅ ኩባንያ ባለቤቶችና ከፍተኛ የሥራ ኃላፊዎች የሚሳተፉበት የቢዝነስ ፎርምና የገቢ ማሰባሰቢያ ልዩ የእራት ግብዣ ያካሂዳል ተብሏል፡፡ ንግድ ምክር ቤቱ በነገው ዕለት መሠረት ድንጋይ ቢያኖርም፣ እስካሁን ድረስ ግን ቦታውን የሚያካሂደውን ሥራ ተቋራጭ ያልመረጠ መሆኑንም ለማወቅ ተችሏል፡፡  

የአዲስ አበባ ንግድና የዘርፍ ማኅበራት ምክር ቤት በአዋጅ ከተቋቋመበት 1939 ዓ.ም. ጀምሮ ከ70 ዓመታት በላይ አገልግሎት ላይ የቆየ ሲሆን፣ በአሁኑ ወቅት የሚገለገልባቸው ቢሮዎችን በመከራየት ይጠቀማል፡፡ ንግድ ምክር ቤቱ ከ17,000 በላይ የሚሆኑ አባላት አሉት፡፡