Skip to main content
x
የድርቅ ተጋላጮች ቁጥር በቅርቡ ይፋ ይደረጋል
አቶ ምትኩ ካሳ

የድርቅ ተጋላጮች ቁጥር በቅርቡ ይፋ ይደረጋል

  • መንግሥት በተፈጥሮና በድርቅ ለተጎዱ አምስት ቢሊዮን ብር በጀት አፀደቀ

ከተያዘው በጀት ዓመት አጋማሽ ጀምሮ በድርቅ ምክንያት የምግብ ዕርዳታ የሚያስፈልጋቸው ዜጎች ቁጥር ከሦስት ሳምንት በኋላ ይፋ እንደሚደረግ፣ ብሔራዊ የአደጋ ሥጋት ሥራ አመራር ኮሚሽን አስታወቀ፡፡

የአደጋ ሥጋት ሥራ አመራር ኮሚሽነር አቶ ምትኩ ካሳ ለሪፖርተር እንደገለጹት፣ በተለይ በደቡብ ምዕራብ የአገሪቱ ክፍል የተሻለ ዝናብ በመጣሉ የተረጂዎች ቁጥር አሁን ካለበት 8.5 ሚሊዮን ይቀንሳል፡፡

ነገር ግን ወደ ተለያዩ የአገሪቱ ክፍሎች ቅኝት ለማድረግ የተሰማራው የባለሙያዎች ቡድን መረጃውን አጠናቅሮ ባለመጨረሱ፣ የሚያስፈልገውን በጀትም ሆነ የተረጂዎችን ቁጥር አሁን መናገር እንደማይቻል አቶ ምትኩ አስታውቀዋል፡፡

የሕዝብ ተወካዮች ምክር ቤት ማክሰኞ ጥር 29 ቀን 2010 ዓ.ም ባካሄደው መደበኛ ስብሰባ የ14 ቢሊዮን ብር ተጨማሪ በጀት ሲያፀድቅ፣ ከዚህ ተጨማሪ በጀት ውስጥ በድርቅ ለተጎዱ ወገኖችና በግጭት ምክንያት ከኦሮሚያና ከሶማሌ ክልሎች የተፈናቀሉ ዜጎችን ለማቋቋም አምስት ቢሊዮን ብር በጀት መድቧል፡፡

ከተጨማሪ በጀቱ ውስጥ 7.2 ቢሊዮን ብር የሚሆነው የፕሮግራም በጀት፣ ግቦችን ለማሳካትና የፋይናንስ እጥረት ላጋጠማቸው መሥሪያ ቤቶች የተያዘ ነው፡፡

አንድ ቢሊዮን ብር ደግሞ ለወጣቶች ተዘዋዋሪ ፈንድ፣ 500 ሚሊዮን አዳዲስ ዩኒቨርሲቲዎች ተማሪዎችን የመቀበል አቅማቸውን እንዲያሳድጉ ለማድረግ፣ ሦስት መቶ ሚሊዮን ብር ደግሞ ዲጂታል ቴሌቪዥን ማስፋፋት ለሚያስችሉ መሣሪያዎች ግዥ ቀሪ ክፍያ የሚውል ነው፡፡

አምስት ቢሊዮን ብር በተፈጥሮና ሰው ሠራሽ አደጋዎች ማቋቋሚያ የሚውል ሲሆን፣ በግጭት የተፈናቀሉ ወገኖችን ለማቋቋም ኮሚሽኑ ከፌዴራልና አርብቶ አደር ጉዳዮች ሚኒስቴር ጋር በጋራ እየሠራ መሆኑ ታውቋል፡፡

ይህ ተጨማሪ በጀት የሚሸፈነው የኢትዮጵያ ብሔራዊ ባንክ ጥቅምት 1 ቀን 2010 ዓ.ም. ብር ከዶላር ጋር ያለው የምንዛሪ ተመን በ15 በመቶ እንዲዳከም ካደረገ በኋላ፣ ባንኮች ካገኙት ንፋስ አመጣሽ ገቢ (4.3 ቢሊዮን ብር) ሲሆን፣ ከመንግሥት የልማት ድርጅቶች ሽያጭ (ካፒታል ገቢ) 9.7 ቢሊዮን ብር የሚገኝ በመሆኑ ነው ተብሏል፡፡

ባለፈው ዓመት አገሪቱ በታሪኳ ሰፊ ቦታ የሚሸፍን ድርቅ እንዳጋጠማት ይታወቃል፡፡ በዚህ የምርት ዘመን የዝናብ ሥርጭቱ የተሻለ መሆኑ የተነገረ ሲሆን፣ የተረጂዎች ቁጥር ከ8.5 ሚሊዮን ያንሳል ተብሎ የሚጠበቅ ቢሆንም፣ ከሦስት ሳምንት በኋላ ለጋሾችና መንግሥት ለሕዝብ ይፋ ያደርጋሉ ተብሎ ይጠበቃል፡፡