Skip to main content
x
የኦሮሚያ ከተሞች ከንግድና ከማኅበራዊ እንቅስቃሴ ታቅበው ሰነበቱ

የኦሮሚያ ከተሞች ከንግድና ከማኅበራዊ እንቅስቃሴ ታቅበው ሰነበቱ

ከሰኞ የካቲት 26 ቀን 2010 ዓ.ም. ጀምሮ በማኅበራዊ ሚዲያ በተጠራ የሦስት ቀንና ከቤት ያለመውጣት አድማ፣ የኦሮሚያ ክልል የተለያዩ ከተሞች ከንግድና ከማኅበራዊ እንቅስቃሴዎች ታቅበው ሰነበቱ፡፡

በተለይ ከሰኞ ጀምሮ በኦሮሚያ የተለያዩ ከተሞች በተጀመረው አድማ የመንግሥታዊ ተቋማት፣ የንግድ ማዕከላትና የትራንስፖርት እንቅስቃሴ በሙሉ ተገትቷል፡፡ ከተቋማት መዘጋት በተጨማሪ በተለያዩ ሥፍራዎች መንገዶች በመዘጋታቸው ለመንቀሳቀስ አዳጋች ሆኖ ነበር፡፡

ነገር ግን የፌዴራል ትራንስፖርት ባለሥልጣን ዋና ሥራ አስኪያጅ አቶ ካሳሁን ኃይለ ማርያም ለሪፖርተር እንደገለጹት፣ ሰኞ የትራንስፖርት መቆራረጥ ቢኖርም በማግሥቱ ማክሰኞ የካቲት 27 ቀን 2010 ዓ.ም. ከጅማና ከአምቦ መስመሮች በስተቀር፣ ከአዲስ አበባ በሁሉም አቅጣጫዎች የሕዝብ ማመላለሻ ተሽከርካሪዎች ተንቀሳቅሰዋል፡፡

በአምቦ ከሰኞ ቀደም ብሎ ግጭት የተስተዋለበት አድማ የተደረገ ሲሆን፣ በጅማ ከግጭት በመለስ የዩኒቨርሲቲ፣ የባንኮችና የኢንሹራንስ ኩባንያዎች የተለያዩ የንግድ መደብሮችና የትራንስፖርት እንቅስቃሴ ተገቷል፡፡

ይህ በዚህ እንዳለ በኦሮሚያ የተለያዩ ሥፍራዎች የሥራ ማቆም አድማ የቀሰቀሱና በተለያዩ የመንግሥት ኃላፊነቶች ላይ የሚገኙ ግለሰቦች በቁጥጥር ሥር መዋላቸው ታውቋል፡፡

በቁጥጥር ሥር ከዋሉት የክልሉ ባለሥልጣናት መካከል የምሥራቅ ሐረርጌ ዞን ዋና አስተዳዳሪ፣ የምሥራቅ ወለጋ ዞን ምክትል አስተዳዳሪ፣ የነቀምት ከተማ ከንቲባና ምክትል ከንቲባ፣ የምዕራብ ወለጋ ዞን ቄለም ወረዳ የፍትሕ አስተዳደር ኃላፊ ይገኙበታል ተብሏል፡፡

ቁጥሩ ለጊዜው ባይታወቅም በአምቦና በጅማ የሰው ሕይወት መጥፋቱን መረጃዎች አመልክተዋል፡፡ የኢትዮጵያ ንግድ ባንክና የግል ባንኮች ቅርንጫፎች መዘጋታቸውን ሪፖርተር ከኃላፊዎች መረዳት ችሏል፡፡

ስማቸውን መግለጽ ያልፈለጉ የአምቦ ከተማ ነዋሪዎች ለሪፖርተር እንደገለጹት፣ ለሁለት ሌሊቶች ከተማው በተኩስ ሲናጥ ነበር፡፡