Skip to main content
x
መንግሥት የአብነት ትምህርት ቤትን እንዲደግፍ ጥሪ ቀረበ

መንግሥት የአብነት ትምህርት ቤትን እንዲደግፍ ጥሪ ቀረበ

  • አገር አቀፍ የአብነት ትምህርት ፖሊሲ ረቂቅ ተዘጋጀ

በኢትዮጵያ የአብነት ትምህርት ቤትን ከጥንት ጀምሮ በባለቤትነት ጠብቃ ያቆየችው ቤተ ክርስቲያን  ብትሆንም መንግሥት የአገር ሀብትና ቅርስ የዕውቀት ማኅደር መሆኑን ተገንዝቦ ሊደግፈውና ሊጠብቀው እንደሚገባ ማሳሰቢያ ቀረበ፡፡

በኢትዮጵያ ኦርቶዶክስ ተዋሕዶ ቤተ ክርስቲያን መንበረ ፓትርያርክ በተዘጋጀውና የአብነት ትምህርት ቤቶች ረቂቅ የትምህርት ፖለሲ ዓውደ ጥናት፣ ነሐሴ 30 ቀን 2009 ዓ.ም. ሲካሄድ ንቡረ እድ ኤልያስ አብርሃ ባቀረቡት ጥናት እንዳመለከቱት፣ በቤተ ክርስቲያኒቱ የተጠበቀው ቅርስና ውርስ የአገር ሀብት ከመሆን ስለሚያልፍ መንግሥት ትኩረት ሊሰጠው ይገባል ብለዋል፡፡

ንቡረ እድ ኤልያስ አያይዘውም ስለ ባህል፣ ስለ ሳይንስና ስለትምህርት ጥበቃ የተቋቋመው የተባበሩት መንግሥታት ድርጅቱ ዩኔስኮ፣ የኢትዮጵያ የአብነት ትምህርት ቤት የዓለም የዕውቀት አካል መሆኑ ተገንዝቦ ጥበቃ፣ እንክብካቤና ድጋፍ እንዲደረግ በማስተዋወቅና በማስረዳት ባለ ድርሻ አካላት የሆኑ ሁሉ አስፈላጊውን እገዛ እንዲያደርጉ ሁኔታዎችን ማመቻቻት ይጠበቅብናል ብለዋል፡፡

‹‹ይህ ረጅም ጊዜ ጥልቅና ምጡቅ ዕውቀት ያለው ትምህርት ቤት የአገሪቱን ሀብተ አዕምሮ በምልአት የያዘ ማለትም ባሕረ ሐሳብን (የዘመን አቆጣጠርን)፣ ተወዳጅ ባህሎችን፣ ሥነ ቅኔዎችን፣ ሥነ ጽሑፎችን፣ ሥነ ጥበቦችን፣ ጣዕመ ዜማዎችን፣ ሃይማኖትንና ሃይማኖታዊ እሴቶችን፣ ፊደሎችን፣ ሥነ ቋንቋን ወዘተ በምልአት ይዞ የሚገኘ መሆኑን ተመራምረውና አውቀው የውጭ አገሮች ከፍተኛ ተቋማት እንደ ሮም፣ ጀርመንና ካናዳ የመሳሰሉ አገሮች በሥርዓተ ትምህርታቸው ግእዝ ቋንቋን አካተው ሲያስተምሩት፣ ባለቤቶቹ የሆንን እኛ ኢትዮጵያውያን ትምህርቱ እስኪጠፋ ድረስ ዝም ብለን የምንመለከት ከሆነ አስወቃሽና አሳፋሪ ድርጊት እየፈጸምን እንደሆነ ቆም ብለን ማሰብ ይጠበቅብናል፤›› በማለት ንቡረ እድ ኤልያስ አጽንዖት ሰጥተውበታል፡፡

በጥንታዊውና በአገር በቀሉ ጉባኤ ቤት ላይ የሚታዩ ዘርፈ ብዙ ተግዳሮቶችን በዘላቂነት ለመፍታት ይቻል ዘንድ የተቀናጀና የተደራጀ ረቂቅ የትምህርት ፖሊሲ  መዘጋጀቱና ለውይይት መቅረቡ በመድረኩ ተወስቷል፡፡

አዲስ አበባ ዩኒቨርስቲን ጨምሮ ከሌሎች ከፍተኛ ተቋማት የተውጣጡ ምሁራን በተሳተፉበት መድረክ እንደተወሳው፣ ነገረ ሃይማኖትና ትውፊት፣ ታሪክና ፍልስፍና፣ ሥነምግባርና ሕግ፣ ቋንቋና ሥነ ጽሑፍ፣ ቅኔና ባሕረ ሐሳብ ወዘተ የሚሰጥባቸው ጉባኤ ቤቶችን ለማሳደግና ተቀባይነታቸውን ለማረጋገጥ፣ ጥራቱንና ዕድገቱን የሚመራ የወደፊቱን አቅጣጫ የሚያመለክት የትምህርት ፖሊሲ መቅረፅና መተግበር በእጅጉ ወሳኝ ነው፡፡

ፖሊሲው ከአብነት ትምህርት ቤቶች የትምህርት ሥርዓትና ከዘመናዊ ትምህርት ፖሊሲ እንዲሁም ከእኅት አብያተ ክርስቲያናት የትምህርት ሥርዓት ጋር ተገናዝቦ መዘጋጀቱና ትውልዱ ለጥንታዊና ለብሔራዊው የቤተ ክርሰቲያን ትምህርት ባዕድ እንዳይሆን የልኅቀት ማዕከላት እንደሚፈጠርም ተመልክቷል፡፡

ዓውደ ጥናቱን የከፈቱት ብፁዕ ወቅዱስ ፓትርያርክ አቡነ ማትያስ ቀዳማዊ፣ መልካም ሥነ ምግባር ያለው፣ አገሩንና ባህሉን ጠንቅቆ የሚያውቅ ትውልድ የመፍጠር ኃላፊነት ያለባት ቤተ ክርስቲያኒቷ፣ የአብነት ትምህርት ከዘመናዊው ትምህርት ጎን ለጎን የሚሰጥበት ፖሊሲ ቀርፃ ለመተግበር መዘጋጀቷን ተናግረዋል፡፡