Skip to main content
x
ሰንበሬ ተፈሪ በጎዳና ሩጫ ድል ቀንቷታል

ሰንበሬ ተፈሪ በጎዳና ሩጫ ድል ቀንቷታል

ኢትዮጵያዊቷ ሰንበሬ ተፈሪ ኔዘርላንድ ቲልቡርግ ከተማ ነሐሴ 28 ቀን 2009 ዓ.ም. በተከናወነው የጎዳና ላይ ሩጫ የ10 ኪሎ ሜትር ውድድር አሸናፊ ሆነች፡፡ ከ16ኛው ዓለም አትሌቲክስ ሻምፒዮና በኋላ ወደ ግል ውድድሮች ፊታቸውን ካዞሩ አትሌቶች አንዷ የሆነችው ሰንበሬ ርቀቱ በ30፡38 ደቂቃ በማጠናቀቅ የከተማዋን ውድድር ሁለተኛ ጥሩ ሰዓት ማስመዝገብ ችላለች፡፡

ለመጀመርያ ጊዜ በጎዳና ውድድር ላይ የተሳተፈችው አትሌቷ የውድድሩ ግማሽ ሰዓት (15.21) ድረስ ስትመራ ቆይታ ርቀቱን በማፍጠን ኬንያዊቷን አኒኒስ ትራይፕን በማስከተል ቀዳሚ ሆናለች፡፡

ከጎዳናው ውድድር ሁለት ቀን ቀደም ብሎ ዓርብ ነሐሴ 26 ቀን፣ በብራስልስ ዳይመንድ ሊግ ላይ በ5000 ሜትር ተሳትፋ የነበረችው ሰንበሬ ተጠልፋ ወድቃ በመነሳትና በ14፡32.06 ደቂቃ በመግባት ውድድሯን ማጠናቀቋ አድናቆትን አትርፎላታል፡፡ ከዳይመንድ ሊጉ ወደ ቲልቡርግ ጎዳና ሩጫ ያቀናችው ሰንበሬ፣ በውድድሩ በማሸነፍ ቀዳሚዋ አትሌት ስትሆን፣ ሌሎቹ ኢትዮጵያውያት እቴነሽ ዲሮ አራተኛ፣  ሶፊያ ሸምሱና ዝናሽ መኰንን ሰባተኛና ስምንተኛ ወጥተዋል፡፡

 እ.ኤ.አ. 1988 የተጀመረው  የኔዘርላዱ ዓመታዊው የጎዳና ላይ ሩጫ፣ ቀደም ሲል በ16 ኪሎ ሜትር (10 ማይል) ወንዶችን ብቻ የሚያወዳድር ነበር፡፡ ከ2002  ጀምሮ ደግሞ በ10 ኪሎ ሜትር ሴቶችን ማሳተፍ ጀምሯል፡፡

በ1997 ዓ.ም. በወንዶች 10 ማይል ኃይሌ ገብረሥላሴ በ44፡24 ደቂቃ በመግባት ያሸነፈበት ጊዜ የዓለም ክብረ ወሰን ሆኖ እስካሁን በእጁ ይገኛል፡፡

በተመሳሳይ ርቀት በ1998 ዓ.ም. ወርቁ ቢቂላ፣ በ2008 እና 2009 ዓ.ም. አብዮት ጉታ መሳተፍ ችለዋል፡፡ በሴቶች ገነት አያሌው፣ መሰለች መልካሙ፣ መስታወት ቱፋና በላይነሽ ፈቃዱ ተጠቃሽ አትሌቶች ናቸው፡፡ በ2005 ዓ.ም. ጥሩነሽ ዲባባ ያስመዘገበችው 30፡30 የሴቶች ምርጥ ሰዓት ሆኖ ተመዝግቧል፡፡ ሰሞኑን ሰንበሬ የገባችበት 30.38 የርቀቱ ሁለተኛው ጥሩ ሰዓት ሆኖ ለኢትዮጵያ መመዝገብ ችሏል፡፡