Skip to main content
x
በብሔራዊ ፈተና 350 ነጥብና ከዛም በላይ ያመጡ ተፈታኞች 42 በመቶ መሆናቸው ተገለጸ

በብሔራዊ ፈተና 350 ነጥብና ከዛም በላይ ያመጡ ተፈታኞች 42 በመቶ መሆናቸው ተገለጸ

በኢትዮጵያ የተሰጠውን የከፍተኛ ትምህርት ተቋማት መግቢያ ብቃት መመዘኛ ፈተና ከተቀበሉት 285,628 ተፈታኞች መካከል 42 ከመቶ 350 ነጥብና ከዛም በላይ ማምጣታቸውን የአገር አቀፍ የትምህርት ምዘናና ፈተናዎች ኤጀንሲ አስታወቀ፡፡

ዋና ዳይሬክተር አቶ አርአያ ገብረ እግዚአብሔር ከሪፖርተር ጋር ባደረጉት ቃለ ምልልስ እንደገለጹት ብሔራዊ ፈተናውን በ2009 ዓ.ም. ከተቀበሉት መካከል 178,619 የተፈጥሮ፣ 107,009 ደግሞ የማህበራዊ ሳይንስ ተፈታኞች ናቸው፡፡ ዘንድሮ የተገኘው ውጤት ግን ከዓምናው ጋር ሲነፃፀር ዝቅ እንዳለና የማኅበራዊ ሳይንስ ውጤት ደግሞ የወረደ መሆኑን አቶ አርአያ ተናግረዋል፡፡  

ለከፍተኛ ትምህርት ተቋማት መግቢያ የሚሆን የመቁረጫ ነጥብ በመዘጋጀት ላይ ሲሆን፣ ዝግጅቱም በቶሎ ተጠናቅቆ በቅርቡ ይፋ ይሆናል ተብሎ እንደሚጠበቅም አስረድተዋል፡፡

ይኼው የመቁረጫ ነጥብ የሚዘጋጀው በፈተናው ውጤት ላይ ብቻ ተመሥርቶ ሳይሆን አዎንታዊ ድጋፍ ሊያገኙ የሚገባቸውን የሴት፣ የታዳጊ ክልሎች፣ የአርብቶ አደር፣ ዓይነ ሥውራንና መስማት የተሳናቸውን ተፈታኞች ግምት ውስጥ በማስገባት ነው፡፡

ከእነዚህም መካከል ዓይነ ሥውራንና መስማት የተሳናቸው ተፈታኞች በቅበላና በምደባ ላይ እንደፍላጎታቸው የመሆን መብት እንደሚያገኙም ገልጸዋል፡፡

የግል ተፈታኞችም የተወሰነ ዕድል ወይም ቦታ ይሰጣቸዋል፡፡ የማታ ተማሪዎች ግን እንደመደበኛዎቹ ተማሪዎች ነው የሚታዩት፡፡ ለግል ተፈታኞች የተወሰነ ዕድል እንዲሰጣቸው የተደረገበት ዋናው ምክንያት ባለፈው ዓመት ተፈትነው ወደ ከፍተኛ ትምህርት ተቋማት ካለመግባታቸው የተነሳ ዘንድሮ በድጋሚ በመፈተናቸው ነው፡፡

እንደ ዋና ዳይሬክተሩ አገላለጽ፣ በመንግሥት ከፍተኛ ትምህርት ተቋማት ለመግባት ከመቁረጫው ነጥብ በላይ የሆነ ውጤት ማምጣት ያስፈለገው የተቋማቱን የትምህርት ጥራት ለማስጠበቅ ሲባል ነው፡፡ በመቁረጫው ነጥብ ልክ የሚያመጡ ተፈታኞች ግን ወደ ግል ከፍተኛ ትምህርት ተቋማት ይገባሉ፡፡ በመንግሥት ከፍተኛ ትምህርት ተቋም የተመደበ ተፈታኝ በተለያዩ ምክንያቶች ምደባውን የማይፈልግና የማይስማማው ከሆነ ወደ ግል ከፍተኛ ትምህርት ተቋም መግባት መብቱ እንደሆነም ተመልክቷል፡፡

ባገኙት ነጥብ ቅሬታ ያደረባቸው ተፈታኞች በዘመድ አዝማድና በትውውቅ ሳቢያ እንደገና ለማየት ከወዲያና ወዲህ የሚያደርጉት መሯሯጥ ከድካም በስተቀር ምንም እንደማፈይድላቸው አቶ አርአያ አመልክተው፣ በምትኩ ግን በኤጀንሲው ድረ ገጽ ገብተው ቢያስሱ ያገኙትን ነጥብ ትክክለኛነት ማረጋገጥ እንደሚችሉ አስታውቀዋል፡፡   

የዘንድሮ የከፍተኛ ትምህርት ተቋማት መግቢያ ብቃት መመዘኛ ፈተና ያለምንም ችግር በጥሩ ሁኔታ መከናወኑን አቶ አርአያ ገልጸው፣ ይህም ሊሆን የቻለው ጉዳዩ በይበልጥ የሚመለከታቸው ባለድርሻ አካላትና አጋሮች ከኤጀንሲውና ከትምህርት ሚኒስቴር ጋር ተቀናጅተው በመንቀሳቀሳቸው መሆኑን አስታውቀዋል፡፡

ዓምና በፈተናው ላይ የተከሰተው አደናቃፊ ሁኔታና ችግር በዘንድሮ ዝግጅት ላይ እንዳይደገም ለማድረግ የተወሰደው ጥንቃቄና ዕርምጃ ለዝግጅቱ በስኬት መጠናቀቅ ከፍተኛ አስተዋጽኦ እንዳደረገም ዋና ዳይሬክተሩ ተናግረዋል፡፡