Skip to main content
x
በኢትዮጵያ አትሌቲክስ ሻምፒዮና ሁሉም ክልሎችና ክለቦች ይሳተፋሉ

በኢትዮጵያ አትሌቲክስ ሻምፒዮና ሁሉም ክልሎችና ክለቦች ይሳተፋሉ

  • በሻምፒዮናው 1,300 አትሌቶች ይወዳደራሉ

ለ46ኛ ጊዜ በሚካሄደው የኢትዮጵያ አትሌቲክስ ሻምፒዮና ዘጠኝ ክልሎችና ሁለት የከተማ አስተዳድሮች፣ እንዲሁም ከ30 በላይ ክለቦች የተውጣጡ ከ1,300 በላይ አትሌቶች እንደሚሳተፉ ብሔራዊ አትሌቲክስ ፌዴሬሽን በሰጠው መግለጫ አስታውቋል፡፡ በመወዳደር ላይ የሚገኙ ሁሉም ታላላቅና ታዋቂ አትሌቶች በሻምፒዮናው የሚሳተፉ መሆኑንም ተወስቷል፡፡

በአዲስ አበባ ስታዲየም ከግንቦት 8 እስከ 13 ቀን 2009 ዓ.ም. ድረስ ለሚካሄደው የአትሌቲክስ ሻምፒዮና ፌዴሬሽኑ ለሽልማትና መሰል ወጪዎች 1.6 ሚሊዮን በጀት መመደቡንም አስታውቋል፡፡ በነሐሴ ወር በለንደን አስተናጋጅነት ለሚካሄደው የዓለም አትሌቲክስ ሻምፒዮና እና ለሌሎችም አህጉራዊ መድረኮች የሚወዳደሩ አትሌቶች ምርጫ እንደሚደረግም ተገልጿል፡፡

ብሔራዊ ፌዴሬሽኑ ባለፈው ዓርብ ግንቦት 4 ቀን በብሔራዊ ሆቴል በሰጠው መግለጫ ጨምሮ እንዳስታወቀው፣ ሻምፒዮናው በዋናነት በክልሎችና ከተማ አስተዳደሮች እንዲሁም በክለቦችና ማሠልጠኛ ማዕከላት ለሚገኙ ታዳጊና ወጣት አትሌቶች የውድድር ዕድል ለመፍጠር ያለመ ነው፡፡ በተጨማሪም ሻምፒዮናው ኢትዮጵያን በአህጉራዊና ዓለም አቀፋዊ መድረኮች የሚወከሉ ተተኪዎችን የማፍራት ዓላማ ያለው መሆኑንም ሳይገልጽ አላለፈም፡፡

ቀደም ባሉት ዓመታት ባልታየና ባልተለመደ ሁኔታ ታላላቅና ታዋቂ አትሌቶች በሻምፒዮናው የመሳተፍ ግዴታ እንዳለባቸው፣ ካልሆነ ግን ለብሔራዊ ቡድን የመመረጥ ዕድል እንደማይኖራቸውም ፌዴሬሽኑ ይፋ አድርጓል፡፡