Skip to main content
x
በኦሮሚያና በሶማሌ ክልሎች አዋሳኝ የፌዴራል የፀጥታ ኃይሎች ተሰማርተዋል

በኦሮሚያና በሶማሌ ክልሎች አዋሳኝ የፌዴራል የፀጥታ ኃይሎች ተሰማርተዋል

ለበርካቶች ሕይወት መጥፋትና በአሥር ሺዎች ለሚቆጠሩ ከቀዬአቸው መፈናቀል ምክንያት የሆነው በኦሮሚያና ሶማሌ አጎራባች ክልሎች የተፈጠረውን ግጭት ለማረጋጋት፣ የፌዴራል መንግሥት የፀጥታ ኃይሎች በሁለቱ ክልሎች አዋሳኝ ተሰማርተዋል፡፡ ጥብቅ አካባቢዎች አልፎ የሚመጣ ማንኛውም የታጠቀ አካል ትጥቅ የማስፈታት፣ እንዲሁም ዕርምጃ የመውሰድ ሥልጣን ተሰጥቷቸው ሥራቸውን ቀጥለዋል፡፡

በተጨማሪም የፌዴራል ፀጥታ ኃይሎች የሁለቱ ክልሎች ዋና ዋና መንገዶችን እንዲጠብቁ ሥልጣን ተሰጥቶአቸዋል፡፡

ከሌላው ጊዜ በበለጠ በሁለቱ ክልሎች ተዋሳኝ አካባቢዎች ከተከሰቱ ግጭቶች አድማሱን ያሰፋው የአሁኑ ግጭት፣ በሁለቱ ክልሎች አመራሮች መካከል ልዩነቶችን ፈጥሮ ነበር፡፡ ግጭቱን አስመልክቶ ባለፈው ሳምንት በሁለቱ ክልሎች ሲሰጡ የነበሩ እርስ በርስ የሚጋጩ መግለጫዎችም አመላካች ነበሩ፡፡

ጠቅላይ ሚኒስትር ኃይለ ማርያም ደሳለኝ ለተባበሩት መንግሥታት ድርጅት ጠቅላላ ጉባዔ ኒውዮርክ ከማቅናታቸው በፊት የሁለቱን ክልሎች ርዕሳነ መስተዳድሮች፣ የአገር ሽማግሌዎች፣ የሃይማኖት አባቶችና አባገዳዎችን ካነጋገሩ በኋላ፣ የፌዴራል መንግሥት በሕገ መንግሥቱ መሠረት አፋጣኝ ዕርምጃዎችን ይወስዳል ብለው ነበር፡፡ የፌዴራል የፀጥታ ኃይሎች የሕዝቡን ሰላምና ደኅንነት በመጠበቅ መረጋጋት እንዲፈጥሩ፣ የሰው ሕይወት በማጥፋት የሚጠረጠሩ በቁጥጥር ሥር እንዲውሉ ትዕዛዝ ሰጥተዋል፡፡ የሁለቱ ክልሎች ዋና ዋና መንገዶችም በፌዴራል መንግሥት የፀጥታ ኃይሎች ሥር እንዲውሉ አዘዋል፡፡

የፌዴራል የፀጥታ ኃይሎች ግጭት በተቀሰቀሰባቸው አካባቢዎችና አዋሳኝ ሥፍራዎች ማንኛውንም የጦር መሣሪያና ትጥቅ ያስፈታሉ፣ የኢትዮጵያ ሰብዓዊ መብት ኮሚሽንም የመብት ጥሰቶችን ያጣራል ተብሏል፡፡ በግጭቱ ተሳታፊ የሆኑ ግለሰቦችና የፀጥታ ኃይሎች በሕግ እንደሚጠየቁ ጠቅላይ ሚኒስትሩ አክለዋል፡፡

ቅዳሜ መስከረም 6 ቀን 2010 ዓ.ም. ግጭቱን ለማስቆም የፌዴራልና አርብቶ አደር ጉዳዮች ሚኒስትር አቶ ከበደ ጫኔ፣ የሁለቱን ክልሎች ፕሬዚዳንቶች አቶ ለማ መገርሳንና አቶ አብዲ መሐመድን ለጋዜጣዊ መግለጫ ይዘው ቀርበው ነበር፡፡ በወቅቱ ሁለቱም ፕሬዚዳንቶች ግጭቱን አውግዘዋል፡፡ የተከሰተው ግጭት ሁለቱን ሕዝቦች አይወክልም ብለዋል፡፡

‹‹ይህ ችግር ሳይታሰብና ሳይጠበቅ የተፈጠረ ሲሆን ከ50 ሺሕ በላይ ወገኖች መፈናቀል፣ ለሶማሌ ወንድሞቻችንና ለኦሮሞ ቤተሰቦቻችን ሕይወት መጥፋት ምክንያት ሆኗል፤›› ብለዋል አቶ ለማ፡፡

‹‹ሁለቱ ሕዝቦች በጠባብነት የመፈራረጅ ባህል የላቸውም፡፡ ከዚህ ግጭት ኪሳራ እንጂ አንዳችም ትርፍ አይገኝም፤›› ያሉት አቶ አብዲ፣ ግጭቱ ከአንገት በላይ ሳይሆን ከአንጀት መቆም አለበት ብለዋል፡፡

ግጭቱ ከተከሰተ በኋላ በሚኒስትሩ የሚመራ ኮሚቴ የተቋቋመ ሲሆን፣ ኮሚቴው በዋናነት በግጭቱ ለተጎዱና ለተፈናቀሉ ወገኖች ምግብ፣ ምግብ ነክና የሕክምና ዕርዳታ እንዲደረግ ያስተባብራል፡፡

ከፌዴራል መንግሥት ካዝና በሚወጣ ወጪ ዕርዳታው እንደሚከናወን ታውቋል፡፡ አሁን የሚፈናቀሉ ዜጎች የሉም ሲሉ በመንግሥት ኮሙዩኒኬሽን ጉዳዮች ጽሕፈት ቤት፣ የሕዝብና የሚዲያ ግንኙነት ዳይሬክተር አቶ መሐመድ ሰይድ ለሪፖርተር ተናግረዋል፡፡

በተያያዘም ተፈናቅለው የነበሩ ዜጎችን ወደ ነበሩበት የመመለስ ሥራ እየተከናወነ መሆኑን፣ በግጭቱ የተሳተፉና ምክንያት የሆኑ አካላት ደግሞ በሕግ እንደሚጠየቁ በመንግሥት መገለጹ ይታወሳል፡፡

በዚህም በመንግሥት መዋቅር ውስጥም ሆነ ከውጭ ያሉ አካላት በሕግ ይጠየቃሉ ሲሉ አቶ ከበደ ጫኔ መናገራቸው አይዘነጋም፡፡

‹‹አሁን ላይ ሆነን የሟቾች ቁጥር ምን ያህል እንደሆነ መግለጽ ይከብደናል፤›› ያሉት አቶ መሐመድ፣ በቀጣይ ጉዳዩ በኢትዮጵያ ሰብዓዊ መብት ኮሚሽን ከተጣራ በኋላ ይፋ እንደሚደረግ ጠቁመዋል፡፡

በተያያዘ ዜና አዲስ አበባ የሚገኘው የአሜሪካ ኤምባሲ ባወጣው መግለጫ፣ የኢትዮጵያ መንግሥት ግጭቱን ግልጽ በሆነ አካሄድ እንዲያጣራና አጥፊዎችን ተጠያቂ እንዲያደርግ አሳስቧል፡፡  ‹‹ኢትዮጵያ ጠንካራ፣ የበለፀገችና ዴሞክራሲያዊት አገር መሆን የምትችለው ግጽልና ሁሉን አቀፍ የፖለቲካ ውይይት፣ ግልጽ የመንግሥት አሠራር፣ እንዲሁም የዴሞክራሲና የፍትሕ ተቋማት ማጠናከር ስትችል እንደሆነ እናምናለን፡፡ የሰሞኑ ሁነቶች በተጠቀሱት ዘርፎች ይበልጥ ፈጣንና ተጨባጭ ለውጥ አስፈላጊ እንደሆነ አመላካች ናቸው፤›› ሲል የአሜሪካ ኤምባሲ በመግለጫው አስታውቋል፡፡