Skip to main content
x
 ከአገር አቀፍ ምዘና ውድድር ከ200 በላይ ታዳጊዎች ወደ አካዴሚ ገብተዋል

ከአገር አቀፍ ምዘና ውድድር ከ200 በላይ ታዳጊዎች ወደ አካዴሚ ገብተዋል

በአምስተኛው አገር አቀፍ የታዳጊ ወጣቶች ሥልጠና ፕሮጀክት፣ የምዘና ውድድር ዕጩ የሆኑ ሠልጣኝ ስፖርተኞች ለኢትዮጵያ ወጣቶች ስፖርት አካዴሚና ጥሩነሽ ዲባባ ማሠልጠኛ ማዕከል ተመርጠዋል፡፡

በምዘና ውድድሩ 155 ወንዶችና 94 ሴቶች በድምሩ 249 ታዳጊዎች በተለያዩ የስፖርት ዘርፎች ተመርጠው በዘጠኝ የስፖርት ዓይነቶች ሥልጠናቸውን ይጀምራሉ ተብሏል፡፡

ከእሑድ ነሐሴ 7 ቀን 2009 ዓ.ም. ጀምሮ በሐዋሳ ከተማ አስተናጋጅነት ለሁለት ሳምንት በተካሄደው ሻምፒዮና፣ በ13 የስፖርት ዓይነቶች ሁሉም ክልሎችና የከተማ አስተዳደሮች ተሳትፈዋል፡፡

በሻምፒዮናው ተስፋ የሚጣልባቸው ታዳጊዎችን መመልከት የተቻለ ሲሆን፣ የዕድሜ ችግር በከፊል መታየቱና ክልሎችም አስፈላጊውን ክትትል ማድረግ እንደሚገባቸው አስተያየት ተሰጥቷል፡፡

የተለያዩ አገር አቀፍ ውድድሮች ላይ በተመሳሳይ የዕድሜ ዕርከን መሳተፍ የተለመደ ቢሆንም፣ የክልልና የክለብ አሠልጣኞች ችግሩን ለመፍታት ትልቅ ኃላፊነት እንዳለባቸው የኢትየጵያ ኦሊምፒክ ኮሚቴ ሥራ አስፈጻሚ ኮሚቴ አባል ኰሎኔል ደራርቱ ቱሉ አሳስባለች፡፡ እንደ ደራርቱ አስተያየት ከሆነ ‹‹በተመጣጣኝ ዕድሜ ላይ የሚገኙ አትሌቶች እኩል አለማወዳደር ተተኪዎችን ያሳጣናል፡፡››

የስፖርት እንቅስቃሴን ለማሳደግ በታዳጊ ወጣቶች ላይ መሥራት መሠረታዊ መሆኑን የሚገልጹት ባለሙያዎች፣ በዓለም አቀፍ ደረጃ ውጤት ማምጣት የቻሉ አገሮች ምሥጢር  ተተኪዎች ላይ መሥራት መቻላቸው እንደሆነ ይነገራል፡፡

ወደ አካዴሚ ያመሩት ታዳጊዎች የሦስት ዓመት ሥልጠና ቆይታ ካደረጉ በኋላ ለተለያዩ ክለቦች ግብዓት እንደሚሆኑ ይጠበቃል፡፡

በሻምፒዮናው ኦሮሚያ በ34 ወርቅ አንደኛ፣ አማራ በ25 ወርቅ ሁለተኛ፣ እንዲሁም ደቡብ ክልል በ16 እና አዲስ አበባ በ13 ወርቅ ሦስተኛና አራተኛ በመሆን እንደየቅደም ተከተላቸው አጠናቀዋል፡፡