Skip to main content
x

ካሜሩናዊ ሀማድ ካልካባ ከአኖካ ምርጫ ታገዱ

ለአፍሪካ ብሔራዊ ኦሊምፒክ ኮሚቴዎች ማኅበር (አኖካ) ፕሬዚዳንታዊ ምርጫ ለአይቮሪኮስታዊ  ዕጩ ሳላና ፓሌንፍ ጠንካራ ተፎካካሪ ይሆናሉ ተብሎ ሲጠበቁ የቆዩት ካሜሩናዊ ሀማድ ካልካባ በጉባኤው እንዳይታደሙ መታገዳቸው የኢትዮጵያ ኦሊምፒክ ኮሚቴ አስታወቀ፡፡

የብሔራዊ ኦሊምፒክ ኮሚቴው የሕዝብ ግንኙነት ከፍተኛ ባለሙያ አቶ ዳንኤል አበበ እንደገለጹት ከሆነ የአኖካን መንበረ ሥልጣን ከ2005 ዓ.ም. ጀምሮ ተቆናጠው የቆዩት አይቮሪኮስታዊ ፓሌንፎ ለፕሬዚዳንታዊ ምርጫው ብቸኛ ሆነዋል፡፡ የካሜሩናዊ ዕጩ ተወዳዳሪ ዕገዳ ዕውን የሆነውም የአኖካ ሥራ አመራር ቦርድ ባለፈው እሑድ ሚያዝያ 29 ቀን 2009 ዓ.ም. ባደረገው አስቸኳይ ስብሰባ ባሳለፈው ውሳኔ መሆኑን የሕዝብ ግንኙነት ባለሙያው ገልጸዋል፡፡

ለካሜሩናዊ ዕገዳ በምክንያትነት የቀረበው ደግሞ ካልካባ የአኖካ ፕሬዚዳንት ሆነው መመረጥ ይችሉ ዘንድ የካሜሩን መንግሥት ሕጋዊ ባልሆነ አግባብ የአኖካ የውስጥ አሠራር ውስጥ ጣልቃ በመግባት ለካሜሩናዊ ዕጩ የቅስቀሳ ሥራ ሠርቷል በሚል እንደሆነም ተነግሯል፡፡

በአኖካ ውሳኔ መሠረት ካሜሩናዊ ካልካባ ከግንቦት 1 ቀን እስከ ሐሙስ ግንቦት 3 ቀን በጂቡቲ በሚደረገው የአኖካ ጉባኤ የካሜሩንን ብሔራዊ ኦሊምፒክ ኮሚቴ ወክለው አይሳተፉም፡፡ ከአኖካ የምረጡኝ ዘመቻ ሕገ ደንብ ውጪ ነው የተባለው የካልካባ የምርጫ ምስጢራዊ ሰነድ ሳይጠብቅ  አፈትልኮ ወጥቶ  ይፋ ሆኗልም ተብሏል፡፡

ካሜሩናዊ በበኩላቸው የአኖካ ውሳኔ ተገቢ አለመሆኑን በመጥቀስ ጉዳዩን ለዓለም አቀፍ ኦሊምፒክ ኮሚቴ (አይኦሲ) የሥነ ምግባር ኮሚሽን እንደሚያቀርቡ መናገራቸውም ተገልጿል፡፡ የአይኦሲ ፕሬዚዳንት ቶማስ ባህ በጂቡቲ እየተካሄደ ባለው የአኖካ መደበኛ ጠቅላላ ጉባኤ ላይ መታደማቸው ታውቋል፡፡