Skip to main content
x
ካዛንቺስ የወደመባትን ታሪካዊ ሕንፃ በቱሪዝም ቀን በፎቶ አሰበች

ካዛንቺስ የወደመባትን ታሪካዊ ሕንፃ በቱሪዝም ቀን በፎቶ አሰበች

የዘንድሮው የዓለም ቱሪዝም ቀን ‹‹ቱሪዝም ለዘላቂ ልማት›› በሚል መሪ ቃል በዓለም ዙሪያ ሲከበር አንዷ አክባሪ ኢትዮጵያ ናት፡፡

የዓለም ቱሪዝም ድርጅት ከአራት አሠርታት በፊት ጀምሮ በየዓመቱ ሴፕቴምበር 27 ቀን (ሦስቱን ዓመት መስከረም 17 ጳጉሜን 6 ቀን) የቱሪዝም ቀንን እያከበረው ይገኛል፡፡

ኢትዮጵያ ከሦስት አሠርታት ወዲህ ማክበር የጀመረች ሲሆን፣ በተለይ ከ2001 ዓ.ም. ጀምሮ በየክልሉ በመዘዋወር ማክበሩን ቀጥላለች፡፡ የ2010 ዓ.ም. ተረኛ አስተናጋጅም የኦሮሚያ ክልል ሆኗል፡፡

የባህልና ቱሪዝም ሚኒስቴር እንዳስታወቀውም የዘንድሮው የዓለም ቱሪዝም ቀን መታሰቢያነቱ በቅርቡ በሞት ለተለዩት የኢትዮጵያ ቱሪዝም አባት አቶ ሀብተ ሥላሴ ታፈሰ ተደርጓል፡፡

 አዲስ አበባ ከተማም ከወትሮው በተለየ መልኩ በዓሉን ከመስረከም 8 ቀን ጀምሮ በየክፍላተ ከተማው የሚገኙ ሐውልቶችን፣ ሙዚየሞችን፣ ታሪካዊና ጥንታዊ ሕንፃዎችን ኅብረተሰቡ እንዲጎበኛቸው በማድረግ እያከበረችው ትገኛለች፡፡

በቅርሶቹ ቦታ በአካል በመገኘት ከመጎብኘት ባሻገር በመዲናዋ በሚገኙ ወረዳዎች አማካይ ሥፍራ ላይ ድንኳን ተደኩኖ፣ ዳስ ተጥሎ የፎቶ ዐውደ ርዕይ ለዕይታ በቅቷል፡፡

ከነዚህም አንዱ በመሀል ካዛንቺስ የቀረበው ነው፡፡ የቂርቆስ ክፍለ ከተማ ወረዳ 8 ባህልና ቱሪም ጽሕፈት ቤት በአካባቢው (በካዛንቺስ) የሚገኙ ጥንታዊና ታሪካዊ ቤቶችን በፎቶ አቅርቧቸዋል፡፡

ከነዚህም መካል መናኸሪያ የሚገኘው የግራዝማች ጣሴ አሸብር፣ ስድስተኛ ፖሊስ ጣቢያ የሚገኘው የአቶ አጠረታ፣ ካዛንቺስ ቶታል አጠገብ የሚገኘው የፊታውራሪ ታፈሰ (የቱሪዝም አባት ሀብተ ሥላሴ አባት)  እንዲሁም ከፊ ለፊቱ ይገኝ የነበረውና የወደመው ይገኙበታል፡፡

በፋሺስት ጣሊያን ወረራ ጊዜ ከ80 ዓመት በፊት የታነፀውና የዘመኑን ኪነ ሕንፃ ገጽታ አመላካቹ ታሪካዊ ሕንፃ ሲጀመር ከካቶሊክ ቤተ ክርስቲያን ቀጥሎ የዱር አራዊት ሙዚየም እስከሚፈርስበት ጊዜ የግብርና አዳራሽ ጽሕፈት ቤት የነበረው ይኼው ሕንፃ በከተማውም በወረዳውም በቅርስነት ተመዝግቦ የተያዘ ቢሆንም፣ በእንቁጣጣሽ ዋዜማ እንዲፈርስ ተደርጓል፡፡ በሚዲያው መነጋገሪያ የነበረውን ይህ ሕንፃ ‹‹ማነው እንዲፈርስ ያደረገው?›› የሚል ፌዝም ተሰምቶበታል፡፡

ተመልካቹ የፎቶውን ዐውደ ርዕይ ከፍራሹ ፊት ለፊት በሐዘኔታ እየተመለከተ አፍራሾቹም ቀሪውን ፍራሽ ሲያስወግዱ ይታያሉ፡፡ ‹‹ቱሪዝም ለዘላቂ ልማት›› በሚል አዲስ አበባ በዓሉን እስከ መስከረም 22 ቀን እንደምታከብረው ከባህልና ቱሪዝም ቢሮ የተገኘው መረጃ ያመለክታል፡፡

የቢሮው ኃላፊ አቶ ገብረ ጻድቅ ሐጎስ ዘንድሮ በከተማዋ ጉብኝት በዋናነት ማድረግ ያስፈለገው ወጣቱ ትውልድ አካባቢውን እንዲያውቅ ለማድረግና የአገር ውስጥ ቱሪስት ፍሰትን ለመጨመር ታስቦ እንደሆነ አስታውቀዋል፡፡