Skip to main content
x
ኬንያ የምታስተናግደው የዓለም ታዳጊዎች ሻምፒዮና ዛሬ ይጀመራል

ኬንያ የምታስተናግደው የዓለም ታዳጊዎች ሻምፒዮና ዛሬ ይጀመራል

ኢትዮጵያ በ23 አትሌቶች ትወከላለች

የዓለም አቀፍ አትሌቲክስ ፌዴሬሽኖች ማኅበር (አይኤኤኤፍ) በሁለት ዓመት አንዴ በተለያዩ አገሮች ሲያከናውነው የቆየው የዓለም ታዳጊዎች አትሌቲክስ ሻምፒዮና በኬንያ ናይሮቢ ዛሬ ይጀመራል፡፡ የሜዳ ተግባራትን የሚያካትተውና ዘንድሮ ለ10ኛ ጊዜ የሚካሄደው የታዳጊዎች ሻምፒዮና አይኤኤኤፍ በተለይ ከዕድሜ ጋር በተገናኘ ልዩ ጥንቃቄ እንደሚያደርግ አስታውቋል፡፡

እ.ኤ.አ. ኖቬምበር 2015 ድረስ ‹‹የዓለም ታዳጊዎች አትሌቲክስ ሻምፒዮና›› በሚል ሲጠራ የቆየውና ከ2015 ወዲህ ግን የዓለም ከ18 ዓመት በታች አትሌቲክስ ሻምፒዮና ተብሎ ይጠራል፡፡ እንደ አይኤኤኤፍ ዘገባ ከሆነ በውድድሩ የሚሳተፉ አገሮች የሻምፒዮናው መጠሪያ ምንም እንኳ ከ18 ዓመት በታች ቢልም ከዕድሜ ጋር በተያያዘ የተወዳዳሪዎች ዕድሜ ከ17 ዓመት በታች ሊሆን እንደሚገባው በውስጥ መመርያ ለአባል ፌዴሬሽኖች አስታውቋል፡፡ ይኼን በማያደርጉ አገሮች ላይ እገዳ እንደሚጥል ማስጠንቀቂያ መስጠቱን ቅርበት ያላቸው የፌዴሬሽን ምንጮች ለሪፖርተር ገልጸዋል፡፡

ያለፉት ዓመታት ውድድሮች በአብዛኛው ከዕድሜ ጋር በተገናኘ ከፍተኛ ማጭበርበር የተደረገባቸው መሆኑን ያስታወቀው አይኤኤኤፍ፣ ይኼንኑ መነሻ በማድረግ ከዚህ ዓመት በኋላ ሻምፒዮናው በአህጉር ደረጃ ብቻ እንደሚካሄድ በ2016 የሪዮ ኦሊምፒክ ወቅት ባካሄደው የምክር ቤት ስብሰባ መወሰኑን ጭምር የኢትዮጵያ አትሌቲክስ ፌዴሬሽን አስታውቋል፡፡

ከረቡዕ ሐምሌ አምስት ጀምሮ እስከ ሐምሌ 10 ቀን 2009 ዓ.ም. ድረስ በሚዘልቀውና በኬንያ ናይሮቢ ሞይ ኢንተርናሽናል ስታዲየም በሚካሄደው የዓለም ከ18 ዓመት በታች አትሌቲክስ ሻምፒዮና፣ ኢትዮጵያ በ12 ወንዶችና በ11 ሴቶች በድምሩ በ23 አትሌቶች የምትወከል መሆኑንም ፌዴሬሽኑ ይፋ አድርጓል፡፡

እንደ ፌዴሬሽኑ መረጃ ከሆነ ኢትዮጵያ በዚሁ ሻምፒዮና ለዘጠኝ ዓመታት ተሳትፋ በሁለም በሜዳሊያ ሰንጠረዥ ውስጥ ገብታለች፡፡ በአጠቃላይም 12 ወርቅ፣ 18 ብርና 16 ነሐስ በድምሩ 46 ሜዳሊያዎችን በ25 ሴቶችና በ21 ወንድ አትሌቶች አማካይነት ማስመዝገብ መቻሏንም ተመልክቷል፡፡

በምሥራቅ አፍሪካዊቷ የአትሌቲክስ አገር ኬንያ በሚካሄደው በዘንድሮው ሻምፒዮና ኢትዮጵያ በ400 ሜትር በአንድ ወንድና በአንድ ሴት አትሌቶች መልካሙ አሰፋና ሃና አምሳሉ ትሳተፋለች፡፡ በ800 ሜትር ወንዶች ቶሎሳ ቡዴና አህመድ ሐሰን በሴቶች ደግሞ ነፃነት ደስታና ሒሩት መሸሻ ትወከላለች፡፡

በ1500 ሜትር ወንዶች የሚወዳደሩት በለጠ መኰንንና አበበ ዲሳሳ ሲሆኑ፣ በሴቶች ለምለም ኃይሉና ስንዱ ግርማ ናቸው፡፡ በ3,000 ሜትር ወንዶች ሰሎሞን ባረጋና ምልኬሳ መንገሻ ሲሆኑ፣ በሴቶች ማሪቱ ከተማና ይታይሽ መኰንን ይሳተፋሉ፡፡ በ2,000 ሜትር መሰናክል ደግሞ ግርማ ድሪባና ዓለሙ ቂጤሳ ሲሆኑ፣ በሴቶች ቤተልሔም ሙላትና መስተዋት አስማረ ናቸው፡፡ በ10,000 ሜትር እርምጃ ወንዶች መሠረት አየልኝና ምንዳ ሳግዴ ሲሆኑ፣ በ5,000 ሜትር እርምጃ ሴቶች ደግሞ ማሬ ቢተውና ስንታየሁ ማስሬ መሆናቸው ታውቋል፡፡ በርዝመት ዝላይ አዲር ጉር እንደምትወዳደር ተገልጿል፡፡