Skip to main content
x
ክቡር ሚኒስትሩ ከአማካሪያቸው ጋር ቢሯቸው ውስጥ እያወሩ ነው

ክቡር ሚኒስትሩ ተመራማሪ ከሆነ የቀድሞ ጓደኛቸው ጋር ተገናኙ

[ክቡር ሚኒስትሩ ከአማካሪያቸው ጋር ቢሯቸው ውስጥ እያወሩ ነው]

  • ክቡር ሚኒስትር ምን ሆነዋል?
  • ምን ሆንኩ?
  • ፊትዎ በጣም ጠቋቁሯል፡፡
  • ምን የማያጠቁር ነገር አለ ብለህ ነው?
  • ቤት ሰላም አይደለም እንዴ?
  • አሁን አሁን ሁሉ ነገር እያስጠላኝ መጥቷል፡፡
  • ሁሉ ነገር ሲሉ? ዘመኑ የከፍታ ነው እየተባለ?
  • ወይ ከፍታ?
  • እንዴ ክቡር ሚኒስትር? አየሩ ራሱ ከክረምት ወደ በጋ በሚቀየርበት በዚህ ወቅት ምንድን ነው እንደዚህ መሆን?
  • ወይ አዲስ ዘመን?
  • ምን ሆኑ ክቡር ሚኒስትር?
  • ስማ ለእኔ ሁሉም ነገር ነው የጨለመብኝ፡፡
  • ክቡር ሚኒስትር ዝም ብሎ ክፉ ነገር ማሰብ ጥሩ አይደለም፡፡
  • ወድጄ አይደለም ጥሩ ነገር ለማሰብ ሞክሬ ነበር፡፡
  • ምን አስበው ነበር?
  • ያው የከፍታ ዘመን ነው ብዬ በአዲስ መንፈስ ዘመኑን ለመጀመር ወስኜ ነበር፡፡
  • ታዲያ ምን ገጠመዎት?
  • ሁሉ ነገር ከፍ የሚያደርግ አይደለማ፡፡
  • እንዴት?
  • ይኸው በዚህ ዓመት ከፍ ካለው ቪ8 ወደ አነስተኛ መኪና ተዘዋወርን፡፡
  • እሱስ ልክ ነው፡፡
  • እኔ የደመወዝ ከፍታ ስጠብቅ ጭራሽ ወደ ቅነሳ መጣብን፡፡
  • ምን ያደርጉታል?
  • በቃ ስነግርህ ሁሉ ነገር ተስፋ አስቆራጭ ነው፡፡
  • እንዲህማ በቀላሉ እጅ መስጠት አያስፈልግም፡፡
  • ከምወደው ሕዝብ ጋር እንኳን መገናኘት አልቻልኩም፡፡
  • ምነው ስልክዎ ተቆረጠ እንዴ?
  • ይኸው ዊኬንድ ላይ ስንት የስልክ ጥሪ ነው የተቀበልኩት፡፡
  • ምነው ክቡር ሚኒስትር?
  • ያስለመድከን ነገር ቀረ ብሎ ስንት ሰው ነው የደወለልኝ፡፡
  • ኮሚሽን የሚሰጧቸው ሰዎች ናቸው?
  • ምን ይላል ይኼ? አጀንዳና ካላንደር መቼ አሳተምን?
  • የማተሚያ ቤቱ ሰዎች ደወሉልዎት እንዴ?
  • ለማንኛውም የከፍታው ነገር አስከፍቶኛል፡፡
  • ኧረ ይኼን ያህል አያማሩ ክቡር ሚኒስትር?
  • ስማ የአሁኑ የእኔ ኑሮ እኮ ኑሮ አይደለም፡፡
  • ምን እያሉ ነው?
  • ስማ ዛፍ ላይ እንደሚተኛ ሰው እኮ እንቅልፍ የለኝም፡፡
  • ለመሆኑ ምን ሆነው ነው?
  • ስንት ጓደኞቼ እንደታሰሩ ተመልከት፡፡
  • እሱማ ማን ቀረ?
  • እኔ የቢሮዬ በር ሲንኳኳ ጠረጴዛ ሥር መግባት ራሱ ሰልችቶኛል፡፡
  • ለምንድነው ጠረጴዛ ሥር የሚገቡት ክቡር ሚኒስትር?
  • ፖሊስ እየመጣ እየመሰለኝ፡፡
  • ታዲያ እዚያ ተሸሽገው ያመልጣሉ ብለው ነው?
  • እንዲያው የድንጋጤዬ ብዛት ነው እንጂ፣ ጉድጓድ ውስጥ ብገባም እንደማላመልጥ አውቀዋለሁ፡፡
  • ታዲያ ይኼን ያህል ሽብር ምንድነው?
  • ስማ ቀን ቀን እንደዚህ አሳልፌ ማታ እንኳን ገብቼ መተኛት አልችልም፡፡
  • ለምን ክቡር ሚኒስትር?
  • እንዲሁ ስባንን ነው የሚነጋው፡፡
  • ምን ተሻለዎት ታዲያ?
  • ሚስቴማ ፀበል ሞክር ብላኝ ነበር፡፡
  • እሱ ጥሩ ሐሳብ አይመስለኝም፡፡
  • ለምን?
  • ሰይጣኑ ቢለፈልፍ ምን ሊል እንደሚችል አስበውታል?
  • ምን ይላል?
  • አንዴ ሙስና ነኝ ሲል…
  • እ…
  • አንዴ ኪራይ ሰብሳቢ ነኝ ሲል መዋረድዎት ነው፡፡
  • እሱም አለ ለካ?
  • አንዴ ብረት ነኝ ሌላ ጊዜ ስኳር ነኝ እያለ ስንት ጉድ ነው የሚያወጣው፡፡
  • ታዲያ ምን ተሻለ? ጭራሽ ሥጋቴን ከፍ አደረግከው፡፡
  • ያው የከፍታ ዘመን ነዋ፡፡
  • ነገርኩህ በዋናነት በዚህ የከፍታ ዘመን ከፍ እያሉ ያስቸገሩኝ ሁለት ነገሮች ናቸው፡፡
  • ምንና ምን ናቸው?
  • ግፊትና ስኳሬ!

 

[ክቡር ሚኒስትሩ ተመራማሪ ከሆነ የቀድሞ ጓደኛቸው ጋር ተገናኙ]

  • ምነው ጠፉ ክቡር ሚኒስትር?
  • ሥልጠና ላይ ነበርኩ፡፡
  • የምን ሥልጠና?
  • በአገሪቷ አጠቃላይ ሁኔታ ላይ ነዋ፡፡
  • ክቡር ሚኒስትር አንድ ጥያቄ ልጠይቅዎት?
  • ይቻላል፡፡
  • በዓለም ላይ እንደ ኢሕአዴግ ሥልጠና የሚወድ ድርጅት አለ?
  • እየቀለድክ ነው?
  • እውነቴን ነው እንጂ ከዓመት ዓመት ሥልጠና ላይ ናችሁ እኮ?
  • ሕዝቡን ለማገልገል ሥልጠና ወሳኝ ነው፡፡
  • በእርግጥ ሕዝቡን ለማገልገል ነው ሥልጠና የምትቀመጡት?
  • ታዲያ ለምንድነው?
  • ለአበል ነዋ፡፡
  • ምን ይላል ይኼ?
  • ለመሆኑ ስለምንድን ነው የምትሠለጥኑት?
  • ስለአገሪቷ ልማትና ዕድገት ነዋ፡፡
  • ሁሌ አብዮታዊ ዴሞክራሲና ልማታዊ መንግሥት እንዴት ሥልጠና ይሆናል?
  • አንተ የተማርክ ሰው አይደለህ እንዴ?
  • ይጠራጠራሉ እንዴ ክቡር ሚኒስትር?
  • ሥልጠና ምን ያደርጋል እንዴት ትለኛለህ?
  • ሁሌ እንዴት ስለአብዮታዊ ዴሞክራሲና ልማታዊ መንግሥት ትሠለጥናላችሁ?
  • እውቀትህን በሥልጠና ነው የምታዳብረው፡፡
  • ለነገሩ የሞኝ ለቅሶ መልሶ መላልሶ አይደል ነገሩ?
  • ሞኝ ናችሁ እያልከን ነው?
  • ብልጥማ ብትሆኑ በአሁኑ ወቅት ከሥልጠና የሚቀድመው ሌላ ነገር ነው፡፡
  • ሌላ ምን?
  • ሕዝብን ማዳመጥ፡፡
  • ሕዝብን ለማዳመጥም እኮ ሥልጠና ያስፈልጋል፡፡
  • እሱንማ ብታደርጉ አንድ ነገር ነበር፡፡
  • ምኑን?
  • ሕዝብ ማዳመጡን፡፡
  • ማዳመጣችን አይቀርም፡፡
  • ክቡር ሚኒስትር ሕዝቡ ካመለጣችሁ በኋላ ጣጣው የከፋ ይሆናል፡፡
  • ምንድነው የምታወራው?
  • ከዓመት ዓመት ግምገማ፣ ሥልጠናና ስብሰባ ናችሁ፡፡
  • ምን ችግር አለው ታዲያ?
  • ሕዝቡን መቼ ነው የምታገለግሉት?
  • ሕዝቡን ለማገልገል አይደል እንዴ የምንገማገመውና የምንሠለጥነው?
  • ክቡር ሚኒስትር በዚህ አካሄዳችሁ አገሪቷን ወደ መጥፎ ቦታ እንዳትወስዷት?
  • ምንድነው የምታወራው?
  • ይኸው በየቦታው የሚሰማው ብጥብጥና ተቃውሞ የብዙዎች ሥጋት እየሆነ ነው፡፡
  • አየህ የጥፋት ኃይሎችን መስማት የለብህም፡፡
  • ለነገሩ አሁን አንድ ነገር እየገባኝ ነው፡፡
  • ምንድነው የገባህ?
  • የምትሠለጥኑት ለምን እንደሆነ ተረድቼዋለሁ፡፡
  • ለምንድን ነው የምንሠለጥነው?
  • ላለመሻሻል!

 

[ለክቡር ሚኒስትሩ የእህታቸው ልጅ ከኒውዮርክ ደወለላቸው]

  • ጋሼ በተደጋጋሚ ስልክ ስደውልልህ አታነሳም፡፡
  • ስብሰባ ላይ ሆኜ ነው፣ ምን ገጥሞህ ነው?
  • ቀጠሮ እንደነበረን ረሳኸው እንዴ?
  • የምን ቀጠሮ?
  • ባለፈው ደውለህ ስትፎክርብኝ አልነበረ እንዴ?
  • ምን ብዬ?
  • ለUN ስብሰባ ኒውዮርክ እመጣለሁ ብለከኝ ነበር እኮ?
  • አልሆነም ባክህ፣ በዚህኛው ጉዞ ቀጡኝ ባክህ፡፡
  • አንተም ትቀጣለህ እንዴ ጋሼ?
  • ምን ማድረግ ይቻላል ብለህ ነው?
  • እኔ እኮ ባለፈው ሚስቴ የሞባይል ቤት ከፈተች ስትለኝ በጣም ደስ ብሎኝ ተዘጋጅቼ ነበር የምጠብቅህ?
  • የምን ዝግጅት ነው?
  • ያው እታባ አስተምራ ለዚህ ስላበቃችኝ ውለታዋን በትንሹም እንኳን እመልሳለሁ ብዬ አስቤ ነበራ፡፡
  • እንዴት ማለት?
  • አንተ ባለሥልጣን ስለሆንክ ያው ሻንጣህ አይፈተሽም አይደል?
  • ምን እያልክ ነው?
  • ለሞባይል ቤቷ አንድ ሙሉ ሻንጣ ሞባይል ገዝቼ አስቀምጬ ነበር፡፡
  • ምን ታደርገዋለህ እንግዲህ?
  • እኔማ ለልጆቹ ከአራት ሻንጣ በላይ ነበር ልብስ የገዛሁት፡፡
  • አዲስ መመርያ ወጥቶ እኮ እየተጨናነቅን ነው፡፡ ሁሉም ነገር እባክህ አስጠልቶኛል፡፡
  • ምነው ጋሼ?
  • እውነቱን ብነግርህ ብመጣም…
  • እ…
  • አልመለስም ነበር!

 

[ሌላ የክቡር ሚኒስትሩ ዳያስፖራ ወዳጅ ደወለላቸው]

  • ምንድነው የምሰማው ክቡር ሚኒስትር?
  • ምን ሰማህ ደግሞ?
  • ባለፈው የውጭ አገር ኑሮ ሰልችቶኛል አላልኩዎትም ነበር፡፡
  • ነግረኸኝ ነበር፡፡
  • ወደ አገር ቤትም መመለስ እንደምፈልግ አጫውቼዎት አልነበር፡፡
  • እኔም እኮ እዚህ የተሻለ ነገር እንዳለ ነግሬሃለሁ፡፡
  • ታዲያ አሁን ምን እያደረጋችሁ ነው?
  • ይኸው እንደ አንተ ዓይነት ዳያስፖራዎች እዚህ እንዲሰበሰቡ ልማቱን እያሳለጥነው ነው፡፡
  • ቀልዱን ቢተውት አይሻልም ክቡር ሚኒስትር?
  • የምን ቀልድ ነው?
  • አሁን የምሰማው ነገር እኮ አገር ቤት እንድንመጣ የሚያደርግ ሳይሆን የሚያሸሽና የሚያስፈራ ነው፡፡
  • ምኑ ነው የሚያስፈራው?
  • ይኸው በየቦታው አይደል እንዴ ግጭትና ዕልቂት ያለው? ከዚያም በላይ አገሪቷ መረጋጋት ካቃታት ሁለት ዓመት ሊሞላ ነው፡፡ ከሁሉም በላይ ደግሞ ኢትዮጵያዊነት የሚባለው ነገር አደጋ ላይ ነው፡፡
  • ኢትዮጵያዊነት ምን ሆነ?
  • ይኸው በብሔር በመከፋፈል ኢትዮጵያዊነት አደጋ ውስጥ እየገባ ነው፡፡
  • እ…
  • በፊት እኮ እዚህ በብሔርና በጎሳ ኢትዮጵያዊ ተከፋፍሎ ቤተ ክርስቲያንና ምግብ ቤት ሲጠቀም ነበር፡፡
  • እሱንማ አውቃለሁ፡፡
  • አሁን ግን ነገሩ በዚሁ ከቀጠለ ኢትዮጵያም እንደዚያው መሆኑ አይቀርም፡፡
  • እባክህ ይኼ የጠላት ወሬ ነው፡፡
  • ይኸው በየፌስቡኩ የመንግሥት ባለሥልጣናት አይደል እንዴ መግለጫ እየሰጡ ያሉት?
  • እሱማ አንዳንድ ችግሮች አሉ፡፡
  • ክቡር ሚኒስትር በኋላ ግን ተጠያቂ መሆናችሁ አይቀርም፡፡
  • የምን?
  • የታሪክ!

 

  • [ክቡር ሚኒስትሩ አማካሪያቸውን ቢሯቸው አስጠሩት]
  • አቤት ክቡር ሚኒስትር?
  • መሥሪያ ቤታችን ላይ አንዳንድ ሥጋቶች አሉ፡፡
  • የምን ሥጋቶች?
  • መንግሥት መሥሪያ ቤታችን ላይ እያንዣበበ ነው፡፡
  • ለምን?
  • ያው ይደረጉ የነበሩ ምዝበራዎችን ሊያጣራ ነዋ፡፡
  • ያጣራ ታዲያ ማን ይፈራል?
  • ስማ የማላውቅ ይመስልሃል?
  • ምኑን?
  • እኔ የበላኋቸውን ኮሚሽኖች ስታቀባብል እንደበረ ነዋ?
  • እ…
  • ስማ አሁን መደንገጥ ሳይሆን የሚያስፈልገው፣ ስትራቴጂ ነድፈን መንቀሳቀስ አለብን፡፡
  • የምን ስትራቴጂ?
  • ሳንጠቃ ማጥቃት፡፡
  • እኮ እንዴት?
  • በአስቸኳይ በመሥሪያ ቤታችን ስለሚሠሩ ፕሮጀክቶች የሚገልጽ ሪፖርት ይዘጋጅ፡፡
  • እሺ ክቡር ሚኒስትር፡፡
  • አየህ የሚዘጋጀው ሪፖርት መሥሪያ ቤታችን ለሌሎች አርዓያ እንደሚሆን ማሳየት አለብን፡፡
  • እሺ፡፡
  • ከዚያም ባለፈ ፕሮጀክቶቹ ፎቶና ቪዲዮ ይነሱ፡፡
  • አብዛኞቹ ፕሮጀክቶች እኮ ግማሽ እንኳን አልደረሱም፡፡
  • ሪፖርቱ ከተዘጋጀ ማን መጥቶ ቼክ ያደርጋል?
  • ክቡር ሚኒስትር በአዲሱ መመርያ መሠረት ግን ሪፖርቱ ቢዘጋጅም ኅትመት ስለተከለከልን ማሳተም አንችልም፡፡ በዚያ ላይ እንደ ድሮው እንኳን በአጀንዳ መካከል የፕሮጀክቶችን ፎቶ እንኳን እንዳናስቀምጥ እሱም ተከልክሏል፡፡
  • አንተ ለስሙ ወጣት ነህ፡፡
  • ምነው ክቡር ማኒስትር?
  • ብቻ ሪፖርቱን አዘጋጅተህ ስጠኝ እኔ እለቀዋለሁ፡፡
  • በምን?
  • በፌስቡክ!