አዲሱን ድረ ገጽ ይሞክሩ!
አዲሱን ድረ ገጽ ይሞክሩ!

[ክቡር ሚኒስትሩ ጠዋት ወደ ሥራ ከመሄዳቸው በፊት ከሴት ልጃቸው ጋር እየተነጋገሩ ነው]

  • በጠዋት አጥብቀሽ እፈልግሃለሁ ያልሽኝ ለምን ይሆን?

 

  • ዳዲ ለቁምነገር ነው፡፡
  • ቁምነገር?
  • አዎ ውድ አባቴ፡፡
  • እስኪ ንገሪኝ?
  • ዩኒቨርሲቲ ጨርሼ ሥራ ከያዥኩ ሁለት ዓመት አለፈኝ፡፡
  • ልክ ነሽ ልጄ፡፡
  • አሁን ደግሞ የሕይወቴን አዲስ ምዕራፍ ልጀምር ነው፡፡
  • እሱ ደግሞ ምን ይሆን?
  • ዳዲ ማግባት እፈልጋለሁ፡፡
  • እንዴ?
  • ምነው ዳዲ?
  • አንቺ  እኮ ለትዳር ገና ነሽ ልጄ?
  • አሁን ሃያውን ለማጋመስ እየተቃረብኩ ነው አባቴ፡፡
  • ቢሆንም ገና ነሽ፡፡
  • እሱማ የታወቀ ነው፡፡
  • ምኑ?
  • ልጅ ለወላጁ መቼም ቢሆን ትንሽ እንደሆነ፡፡
  • ተሳሳትኩ ታዲያ?
  • ከ18 ዓመት በኋላ እንደሱ አይባልም ዳዲ፡፡
  • ለመሆኑ ማንን ነው የምታገቢው?
  • ቦይፍሬንዴን ነዋ፡፡
  • ይኼ ጨብራራውን?
  • ቁምነገሩ እሱ ሳይሆን ማንነቱ ነው ዳዲ፡፡
  • የምን ማንነት ነው የምትይው?
  • ሰው የመሆን ማንነት ዳዲ፡፡
  • ምን ማለት ነው?
  • ከልቡ ሰው ነው ማለቴ ነው አባቴ፡፡
  • ለመሆኑ ምን አለው?
  • ማለት?
  • አንቺን የሚያስተዳድርበት ምን አለው?
  • እሱም እንደኔ ይሠራል፡፡
  • ተቀጣሪ ነው እንዳትይኝ ብቻ?
  • ምናለበት ዳዲ?
  • ለመሆኑ ቤት አለው?
  • የለውም፡፡
  • ባንክ ውስጥ ገንዘብ አለው?
  • ለድንገተኛ መጠባበቂያ ያህል ትንሽ አለው፡፡
  • የራሱ መኪና አለው?
  • ወደፊት እንገዛለን አባቴ፡፡
  • ስንት ሚሊየነሮች እየተፈጠሩ ባለበት አገር ቺስታ ታገቢያለሽ?
  • አብረን ሠርተን ስለምናገኝ አያሳስበኝም አባቴ፡፡
  • የዘመኑ ብልጦች ሀብታም ያሳድዳሉ አንቺ ግን ደሃ ላይ ተለጥፈሻል፡፡
  • እኔ እኮ ትዳር ልያዝ አልኩኝ እንጂ ሌላ አላልኩህም ዳዲ፡፡
  • ትዳር እኮ የሚያምረው ከብር ጋር ነው፡፡
  • የእኔ ነፍስ የራባት ፍቅር ነው አባቴ፡፡
  • ቤት ከሌለው የት ልትኖሩ ነው ታዲያ?
  • ኮንዶሚኒየም እስኪደርሰን እንከራያለና፡፡
  • ባይደርሳችሁስ?
  • ኮንዶሚኒየሙ ቶሎ ቶሎ እንዲገነባ አድርጉዋ እናንተ፡፡
  • እየገነባን አይደለም እንዴ?
  • አቃተን እያላችሁ አይደል አባቴ?
  • ምን ኑው የሚያቅተን?
  • በሚፈለገው መጠን ቤት ገንብቶ ለሕዝቡ መስጠት ነዋ፡፡
  • ልማታዊ መንግሥታችን በፍጹም አያቅተውም፡፡
  • ገንዘብ መመደብ ካቅሜ በላይ ሆነ እያለ እኮ ነው አባቴ፡፡
  • ይኼ የፀረ ሰላም…
  • ኧረ አባቴ?
  • ምነው?
  • የእናንተው ሰዎች ስላሉት ዝም ብትል ይሻልሃል፡፡
  • ልጄ ከባልሽ ጋር የት ልትወድቂ ነው ታዲያ?
  • ሕዝቡ እንደሚሆነው እሆናለሁ፡፡
  • ወይ ፍርጃ?

[ክቡር ሚኒስትሩ ከቤት ሊወጡ ሲሉ ጎረቤታቸው መጡ]

  • ጎረቤቴ እንደምን ነዎት?
  • ደህና ነኝ ክቡር ሚኒስትር፡፡
  • በጠዋት ከየት ተገኙ?
  • ጉዳይ ገጥሞኝ ነው ክቡር ሚኒስትር፡፡
  • እስኪ ይንገሩኝ፡፡
  • የልጄ ነገር አሳስቦኝ ነው፡፡
  • ባለፈው ዓመት የዳሯት አንዲት ልጅዎ ምን ሆነች?
  • ለመውለድ ተቃርባለች ክቡር ሚኒስትር፡፡
  • ይኼማ በጣም ደስ ይላል፡፡
  • ድሮ ልጅ ሲወለድ ደስ ይል ነበር…
  • እንዴ አሁንስ?
  • አሁንማ ያሳቅቃል ክቡር ሚኒስትር፡፡
  • ለምን?
  • እሷና ባልዋ የገቢያቸውን ግማሽ ለቤት ኪራይ ነው የሚከፍሉት፡፡
  • እሺ እባክዎን?
  • በዚህ ላይ ለተመዘገቡት ኮንዶሚኒየም ይቆጥባሉ፡፡
  • እሺ?
  • አሁን ደግሞ ልጅ ሲወለድ ወጪያቸው ይጨምራል፡፡
  • እህ…
  • ኮንዶሚኒየም ቤት ይደርሰናል ብለው ነበር ችግሩን እየታገሱ የቆዩት፡፡
  • ልማታዊ አስተሳሰብ አላቸው ማለት ነው፡፡
  • አሁንማ መንግሥት ገንዘብ ማውጣት አልችልም መባሉ ሲሰማ ድንጋጤ ተፈጠረ፡፡
  • ሌሎች አማራጮች ይኖራሉ አይዞዎት፡፡
  • ቀደም ሲሉ ብዙ አማራጮች ሲቀርቡ መንግሥት አልሰማ አለ፡፡
  • ለምሳሌ?
  • ለአገር ውስጥና ለውጭ ኮንትራክተሮች በጨረታ ሰጥቶ ቢያስገነባ ይኼ ሁሉ ትርምስ አይፈጠርም ነበር፡፡
  • እንዴት?
  • መንግሥት በጀት መዳቢ፣ ተቆጣጣሪ፣ የግንባታ ማቴሪያል አቅራቢ፣ ወዘተ መሆን አልነበረበትም፡፡
  • ምን ቢሆን ጥሩ ነው?
  • ጠንካራ ፖሊሲ ቢወጣ እኮ የተሻለ ገቢ ያለው ቢፈልግ በሪል ስቴት፣ ካልፈለገ በማኅበር እንዲደራጅ ማድረግ፡፡
  • ዝቅተኛ ገቢ ላላቸውስ?
  • ኩባንያዎችን ከባንኮች ጋር አቆራኝቶ በሞርጌጅ አሠራር እንዲገነቡ ማድረግ፡፡
  • ስለዚህ?
  • ከ12 ዓመት በኋላ ድንገት ብቅ ብሎ ገንዘብ ማቅረብ አቃተኝ ማለት ያስደነግጣል ክቡር ሚኒስትር፡፡
  • ልማታዊ መንግሥታችን ለችግሩ መፍትሔ አያጣም፡፡
  • ክቡር ሚኒስትር መደማመጥ ቢኖር እኮ መተራመስ አይኖርም ነበር፡፡
  • መንግሥት አያዳምጥም እያሉ ነው ጎረቤቴ?
  • አዎን ክቡር ሚኒስትር፡፡
  • የተሳሳቱ ይመስለኛል፡፡
  • እኔ ልሳሳት እችላለሁ፡፡ ይኼ ሁሉ ቤት ፈላጊ ሕዝብ ግን የሚሳሳት አይመስለኝም፡፡
  • አሁን ምን ይደረግ ታዲያ?
  • መፍትሔው አንድ ብቻ ነው፡፡
  • ምን ይሆን እሱ?
  • በጥናት ላይ የተመሠረተ ፖሊሲ ለመቅረፅ…
  • ምን?
  • ብቃትና ሥነ ምግባር ያላቸውን መሾም፡፡
  • ምን ማለት ይሆን ይኼ ደግሞ?
  • ‹‹ከሰው መርጦ ለሹመት ከእንጨት መርጦ ለታቦት›› ይባላል፡፡
  • ወይ ጉድ፡፡

[ክቡር ሚኒስትሩ ቢሮ እንደደረሱ አማካሪያቸው ተከትሏቸው ገባ]

  • ምንድነው በጠዋት የሚያሯሩጥህ?
  • ክቡር ሚኒስትር ትናንት አንድ ዘመዴን ልጠይቅ ሄጄ ነበር፡፡
  • የት ነው የሄድከው፡፡
  • ቱሉዲምቱ ኮንዶሚኒየም ሳይት ክቡር ሚኒስትር፡፡
  • በጣም ትልቅ ሳይት ነው አሉ፡፡
  • በጣም ትልቅ ነው ግን…
  • ግን ምን?
  • በጣም የሚያማምሩ ቤቶች ያሉትን ያህል…
  • እና?
  • ክቡር ሚኒስትር አንዳንዶች ያየሁዋቸው ያሳቅቃሉ፡፡
  • እንዴት?
  • በባለሙያ ያልተገነቡ የሚመስሉ የተጣመሙና የተወለጋገዱ ብሎኮች ይታያሉ ክቡር ሚኒስትር፡፡
  • ይኼን ያህል?
  • ክቡር ሚኒስትር ውስጣቸው ሲገቡ ደግሞ የበለጠ ይደነግጣሉ፡፡
  • እንዴት እባክህ?
  • ጣሪያ፣ ግድግዳና ወለላቸውን ቢያዩ ቤት መሆናቸውን ይጠራጠራሉ፡፡
  • ምን?
  • የፍሳሽ ማስተላለፊያና የኤሌክትሪክ ኬብሎችን አቀባበር ቢያዩ ራስዎን ይዘው ይጮሃሉ፡፡
  • ተቆጣጣሪ የለም ማለት ነው?
  • እሱ አይደል እንዴ የሚያስደነግጠው ክቡር ሚኒስትር?
  • ሌላ የምትለው አለህ?
  • የጥራት ጉድለት አልበቃ ብሎ መንግሥት ወደፊት ገንዘብ እንደማያቀርብ መሰማቱ ድንጋጤ ፈጥሯል፡፡
  • ይኼን ያህል?
  • ከዚህ ሁሉ ዓመት በኋላ እንዲህ ሲባል ያስደነግጣል እኮ?
  • ምናልባት ሌላ የታሰበ ነገር ቢኖርስ?
  • ክቡር ሚኒስትር አማራጭ ሳያቀርብ አቃተኝ ማለት እኮ ብስጭት ይፈጥራል፡፡
  • አንተም እንደ ማንም ሰው ዝም ብለህ ታወራለህ እንዴ?
  • ክቡር ሚኒስትር እንዴት ላውራ ታዲያ?
  • እንደ አስፈጻሚ ነው ማውራት ያለብህ፡፡
  • ምን ብዬ ክቡር ሚኒስትር?
  • ልማታዊ መንግሥታችን መፍትሔ አለው እያልክ ነዋ፡፡
  • ይኼ አባባል እኮ መሰላቸት እየፈጠረ ነው ክቡር ሚኒስትር?
  • የምን መሰላቸት?
  • ያወራሉ እንጂ በተግባር አያሳዩም እየተባለ ነዋ ክቡር ሚኒስትር፡፡
  • ወይ ጣጣ፡፡

[ክቡር ሚኒስትር በስልክ ከባለቤታቸው ጋር እያወሩ ነው]

  • ልጃችን የነገረችሽ ነገር አለ?
  • ምንድነው የምትነግረኝ?
  • ዛሬ ጠዋት የሆነ ነገር ነግራኝ ነበር፡፡
  • ምንድነው እሱ?
  • አልሰማሁም እንዳትይ ብቻ?
  • አንተው ንገረኛ፡፡
  • ላገባ ነው አለችኝ፡፡
  • ምን?
  • ባል ልታገባ ነው፡፡
  • የእኔ ልጅ?
  • ኧረ እባክሽ የሁለታችንም ናት፡፡
  • ማንን ነው የምታገባው?
  • ቦይፍሬንዷን ነዋ፡፡
  • የትኛውን?
  • ስንት ታውቂያለሽ?
  • የዘመኑ ልጆች ዛሬ ካንዱ፣ ነገ ደግሞ…
  • ምን?
  • መቀያየር ይወዳሉ ለማለት ነው፡፡
  • የእኔ ልጅ ግን ጨዋ ናት፡፡
  • እሺ ትሁንልህ፡፡
  • እና ተዘጋጂ፡፡
  • ለምኑ?
  • ለሠርጉ ነዋ፡፡
  • ማንን ነው የምታገባው?
  • ያንን ጨብራራ ፀጉር ያለውን ነው፡፡
  • እሱ ደግሞ ምን አለው?
  • እሷን ጠይቂያት፡፡
  • እኔ ከእሷ ጋር አልዳረቅም ንገረኝ፡፡
  • እንደሷ ደመወዝተኛ ነው፡፡
  • ኧረረረ…
  • ምነው?
  • አይሞከርም፡፡
  • እንዴት?
  • ስንት ሀብታም በሞላበት አገር…
  • ለማን ልትድሪያት አሰብሽ
  • እሱን ለእኔ ተወው፡፡
  • አንቺ የምትችያት አይመስለኝም፡፡
  • ዓይኔ እያየ ከማንም ሞላጫ ደሃ ጋር አትጋባም፡፡
  • እንግዲያው ከቻልሽ ይቅናሽ፡፡
  • ለመሆኑ ቤት አለው?
  • የለውም፡፡
  • መኪና አለው?
  • የለውም፡፡
  • ገንዘብስ?
  • የለውም፡፡
  • ባለ ባዶ ኪስ ባል አይሆናትም፡፡
  • ምን ይሆናል ታዲያ?
  • ጥገኛ በለው፡፡
  • ኧረ ሰው እንዳይሰማሽ?
  • ይኼ ኮንዶሚኒየም የሌለው እንዴት ልጄን ያገባል?
  • እሷ ግን ሁሉንም አብረን እናሟላለን ብላለች፡፡
  • ኧረ አታበሳጨኝ እባክህ?
  • ምን ሆነሻል?
  • እኔ እኮ አንቀባርሬ ያሳደግኳት…
  • እህ?
  • የኮንዶሚኒየም ወረፋ እንድትጠብቅ አይደለም ገባህ?
  • እሷ ግን ሕዝብ እንደሆነው እንሆናለን ብላለች ገባሽ?
  • ይኼንን እዚያ ሄደሽ አውሪ በላት፡፡
  • የት ነው የምታወራው?
  • ድድ ማስጫ፡፡
  • የት ነው እሱ?
  • ሥራ ፈቶች ሠፈር፡፡
  • አንቺ ያምሻል እንዴ?
  • እኔ ጤነኛ ነኝ፡፡
  • ጤነኛ ከሆንሸ ውሳኔዋን ማክበር አለብሽ፡፡
  • ጤነኛ የወፈፌ ውሳኔ የማክበር ግዴታ የለበትም፡፡
  • አንቺ ወይም እሷ ጤነኛ መሆናችሁ እያጠራጠረኝ ነው፡፡
  • ተወው አንተ ራስህ ችግር አለብህ፡፡
  • እኔ ደግሞ ምን አደረግኩ?
  • ወላዋይ ነህ፡፡
  • እኔ ወላዋይ ነኝ?
  • ባለፈው ምን ብለው ነበር የገመገሙህ?
  • እኔን?
  • እኔን ነው ታዲያ?
  • ምን ተብዬ ተገመገምኩ?
  • አቋምህ ይዋዥቃል አልተባልክም?
  • እና?
  • አሁን የእኔ ተራ ነው፡፡
  • ምን ለመሆን?
  • ልጄ ከነጣ ደሃ ጋር አትጋባም፡፡
  • እንቢ ብትልስ?
  • እገዛላታለሁ፡፡
  • ምንድነው የምትገዢው?
  • ሀብታም፡፡
  • ከየት?
  • ዕድሜ ለፎርብስ!
  • ሆሆሆ….