ክቡር ሚኒስትር

[የክቡር ሚኒስትሩ ሚስት በጣም ተደስተው ከባለቤታቸው ጋር እያወሩ ነው]

  • ገዳም እኮ ነህ አንተ፡፡
  • አልገባኝም?
  • በቃ እግርህ እርጥብ ነው፡፡
  • ኧረ እኔ እግሬን ጠርጌ ነው የገባሁት፡፡
  • አንተ ደግሞ ሁሌ አይገባህም፡፡
  • ምኑ ነው የማይገባኝ?
  • ሁሉም ነገር፡፡
  • እንዴት ማለት?
  • እኔ የምልህ ሌላ አንተ የምታወራው ሌላ፡፡
  • እግሬ ደረቅ ነው እኮ ነው ያልኩሽ?
  • እኔ መቼ ስለእግርህ አወራሁ?
  • እርጥብ ነው አላልሽኝም እንዴ?
  • ኧረ ነቃ በል ሰውዬ በእናትህ?
  • የተኛው እመስላለሁ እንዴ?
  • ለዛሬም ለጥ ብለሃል እንጂ፡፡
  • ምን ትቀባጥሪያለሽ?
  • እኔ አይደለሁ እንዴ ሁሌ የምቀሰቅስህ?
  • ምን ነካሽ እኔ አይደል እንዴ ሁሌ ቀድሜ የምነሳው?
  • ይህን እኮ ነው የምልህ?
  • ምንድን ነው የምትይኝ?
  • ሁሉንም ነገር በቀጥታ አትመልከት፡፡
  • ታዲያ ተንጋድጄ ልመልከት?
  • እንደሱ ማን አለህ?
  • እና ምን እያልሽኝ ነው?
  • ከተለያየ አቅጣጫ ተመልከተው፡፡
  • እ…
  • በአንድ አቅጣጫ የሚያየው እንትን ብቻ ነው፡፡
  • ምን?
  • የጋሪ ፈረስ፡፡
  • እኔ ጠፋሁ፡፡
  • ምነው?
  • ትዘረጥጭኝ ጀመርሽ?
  • እየዘረጠጥኩህ ሳይሆን እያነቃሁህ ነው፡፡
  • መቼ ተኛሁ?
  • ሰውዬ ምንም አይገባህም እንዴ?
  • አንቺ ራሱ ምንም እየገባሽኝ አይደለም፡፡
  • ለምንድን ነው ደስ ያለሽ ብትለኝ እኮ እነግርህ ነበር፡፡
  • እሺ ለምንድን ነው ደስ ያለሽ?
  • ዕድለኛ ነህ እያልኩህ ነው እኮ፡፡
  • ለምኑ?
  • ይኸው ገና ከመግባትህ ደመወዝ ተጨመረላችሁ አይደል?
  • ለዚህ ነው?
  • ስማ እንደ ልጅ ያሳደግካት የእህትህ ልጅ ልታገባ እንደሆነ ታውቃለህ?
  • አዎን አውቃለሁ፡፡
  • እኔ ምን እንሰጣታለን ብዬ ስጨነቅ ነበር፡፡
  • ምንድን ነው የምንሰጣት?
  • በሕይወቷ የማትረሳውን ስጦታ ነዋ የምንሰጣት፡፡
  • እኮ ምን?
  • ባለሦስት መኝታ ቤት አፓርትመንት፡፡
  • ምን?
  • ሪል ስቴት ልትወጣ እንደሆነ ታውቃለህ?
  • ምንድን ነው የምታወሪው?
  • መቼም ጐጆ ልትወጣ ነው አልልህም በዚህ ዘመን?
  • ሴትዮ ግን ጤነኛ ነሽ?
  • በሚገባ እንጂ፡፡
  • ከየት አምጥቼ ነው ባለሦስት መኝታ ቤት አፓርትመንት የምገዛላት?
  • ደመወዝ ሊጨምር ነው እኮ፡፡
  • ታዲያ ደመወዜ ቢጨመር ቤት ይገዛል ማን ነው ያለሽ?
  • አይገባህም እንዴ ሰውዬ?
  • ምኑ?
  • ያኛውም ስኬል አብሮ ያድጋል እኮ፡፡
  • የትኛው ስኬል?
  • የኮሚሽኑ!

[ክቡር ሚኒስትሩ አማካሪያቸውን አስጠሩት]

  • አቤት ክቡር ሚኒስትር፡፡
  • ስማ ደመወዝ ሊጨመር እንደሆነ ታውቃለህ አይደል?
  • አዎን ክቡር ሚኒስትር፡፡
  • በዚያውም ልክ የእኛ ኃላፊነት ሊጨምር ይገባል፡፡
  • እውነት ነው፡፡
  • ሕዝብ ትልቅ አደራ ነው የጣለብን፡፡
  • አውቃለሁ ክቡር ሚኒስትር፡፡
  • ኢትዮጵያ ታላቅ አገር እንደሆነች ታውቃለህ አይደል?
  • በምን?
  • በሁሉም ነገር፡፡
  • መቼ?
  • በፊት ነዋ፡፡
  • እእእ…
  • ያን ታላቅነቷን ማስመለስ አለብን፡፡
  • ፀጉርዎት እኮ ብሎንድ ቢሆን ትራምፕ ነበር የምልዎት፡፡
  • እንዴት?
  • እሱም አሜሪካን ደግመን ታላቅ እናደርጋታለን እያለ አይደል?
  • ስማ ኢትዮጵያ ደግማ ታላቅ እንዴት እንደምትሆን ታውቃለህ?
  • አላውቅም፡፡
  • በርካታ ሥራ አጥ ወጣቶች አሉን፡፡
  • ግልጽ ነው ክቡር ሚኒስትር፡፡
  • ወጣቱን ሳንይዝ ደግሞ ዕድገት የማይታሰብ ነው፡፡
  • በትክክል፡፡
  • ስለዚህ ለወጣቱ የሥራ ዕድል መፍጠር አለብን፡፡
  • ለዚያ አይደል እንዴ የ10 ቢሊዮን ብር ፈንድ የተዘጋጀው?
  • አየህ ለወጣቱ ብር ብቻ ምንም አያደርግለትም፡፡
  • ማለት?
  • አንድ ስትራቴጂ መከተል አለብን፡፡
  • ምን ዓይነት ስትራቴጂ?
  • አትቸኩል፡፡
  • እሺ ክቡር ሚኒስትር፡፡
  • ከዚያም ባለፈ አገሪቷ የውጭ ምንዛሪ እጥረት አለባት፡፡
  • እሱም ግልጽ ነው፡፡
  • ይህ የምንዛሪ እጥረት ካልተቀረፈ ኢኮኖሚው ሊጎዳ ይችላል፡፡
  • ልክ ብለዋል፡፡
  • በአጠቃላይ በርካታ ችግሮች አሉብን፡፡
  • አዎን ክቡር ሚኒስትር፡፡
  • ያለብንን ችግሮች ለመቅረፍ አንድ መፍትሔ አለ፡፡
  • ምን ዓይነት መፍትሔ?
  • ይኼን መፍትሔ በአገር አቀፍ ደረጃ መጠቀም አለብን፡፡
  • ቢፒአርን መልሰን እናምጣው እንዳይሉኝ?
  • መቼ ወጣኝ?
  • ቢኤስሲን ነው የሚሉኝ ታዲያ?
  • እሱንም አልወጣኝም፡፡
  • ታዲያ ምን እያሉ ነው?
  • መገንባት ነው ያለብን፡፡
  • አቅማችንን ነው?
  • የለም፣ የለም፡፡
  • ታዲያ ምንድን ነው የምንገነባው?
  • ኢንዱስትሪ ፓርክ!

[ክቡር ሚኒስትሩ በጥልቅ የመታደስ ስብሰባ ላይ ተቀምጠው እየተገመገሙ ነው]

  • ክቡር ሚኒስትር፡፡
  • አቤት፡፡
  • ከተሾሙ ብዙ አልቆዩም፡፡
  • አሁንማ ሰነባበትኩ፡፡
  • የሾምንዎት ለምን እንደሆነ ያውቃሉ?
  • ሕዝብን እንዳገለግል ነዋ፡፡
  • እርስዎ ግን ራስዎን እያገለገሉ ነው፡፡
  • እኔም እኮ ያው የሕዝቡ አካል ነኝ፡፡
  • እስቲ በራስዎ አንደበት ያደረጉትን ያውሩ፡፡
  • ብዙ ነገር አላደረግኩም፡፡
  • እስቲ ትንሿን ነገር ይንገሩን፡፡
  • ያው ልጄን አንድ ባለሀብት ስፖንሰር አድርጐልኛል፡፡
  • ይቀጥሉ፡፡
  • አንድ ሁለት ቤትም ተገዝቶልኛል፡፡
  • እሺ፡፡
  • ሌላ ምን አለ ብለህ ነው?
  • እንደ ጀመሩ ይጨርሱት ክቡር ሚኒስትር፡፡
  • ቪ8ም ተሰጥቶኛል፡፡
  • ጥሩ ይቀጥሉ፡፡
  • ሌላ ምን አለ?
  • ይቀጥሉ ስልዎት?
  • ውጭ አካውንት አስከፍቻለሁ፡፡
  • እሺ፡፡
  • እኔ የማስታውሳቸው እነዚህ ናቸው፡፡
  • ሌላ የለም?
  • ለጊዜው ትዝ አላለኝም፡፡
  • ክቡር ሚኒስትር ታዲያ ከተሾሙበት ዓላማ ጋር የሚሄድ ነገር ነው ያደረጉት?
  • ያው እኔ ካልተመቸኝ ሕዝቡም አይመቸውም ብዬ ነው እኮ?
  • ይኼ እኮ የሥልጣን ብልግና ነው፡፡
  • እኔ እንኳን ጨዋ ነበር ያሳደገኝ፡፡
  • ታዲያ ምን ሆነው ነው የባለጉት?
  • ወንበሩ ነው የሚያባልገው፡፡
  • ባለጌ ወንበር ላይ ነው እንዴ ተቀምጠው ሥራ የሚሠሩት?
  • እነዚህን እንኳን የሠራሁት እዚያ ባለጌ የሚሉት ወንበር ላይ ተቀምጬ ነው፡፡
  • ስለዚህ ዕርምጃ ይወሰድብዎታል፡፡
  • የምን ዕርምጃ?
  • በሕግም ይጠየቃሉ፡፡
  • እኔ ግን ሐሳብ አለኝ፡፡
  • የምን ሐሳብ?
  • እኔ እንዲያውም በክብር ነው መሸኘት ያለብኝ፡፡
  • ለምን ሲባል?
  • ልምድ መውሰድ አለብና፡፡
  • ከማን?
  • ከጋምቢያ!

[ክቡር ሚኒስትሩ ከሾፌራቸው ጋር ወደ ቤት እየሄዱ ነው]

  • ክቡር ሚኒስትር ዛሬ ፖሊስ ጣቢያ ሄጄ ነበር፡፡
  • እ…
  • ምነው ደነገጡ?
  • ምን ልታደርግ ሄድክ ብዬ ነዋ?
  • ወንድሜ ከሰው ጋር ተጣልቶ፡፡
  • እሺ፡፡
  • እናም ወንድሜ ሰው ደብድቦ ሁለት ጥርስ አረገፈ፡፡
  • አሰሩት ታዲያ?
  • ማሰር አትችሉም አልኳቸው፡፡
  • ለቀቁት ታዲያ?
  • ወዲያው ነዋ፡፡
  • እንዴት ለቀቁት?
  • የላቸውማ፡፡
  • ምን?
  • ማስረጃ!

[የክቡር ሚኒስትሩ ስልክ ጠራ]

  • ሄሎ ክቡር ሚኒስትር፡፡
  • ማን ልበል?
  • ፖሊስ ነኝ፡፡
  • ምን?
  • ይፈለጋሉ?
  • ለምን?
  • ለጥያቄ፡፡
  • ልትጠይቀኝ አትችልም፡፡
  • ለምን?
  • የለህማ፡፡
  • ምን?
  • ማስረጃ!