ክቡር ሚኒስትር

 

[የክቡር ሚኒስትሩ ጸሐፊ ቢሯቸው ገባች]

  • ሰላም ክቡር ሚኒስትር፡፡
  • እንዴት ነሽ?
  • በጣም ስፈልግዎት ነበር፡፡
  • ለምን?
  • ሰሞኑን ምነው ቢሮ አልገቡም?
  • ስብሰባዎች ነበሩብኛ፡፡
  • ከዛሬ ነገ ይገባሉ እያልኩኝ ስጠብቅዎት ነበር፡፡
  • ይኼን ያህል?
  • አዎን ክቡር ሚኒስትር፡፡
  • ምን ገጥሞሽ ነው?
  • በጣም ወሳኝ ጉዳይ፡፡
  • እኮ ምን?
  • አንድ የእኛ ጥበቃ ነበር፡፡
  • እሺ፡፡
  • ባለትዳርና የሦስት ልጆች አባት ነበር፡፡
  • ኦኬ፡፡
  • እዚህ እኛ ጋ ክበብ የምትሠራ ልጅ ነበረች፡፡
  • እሺ፡፡
  • ጥበቃውን አወቁት በጣም ረጅሙ ማለቴ ነው፡፡
  • ያወቅኩት መሰለኝ፡፡
  • ልጅቷንስ አወቋት?
  • ኧረ አላወቅኳትም፡፡
  • ለነገሩ እርስዎ ክበብ አይጠቀሙም፡፡
  • አሁን ፖለቲካሽን ትተሽ ወደ ጉዳዩ፡፡
  • እና ይኸውልዎት ሁለቱ ግንኙነት ይጀምራሉ፡፡
  • አንድ መሥሪያ ቤት አይደል እንዴ የሚሠሩት ቢገናኙ ምን ችግር አለው?
  • የሥራ ግንኙነት አይደለም የምልዎት?
  • ታዲያ የጥቅም ግንኙነት ነው?
  • ኧረ እንደሱም አይደለም፡፡
  • ታዲያ ምን ዓይነት ግንኙነት ነው?
  • ሁለቱም እፍ ይላሉ፡፡
  • እ….
  • ከዛም ልጅቷ ኦፕ ትላለች፡፡
  • ምንድን ነው የምታወሪው?
  • አልገባዎትም ክቡር ሚኒስትር?
  • እፍ፣ ኦፕ እያልሽኝ ምን ይገባኛል?
  • ልጅቷ ከጥበቃው ጋር በፍቅር አብዳ አረገዘች እያልኩዎት ነው፡፡
  • እሺ፡፡
  • እና ይኸው የሦስት ወር እርጉዝ ናት፡፡
  • ይኸው ነው?
  • ኧረ ሌላም አለ፡፡
  • ምንድን ነው ሌላው?
  • የእኛን አትክልተኛ ያውቁታል አይደል?
  • አዎን፡፡
  • እሱ ደግሞ ይኸው ከአንደኛው ሾፌር ጋር ከተጣላ ሰነባበተ፡፡
  • በምን?
  • አትክልተኛው ውኃ ሲያጠጣ መኪናውን ረጨበት፡፡
  • እ…
  • እና በዛ ተነጋግረው ይኸው ተኮራርፈዋል፡፡
  • ሌላ አለሽ?
  • ይኸው ነው ክቡር ሚኒስትር፡፡
  • ለመሆኑ ባለፈው የሰጠሁሽን ሪፖርት ጽፈሽዋል?
  • አይ አልጻፍኩትም፡፡
  • ለምን?
  • አሁን አደርሰዋለሁ ክቡር ሚኒስትር፡፡
  • የመጨረሻ ስብሰባችን ቃለ ጉባዔስ ተጽፏል?
  • እሷ ቀላል ናት ብዬ አልጀመርኳትም፡፡
  • ከዛሬ ጀምሮ መመርያ ይወጣል፡፡
  • የምን መመርያ?
  • ማንኛውም ሠራተኛ ጊዜውን በዚህ እንዳያጠፋ የሚል፡፡
  • በምን ክቡር ሚኒስትር?
  • በአርቲ ቡርቲ!

[ለክቡር ሚኒስትሩ የውጭ ስልክ ተደወለላቸው]

  • ሄሎ!
  • ሄሎ ጋሼ፡፡
  • ማን ልበል?
  • አላወቅከኝም ጋሼ?
  • አላወቅኩም ማን ልበል?
  • የወንድምህ ልጅ ነኝ፡፡
  • እንዴ ከአሜሪካ?
  • አዎን ጋሼ፡፡
  • ከየት ተገኘህ ዛሬ?
  • ባለፈው ስደውልልህ አላነሳህልኝም፡፡
  • ስብሰባ ላይ ሆኜ ይሆናላ፡፡
  • እንዴት ነህ ጋሼ?
  • ሰላም ነኝ፤ አንተ እንዴት ነህ?
  • ምን ይኸው ይኼ ሰውዬ ጤና ነስቶናል፡፡
  • ማን ነው እሱ?
  • ትራምፕ ነዋ፡፡
  • ምን አደረገ?
  • ሰሞኑን ዜና አልተመለከትክም እንዴ?
  • ምን ስብሰባ ስለሚበዛብኝ ቤት ስገባ በጣም ይደክመኛል፡፡
  • ዓለምን እያመሳት አይደል እንዴ?
  • ምን አድርጎ?
  • ይኸው እያባረረ እኮ ነው፡፡
  • ሙሰኞችን ነው?
  • የሰባት አገር ዜጎች አሜሪካ እንዳይገቡ ብሏል፡፡
  • ኢትዮጵያ አለችበት እንዴ?
  • ምነው ልትመጣ ነው እንዴ?
  • አንድ ስብሰባ እዛ አለኝ፡፡
  • በቃ እኔ ልቀድምህ እችላለሁ፡፡
  • ማለት?
  • እኔ ቀድሜ ኢትዮጵያ ልመጣ እችላለሁ፡፡
  • ከሰባቱ ውስጥ እኛ አለንበት?
  • ጎረቤቶቻችን ነው ያሉበት ግን…
  • ግን ምን?
  • እኛም ልንካተት እንችላለን፡፡
  • እና ምን እያልከኝ ነው?
  • ወደ ኢትዮጵያ መመለስ እፈልጋለሁ፡፡
  • ለምን?
  • መቼም በአገሪቷ ዕድገት ተደምሜ እንዳልሆነ ታውቃለህ፡፡
  • እና እዚህ ምን ትሠራለህ?
  • እሱን እንድንማከር እኮ ነው አደዋወሌ፡፡
  • ታዲያ ምን ልርዳህ?
  • ይኸውልህ ጋሼ ሐዋሳ አንድ መሬት አለኝ፡፡
  • እሺ፡፡
  • እሷን ልሽጣትና አዲስ አበባ አንድ መሬት ልግዛ፡፡
  • ኦኬ፡፡
  • ስለዚህ አንተ መሬቱን አዘጋጅ፡፡
  • እ…
  • ከዚያ አሪፍ ሕንፃ መሥራት ነው፡፡
  • እሺ፡፡
  • እና ከሚስትህ ጋር ፓርትነር ሆነን እንሠራለን፡፡
  • ጥሩ ሐሳብ ይመስላል፡፡
  • ከዚያ እያከራየን መኖር ነው፡፡
  • ልንሰበስብ?
  • ምን?
  • ኪራይ!

[ክቡር ሚኒስትሩ ከሚስታቸው ጋር ቤት ምሳ እየበሉ እያወሩ ነው]

  • ሰሞኑን ምነው ጠፋህ?
  • ስብሰባ በዝቶብኝ ነው፡፡
  • አንድ ነገር ላማክርህ ስፈልግህ ነበር፡፡
  • ምንድን ነው?
  • ሰሞኑን አንድ ነጋዴ ጓደኛዬን አግኝቻት ነበር፡፡
  • እሺ፡፡
  • አንድ ሥራ እንድሠራ ነግራኛለች፡፡
  • የምን ሥራ?
  • ሥራው በጣም አትራፊ ነው ብላኛለች፡፡
  • ምንድን ነው እሱ?
  • ሰሞኑን ዱባይ ሴል ወጥቷል፡፡
  • እሺ፡፡
  • በቃ ዕቃ ጥንቡን ጥሏል፡፡
  • ምን ዓይነት ዕቃ?
  • ሁሉም ዓይነት፡፡
  • እሺ፡፡
  • በቃ ከዛ በኮንቴይነር አስጭነህ እዚህ መቸብቸብ ነው፡፡
  • አይ አንቺ?
  • ምነው?
  • ሁሉ ነገር ለአንቺ ቀላል ነው አይደል?
  • ምን ከባድ ነገር አለ ብለህ ነው?
  • ገንዘቡ ከየት ይመጣል?
  • ገንዘቡንማ ለእኔ ተይው ብላኛለች፡፡
  • ገንዘቡ ቢገኝ ዶላሩ ከየት ይመጣል?
  • አንድ የማይገባኝ ነገር አለ፡፡
  • ምንድን ነው የማይገባሽ?
  • በየጊዜው ከባንክ ፕሬዚዳንቶች ጋር እራት በላሁ ምናምን ትለኝ አይደል እንዴ?
  • እ…
  • ለዚህ ካልጠቀሙህ ከርስህን መሙላት ብቻ ምን ይጠቅማል፡፡
  • አንቺ ሴትዮ፡፡
  • ለማንኛውም አሁን የምሄድበት ቦታ አለ፣ በኋላ እናወራለን፡፡
  • የት ልትሄጂ ነው?
  • ለካ ይኼ ስብሰባ አለ፡፡
  • የምን ስብሰባ?
  • የመሪዎቹ ስብሰባ ነዋ፡፡
  • እዛ ነው እንዴ የምትሄጂው?
  • ኧረ መንገድ ይዘጋል ብዬ ነው፡፡
  • እኔ ፓስ አሰጥሻለሁ፡፡
  • ምን ዓይነት ፓስ?
  • VIP የሚለውን ነዋ፡፡
  • እኔ የምፈልገው ያኛውን ነው፡፡
  • የትኛውን?
  • VVIP!

[የክቡር ሚኒስትሩ ልጅ ሲኤንኤን እያየ ነው]

  • አንተ ልጅ መቼ ነው የምትሄደው?
  • የት ዳዲ?
  • አሜሪካ ነዋ፡፡
  • ኧረ አልሄድም፡፡
  • ለምን ሲባል?
  • ይኼ ትራምፕ የሚባል ሰውዬ የሚሠራውን እያየህ?
  • አንተ እኮ ልትማር ነው የምትሄደው?
  • ቢሆንም ሪስክ መውሰድ አልፈልግም፡፡
  • ታዲያ አውሮፓ ዩኒቨርሲቲ ይፈለግልህ?
  • እዛም መሄድ አልፈልግም፡፡
  • ቻይና ይሻልሃል ታዲያ?
  • እኔ እኮ ካድሬ አይደለሁም፡፡
  • ምን?
  • ቻይና የሚላኩት ካድሬዎች አይደሉም እንዴ?
  • እና እዚሁ ትማራለህ?
  • ሥራ ብጀምር ይሻላል፡፡
  • የምን ሥራ?
  • አንተ ሚኒስትር ነህ አይደል ዳዲ?
  • ብሆንስ?
  • ለመንግሥት ቅርብ ሰው ነህ፡፡
  • እሺ፡፡
  • እንደምንም ብለህ ማሽን ግዛልኝ፡፡
  • የምን ማሽን?
  • የኮንስትራክሽን ማሽን፡፡
  • እሺ፡፡
  • ከዛ ማሽኔን የመንግሥት ፕሮጀክት ጋ ታስገባልኛለህ፡፡
  • እ…
  • ቀስ ብለህ ደግሞ በባንክ ብድር ተጨማሪ ማሽኖችን ትገዛልኛለህ፡፡
  • እ…
  • ከዛ እግሬን ሰቅዬ መብላት ነው፡፡
  • ወይ ጉድ፡፡
  • ምንም አታስብ ዳዲ፡፡
  • ስማ መማር አለብህ፡፡
  • ዳዲ የእኔ ፍላጎት ሌላ ነገር መሆን ነው፡፡
  • ምን መሆን ነው?
  • ልማታዊ ባለሀብት!