ክቡር ሚኒስትር

[ክቡር ሚኒስትሩ ከሚስታቸው ጋር እያወሩ ነው]

  • ስማ አንድ ሐሳብ መጥቶልኛል፡፡
  • የምን ሐሳብ?
  • ከወር በላይ ነው ያሰብኩበት፡፡
  • እኮ ምንድን ነው?
  • የሚገርም የቢዝነስ ሐሳብ ነው፡፡
  • በቃ ሙሉ ጊዜሽን ቢዝነስ ለመሥራት ወሰንሽ?
  • ስማ አንተ እኮ ስነግርህ ልትሰማኝ አልቻልክም፡፡
  • ምኑን?
  • አሁን የሚያዋጣው ቢዝነስ ነው፡፡
  • እሱማ ግልጽ ነው፡፡
  • ስለዚህ እሱን ብናጠናክር ነው የሚሻለን፡፡
  • እሺ ምን አሰብሽ?
  • አሁን አንድ ትልቅ በዓል አለ፡፡
  • ገና አለፈ አይደል እንዴ?
  • አንተ ደግሞ፡፡
  • ጥምቀትስ ቢሆን አልፏል አይደል እንዴ?
  • እኔ ስለእነሱ አይደለም የማወራው፡፡
  • ስለብሔር ብሔረሰቦች በዓል ነው የምታወሪው ታዲያ?
  • በቃ አንተ ዞረህ ዞረህ እዚያው ነህ አይደል?
  • እና የምን በዓል ነው?
  • ለስሙ ውጭ ነው የተማርኩት ትላለህ፡፡
  • የውጭ አገር በዓል ነው እንዴ?
  • እሱማ አመጣጡ ከውጭ ነው ግን እዚህም በጣም እየተከበረ ነው፡፡
  • የምን በዓል ነው?
  • ቫላንታይንስ ዴይ፡፡
  • ምን ዴይ?
  • የፍቅረኛሞች ቀን፡፡
  • አሁን ምን ዓይነት ቢዝነስ አስበሽ ነው?
  • መቼም ለፍቅረኞች በግና ፍየል እሸጣለሁ አልልህም፡፡
  • እኮ ምን ልትሸጪ ነው?
  • አበባ፡፡
  • ለመሆኑ በዓሉ መቼ ነው?
  • ነገ ነው፡፡
  • ኪኪኪ…
  • ምን ያስቅሃል?
  • በጣም ገርመሽኝ ነዋ፡፡
  • በምንድን ነው ያስገረምኩህ?
  • በአንድ ቀን የሚበቅል አበባ የት ነው የሚገኘው ብዬ ነዋ?
  • አንተ ደግሞ?
  • ምነው?
  • አበባ ተክዬ ልሸጥ ያሰብኩ ይመስልሃል?
  • እና ከየት አምጥተሽ ልትሸጪ ነው?
  • በመጀመሪያ ያሰብኩትን ልንገርህ፡፡
  • እሺ ንገሪኝ፡፡
  • ከተማችን ውስጥ በጣም ታዋቂ አሥር ሞሎችን መርጫለሁ፡፡
  • እሺ፡፡
  • በቃ በእነዚህ ሞሎች አሥር አይሱዙ አበባ ብንሸጥ እንተኮሳለን፡፡
  • አበባውን ከየት አምጥተሽ ነው የምትሸጪው?
  • ሚኒስትር ነህ አይደል እንዴ?
  • እሱማ ነኝ፡፡
  • በርካታ የአበባ እርሻ ያላቸውን ባለሀብቶች ታውቃለህ አይደል?
  • አዎን አውቃለሁ፡፡
  • በቃ እነሱ ይሰጡሃላ፡፡
  • እንዴ እነሱ ፍቅረኛዬ አይደሉም እኮ?
  • ፍቅረኛሞች ትሆናላችኋ፡፡
  • እንዴት?
  • አንተ መሬት ትሰጣለህ፡፡
  • ከዚያስ?
  • አበባ ትቀበላለህ!

[ለክቡር ሚኒስትሩ ወዳጃቸው የሆኑ ሚኒስትር ደወሉላቸው]

  • ክቡር ሚኒስትር፡፡
  • አቤት ወዳጄ፡፡
  • እኔ የምልዎት ስንት ጅል ባለሥልጣን ነው ያለው?
  • እንዴት ማለት?
  • አንዱ ያደረገውን ሰምቼ ተቃጠልኩ፡፡
  • ምን አድርጎ ነው?
  • እኛን ለማሳጣት ሆን ብሎ ያደረገው ይመስለኛል፡፡
  • እኛን ለማሳጣት ስትል?
  • አጉል ሀቀኛ ነኝ ሊል ፈልጎ ነዋ፡፡
  • በዚህ ዘመን ምቀኛ እንጂ ሀቀኛ መቼ አለ?
  • ለነገሩ እውነትዎን ነው፣ ምቀኛ ብለው ይቀለኛል፡፡
  • እንዴት?
  • እኛ እንዳንጠቀም ሆን ብሎ ነዋ ያደረገው፡፡
  • ምኑን?
  • መንግሥት ቦታ ሰጥቶት ትልቅ ቤት ይሠራል፡፡
  • ታዲያ ይኼ ምን ችግር አለው?
  • ቤቱን ሲያጠናቅቅ አከራየው አልኩት፡፡
  • ምን አለህ ታዲያ?
  • ይኸው አዲስ የሠራው ቤት ውስጥ ገባበት፡፡
  • የነበረበትን የኪራይ ቤት ምን አደረገው?
  • መለሰው፡፡
  • ለማን?
  • ለመንግሥት!

[የክቡር ሚኒስትሩን ቤት የሚሠራው ኢንጂነር ደወለላቸው]

  • ሰላም ክቡር ሚኒስትር፡፡
  • እንዴት ነህ ኢንጂነር?
  • ዛሬ በጣም የሚያስደስት ዜና አለኝ፡፡
  • አንተ ደግሞ ከመቼ ጀምሮ ነው የሚያስደስት ዜና የኖረህ?
  • እንዴት ክቡር ሚኒስትር?
  • አንዴ ሲሚንቶ ጨመረ፣ አንዴ ብረት ተወደደ አይደል እንዴ የምትለኝ?
  • ከዚህ በኋላ እንደዚህ ማለት ቀረ፡፡
  • ለምን?
  • ቤቱ ተጠናቋል፣ ቁልፉን መረከብ ይችላሉ፡፡
  • ምን ትቀልዳለህ?
  • በእውነት ክቡር ሚኒስትር፡፡
  • በጣም አስደሳች ዜና ነው፡፡
  • አዎን ክቡር ሚኒስትር፡፡
  • በቃ እዚያ ደላላ ጋ ልደውል፡፡
  • ክቡር ሚኒስትር ከደላላው እኔ አልሻልም?
  • እንዴት?
  • እኔው ቤቱን የሚመጥን ፈርኒቸር ብገዛለት ጥሩ ነው፡፡
  • እየቀለድክ ነው?
  • የምሬን ነው ክቡር ሚኒስትር፡፡
  • ለምንድን ነው ፈርኒቸር የምገዛው?
  • ቤቱን አይገቡበትም እንዴ?
  • እኔ እኮ ጅል አይደለሁም፡፡
  • እና ምን ሊያደርጉት ነው?
  • አከራየዋለሁ!

[ክቡር ሚኒስትር ከሾፌራቸው ጋር እየሄዱ ነው]

  • በዓሉን እንዴት ነው የምታከብረው?
  • ክቡር ሚኒስትር እኔ በዓሉን አላከብርም፡፡
  • እንዴ ለምን?
  • ሚስቴ አበባ ይዤላት ብሄድ የበለጠ ትጣላኛለች፡፡
  • እ…
  • የምትበላው የላት የምትከናነበው አማራት አሉ፡፡
  • ስለምንድን ነው የምታወራው?
  • ስለፍቅረኛሞች ቀን ነው የሚያወሩኝ አይደል?
  • ኧረ እኔ ስለፆም መያዣ ነው የማወራህ?
  • የደላው ሙቅ ያኝካል አሉ፡፡
  • አንተ ተረት አብዝተሃል፡፡
  • ደመወዜ አልበዛ ሲለኝ ተረት ማብዛቱን ተያይዤዋለሁ፡፡
  • ፆም መያዣ እንዴት ነው የምታከብረው ነው ያልኩህ?
  • እየቀለዱብኝ ነው ክቡር ሚኒስትር?
  • ፆሙን አትፆምም መሰለኝ?
  • ኧረ እኔ መፆም አቋርጬ አላውቅም፡፡
  • ማለት?
  • 365 ቀናት ነው የምፆመው?
  • ምን ዓይነት ወንጀለኛና ኃጢያተኛ ብትሆን ነው ዓመቱን ሙሉ የምትፆመው?
  • ተገድጄ ነው፡፡
  • የነፍስ አባትህ ነው ያስገደዱህ?
  • ኧረ እሳቸው ምን በወጣቸው?
  • ታዲያ ማን አስገድዶህ ነው?
  • ኑሮ!

[ክቡር ሚኒስትሩ ቢሯቸው ከአማካሪያቸው ጋር እያወሩ ነው]

  • ምነው ክቡር ሚኒስትር የተናደዱ ይመስላሉ?
  • ይኼ ውኃ በጣም ነው ያማረረኝ፡፡
  • እንዴት ክቡር ሚኒስትር?
  • ይኸው ውኃ ከጠፋ ሳምንት ሆነው እኮ?
  • ክቡር ሚኒስትር እኔ የምኖረው ኮንደሚኒየም ውስጥ ነው፡፡
  • እዚያ ውኃ አይጠፋም እንዴ?
  • ኧረ ውኃ እያለ ሦስተኛ ፎቅ ስለማይደርስ፣ ከውኃ ጋር ከተሰነባበትን ቆየን፡፡
  • ለመሆኑ ምንድን ነው ችግሩ?
  • የአዲስ አበባ የከርሰ ምድር ውኃ እያለቀ ነው መሰለኝ፡፡
  • እንዴት ያልቃል?
  • ያው ጉድጓዶቹ በጥልቀት ስላልተቆፈሩ ውኃ ማውጣት አልተቻለም መሰለኝ፡፡
  • እኔ እኮ የሚገርመኝ ነገር አለ፡፡
  • ምንድን ነው ክቡር ሚኒስትር?
  • በጥልቅ መታደስ አለብን እያሉ ይሰበሰባሉ፡፡
  • እ…
  • በጥልቀት የውኃ ጉድጓድ መቆፈር ግን አይችሉም፡፡
  • ጉድጓድ ቆፋሪዎቹ በጥልቀት አልታደሱም ማለት ነው፡፡
  • ለማንኛውም እኔ በውኃ እጦት ተማርሬያለሁ፡፡
  • ለምን ከዚህ አይወስዱም?
  • በምን?
  • በጀሪካን ነዋ፡፡
  • ሚኒስትር መሆኔን ረሳኸው እንዴ?
  • ያው ከችግሩ ይሻላል ብዬ ነው፡፡
  • እኔማ ግፍ ፈርቼ ነው እንጂ ገንዳዬን ልሞላው ነበር፡፡
  • በምን?
  • በኃይላንድ ውኃ፡፡
  • ይችላሉ ክቡር ሚኒስትር፡፡
  • ለማንኛውም ለብቻዬ እንዲቆፈርልኝ እፈልጋለሁ፡፡
  • ምንድን ክቡር ሚኒስትር?
  • ጉድጓድ፡፡
  • ለመቀበሪያዎት ነው?