አዲሱን ድረ ገጽ ይሞክሩ!
አዲሱን ድረ ገጽ ይሞክሩ!

ክቡር ሚንስተር

[ክቡር ሚኒስትሩ አንድ ዘመዳቸው ቢሮአቸው ሄዶ እያነጋገሩት ነው]

  • አንተ ከየት ተገኘህ እባክህ?
  • አለሁ ክቡር ሚኒስትር፡፡
  • ዛሬ ምን እግር ጣለህ?
  • አንድ አሳሳቢ ጉዳይ አለ ክቡር ሚኒስትር፡፡
  • ክቡር ሚኒስትር ማለትህን ትተህ ጉዳዩን ንገረኝ፡፡
  • ምን መሰለህ ጋሼ?
  • ምንድነው እሱ?
  • የእነዚህ ሁለት ልጆችህ ጉዳይ አሳስቦኛል፡፡
  • እነሱ ደግሞ ምን ሆኑ?
  • ኧረ ጋሼ በጊዜ መላ መፈለግ አለብህ፡፡
  • ምን ሆነዋል?
  • ወንዱ ልጅ ለይቶለታል ጋሼ፡፡
  • ምንድነው የምትለው?
  • እኔ ነኝ ያለ ኢንቨስተር እንኳን እንደሱ አይደለም፡፡
  • ኢንቨስተር?
  • አዎ ጋሼ፡፡
  • ምን እያልክ ነው?
  • በየቀኑ የሚመነዝረው ገንዘብ ያስደነግጣል፡፡
  • ምን?
  • ረብጣ ተሸክሞ እኮ ነው የሚዞረው ጋሼ፡፡
  • እና?
  • እኔ ነኝ ያለ አፓርታማ ከጓደኞቹ ጋር ተከራይቶ. . .
  • እሺ እባክህ?
  • ጋሼ ጫት ትላለህ፣ ሺሻ ትላለህ፣ መጠጥ. . .
  • አንተ ሰው አብደሃል?
  • ኧረ ጤነኛ ነኝ ጋሼ፡፡
  • እሺ?
  • ሲመሽ ደግሞ ከኮረዶች ጋር የከተማዋን ክለቦች ይቀውጣል ጋሼ፡፡
  • ኧረ ዝም ብለህ አታውራ፡፡
  • ጋሼ አሉባልታ ላወራ አይደለም የመጣሁት፡፡
  • በል ቀጥል፡፡
  • ልጁ በዚህ ከቀጠለ. . .
  • ምን?
  • ጣጣ ውስጥ ይከትሃል፡፡
  • ለዚህም ደርሶ?
  • ምን ይኼ ብቻ ጋሼ?
  • ሌላ ምን?
  • ያገኘውን ሁሉ ማንጓጠጥ፣ መሳደብ፣ መደባደብ፣. . .
  • ኧረ አንተ ሰውዬ በፈጠረህ?
  • ጋሼ እህ ብለህ ስማኝ፡፡
  • እንዴት ነው የምሰማህ?
  • ይኼ ልጅ የአንተን ስም እየጠራ ሰዎች ያስፈራራል ጋሼ፡፡
  • ምን እያለ እባክህ?
  • አሳያችኋለሁ እያለ ነዋ፡፡
  • ምንድነው የሚያሳየው?
  • የአንተን ሥልጣን ይሆናላ ጋሼ፡፡
  • ከዚህ ሌላስ?
  • ሌላማ እያስፈራራ ከሰዎች ገንዘብ ይቀበላል ጋሼ?
  • ከማን?
  • አንተ ዘንድ ጉዳይ ካላቸው ጋሼ፡፡
  • ሌላስ?
  • ድራግ ይጠቀማል ጋሼ፡፡
  • ምን?
  • እሱን ሲወስድማ ዕብደቱ ይነሳል ጋሼ፡፡
  • እንዴት ያደርገዋል እባክህ?
  • ላዩ ላይ ልብሱን ይቀዳድዳል ጋሼ፡፡
  • እንዴ?
  • ጓደኞቹ ላይ ጠርሙስ ቮድካ ወይም ውስኪ እያንቆረቆረ እየፈሰሰ በሺዎች የሚቆጠሩ ብሮችን መክፈል ልማዱ ነው ጋሼ፡፡
  • ወይ ጉድ?
  • ለመናገር የሚያዳግቱ በርካታ ነገሮችን ይፈጽማል፡፡
  • ይህንን ሁሉ ጉድ እንዴት አልሰማሁም?
  • ሰዎች እየፈሩህ እንዴት ይንገሩህ ጋሼ?
  • ልጅህን ተቆጣ ማለት ምን ያስፈራል?
  • ወይ ጋሼ?
  • ምነው?
  • ሰዎች እኮ ባለሥልጣናትን አያምኑም ጋሼ፡፡
  • ለምን?
  • ጥቃት ይደርስብናል ብለው ይፈራሉ ጋሼ፡፡
  • አንተ ይህንን ሁሉ ጉድ እንዴት አወቅክ?
  • አንድ የተማረረ ጓደኛዬ ነግሮኝ ስከታተል ነው የቆየሁት፡፡
  • የሴቷስ ጉድ ምን ይሆን?
  • የእሷ ችግር መጠጥ ነው ጋሼ፡፡
  • ትጠጣለች እያልከኝ ነው?
  • ዶልፊን በላት ጋሼ፡፡
  • ምን ማለት ነው?
  • ታንቆረቁረዋለች ጋሼ፡፡
  • ለመሆኑ ምንድነው የምትጠጣው?
  • ምን ይተርፋታል ጋሼ?
  • ምን ማለት ነው?
  • ጋሼ ከድራፍት እስከ ኮኛክ ምንም አይተርፋትም፡፡
  • ይኼንን ሁሉ እንዴት ትችለዋለች?
  • እሷ እኮ ቅጽል ስም ወጥቶላታል ጋሼ?
  • ማን አሏት እባክህ?
  • ስፖንጅ ይሏታል ጋሼ፡፡
  • ለምን ስፖንጅ አሏት?
  • ምጥጥ ነዋ የምታደርገው፡፡
  • ወይ ጣጣ?
  • ጋሼ?
  • አቤት?
  • ይኼ ሁሉ የአንተ ጥፋት ነው፡፡
  • ለምን እንዲህ አልክ?
  • ልጆቹን ከአቅማቸው በላይ ገንዘብ እያሸከምክ ነዋ ጋሼ፡፡
  • ችግሩ እሱ ነው ብለህ ነው?
  • ይኼ ችግር እኮ በአገር ላይ ጦስ አለው ጋሼ፡፡
  • ምን ዓይነት ጦስ?
  • አንዳንድ ባለሥልጣናትና ሀብታሞች ልጆቻችሁን ገንዘብ ካቅማቸው በላይ እየሰጣችሁ እኮ ሕዝቡ. . .
  • ሕዝቡ ደግሞ ምን ሆነ?
  • በዋጋ ግሽበት እየተመታ ነው ጋሼ?
  • ይኼ ደግሞ ምን የሚሉት ወሬ ነው?
  • ምንጩ የማይታወቅ ገንዘብ ገበያውን እየወረረ ሕዝብ እያደኸየ ነው ማለት ነው!

[ክቡር ሚኒስትሩ በፍጥነት ሚስታቸው ዘንድ ደወሉ]

  • የት ነው ያለሽው?
  • ከጓደኞቼ ጋር ፉት እያልን ነው፡፡
  • ምን አለብሽ አንቺ?
  • ምን ሆኑ ደግሞ ክቡር ሚኒስትር!
  • የልጆቹን መባለግ ታውቂ ነበር?
  • ምን አልከኝ?
  • እነዚህ ሁለት ልጆች ምን እንደሚሠሩ ታውቂያለሽ?
  • ትልቁ ዩኒቨርሲቲ ይማራል፣ ትንሿ ደግሞ ሃይስኩል ናት፡፡
  • እሱን አልጠየቅኩሽም፡፡
  • ታዲያ ምንድነው የምትለው?
  • ልጆቹ ሐሺሽና መጠጥ እንደሚያዘወትሩ ታውቂያለሽ? ወይስ አታውቂም?
  • አንተ ያምሃል እንዴ?
  • እኔ ጤነኛ ነኝ መልሽልኝ፡፡
  • እኔ የማውቀው ተማሪ መሆናቸውን ብቻ ነው፡፡
  • የምትደብቂው ነገር እንዳለ ይታወቀኛል፡፡
  • አይ አንተ?
  • ምነው?
  • ወሬ እየሰማህ ጭንቅላትህን ትበጠብጣለህ አይደል?
  • አንቺ የምታውቂው እንዳለ አሁን ገባኝ፡፡
  • ምኑ ነው የገባህ?
  • ልጆቹ መበላሸታቸውን ነዋ፡፡
  • ኧረ ይኼንን ወሬ ተወኝ ክቡር ሚኒስትር?
  • እኔማ አልተውም ገባሽ?
  • ብትተወው ይሻልሃል፡፡
  • ለምን?
  • ይኼ እኮ. . .
  • ምን አልሽ?
  • የምቀኛ ወሬ ነው፡፡
  • ምን?
  • የጠላት ወሬ!

[ክቡር ሚኒስትሩ ተጠራጥረው አንድ የቀድሞ ጓደኛቸው ዘንድ ደወሉ]

  • አንድ ጉዳይ ላማክርህ ነበር?
  • ምንድነው ክቡር ሚኒስትር?
  • ልጆቼን ታውቃቸው የለ?
  • ድሮማ አውቃቸው ነበር ክቡር ሚኒስትር፡፡
  • አሁንስ?
  • አሁንማ ሥልጣንም ሀብቱም ለያይቶናል፡፡
  • ምን እያልክ ነው?
  • የዘንድሮ ባለሥልጣናትና ባለሀብቶች ልጆች ጉዳይ ተከድኖ ይብሰል፡፡
  • እንዴት ነው ሁሉንም አጠቃለህ እንዲህ የምትለው እባክህ?
  • በእርግጥ ሁሉንም አይመለከትም፣ አሁን ግን በዛ. . .
  • ምኑ ነው የበዛው?
  • ጥጋቡ ነዋ ክቡር ሚኒስትር፡፡
  • ምን ሆነሃል?
  • እርስዎ ምን ሆነዋል?
  • አንተ ንገረኛ?
  • ይሰማሉ ክቡር ሚኒስትር?
  • አዎ እሰማለሁ፡፡
  • ልጆችዎን ቶሎ ከገቡበት ማጥ ውስጥ ያውጡ፡፡
  • ለምን እንዲህ አልክ?
  • እንደ ዓይን ጠፍተዋል ክቡር ሚኒስትር፡፡
  • ለምሳሌ?
  • ወንዱ ልጅዎ የከተማው ዋና ጥጋበኛ ከመሆኑ የተነሳ ሰው ሁሉ ይፈራዋል፡፡
  • ምን?
  • ሰው ፊት ላይ መጠጥ ይደፋል. . .
  • እ?
  • ጠርሙስ ወርውሮ ይፈናከታል. . .
  • እንዴ?
  • አንዳንዴማ ጩቤ ይመዛል. . .
  • ምን አልክ?
  • አንድ ቀን የምፈራው. . .
  • እ?
  • የእርስዎን ሽጉጥ. . .
  • ሽጉጤን ምን?
  • ተኩሶ ሰው እንዳይፈጅ ነው ክቡር ሚኒስትር፡፡
  • ይኼን ያህል?
  • በዚህ  ተግባሩ እኮ ቅጽል ስም ወጥቶለታል?
  • ማን አሉት እባክህ?
  • እንደልቡ፡፡
  • ሴቷስ?
  • እሷ እኮ ጉበቷ ጤነኛ መሆኑን እጠራጠራለሁ፡፡
  • በምን ምክንያት?
  • አጠጣጧ አደገኛ ነው ክቡር ሚኒስትር፡፡
  • ምን ዓይነት አጠጣጥ?
  • አጥፍቶ መጥፋት ይሉታል!
  • ምንድነው የምትለው?
  • ሱሳይድ!

[ክቡር ሚኒስትሩ ቢሮአቸው ውስጥ ተክዘው እንደተቀመጡ አማካሪያቸው ገባ]

  • ክቡር ሚኒስትር ምን ሆነዋል?
  • ምንም፡፡
  • የሆኑት ነገርማ አለ ክቡር ሚኒስትር፡፡
  • አንድ ነገር ልጠይቅህ?
  • እሺ ክቡር ሚኒስትር፡፡
  • ስለባለሥልጣናትና ባለሀብቶች ልጆች የሚወራው እውነት ነው?
  • የሁሉም ባይሆንም የአንዳንዶቹ ያስፈራል ክቡር ሚኒስትር፡፡
  • እስኪ ንገረኝ?
  • ከየት ልጅምር ክቡር ሚኒስትር?
  • ከፈለግከው፡፡
  • ቁጥጥር የማይደረግባቸው ልጆች በዝተዋል ክቡር ሚኒስትር፡፡
  • ልጆቹ ምን ያደርጋሉ?
  • አንደኛ ካቅማቸው በላይ ገንዘብ ይይዛሉ ክቡር ሚኒስትር፡፡
  • ምን ማለት ነው?
  • ከዕድሜያቸው ጋር የማይመጣጠን ገንዘብ ክቡር ሚኒስትር፡፡
  • እሺ?
  • ሁለተኛ ገንዘቡን ዝም ብለው ይበትኑታል ክቡር ሚኒስትር፡፡
  • ማለት?
  • የተጠየቁትን ያለክርክር ስለሚከፍሉ ነዋ ክቡር ሚኒስትር፡፡
  • እሺ?
  • ሦስተኛ ከመጠጥ እስከ ድራግ ሰፍረውበታል፡፡
  • ሌላስ?
  • በዚህ ላይ ነውጠኛ ናቸው ክቡር ሚኒስትር፡፡
  • ይኼ ሁሉ ችግር ይመለከተኝ ይሆን?
  • እንዴ ክቡር ሚኒስትር?
  • ምነው?
  • የእርስዎ ስም ከእንትኑ ቀጥሎ በልጆችዎ አይደል እንዴ የሚነሳው ክቡር ሚኒስትር?
  • ከምኑ ቀጥሎ?
  • ያውቁታል ክቡር ሚኒስትር፡፡
  • ምኑን ነው የማውቀው እባክህ?
  • ሙስናውን ነዋ!