አዲሱን ድረ ገጽ ይሞክሩ!
አዲሱን ድረ ገጽ ይሞክሩ!

ክቡር ሚንስተር

[ክቡር ሚኒስትሩ ቢሮአቸው ውስጥ ከአማካሪያቸው ጋር እየተነጋገሩ ነው]

  • ምንድነው የምሰማው እባክህ?
  • ምን ሰሙ ክቡር ሚኒስትር?
  • አንተ ንገረኝ እንጂ?
  • ምኑን ክቡር ሚኒስትር?
  • መሥሪያ ቤታችን በሚዲያ ስሙ እየተብጠለጠለ እኮ ነው፡፡
  • አይ ክቡር ሚኒስትር?
  • ምን አልክ?
  • እርስዎ ይኼ ለምን ያሳስብዎታል?
  • ለምድነው የማያሳስበኝ?
  • የአንድ ሰሞን ወሬ ነዋ ክቡር ሚኒስትር፡፡
  • ሰማህ አንተ?
  • አቤት ክቡር ሚኒስትር?
  • በጀታቸውን በሕጉ መሠረት አይጠቀሙም ተባልን እኮ?
  • ሰምቻለሁ ክቡር ሚኒስትር፡፡
  • ያላወራረዱት በርካታ ወጪ አለ ተብለናል እኮ?
  • እሱንም ሰምቻለሁ ክቡር ሚኒስትር፡፡
  • በሕጉ መሠረት ግዥ አይፈጽሙም ተባልን እኮ?
  • ሰምቻለሁ ክቡር ሚኒስትር፡፡
  • በዚያ ላይ በሚዲያ ሥራ ጣልቃ ይገባሉ ተብለናል፡፡
  • አዎን ሰምቻለሁ ክቡር ሚኒስትር፡፡
  • ምን እናድርግ ታዲያ?
  • መክሰስ አለብን ክቡር ሚኒስትር፡፡
  • ማንን ነው የምንከሰው?
  • የዘገበብንን ሚዲያ ነዋ ክቡር ሚኒስትር፡፡
  • አንተ ጭንቅላትህ አይሠራም ማለት ነው?
  • ስለሚሠራ እኮ ነው መፍትሔ ያቀረብኩት ጌታዬ?
  • ጭንቅላትህ ቢሠራ ኖሮ እንዲህ ያለ መፍትሔ አታመጣም ነበር፡፡
  • እሺ ምን ይሻላል ይላሉ ክቡር ሚኒስትር?
  • በቶሎ ሌላ መፍትሔ ፈልግ፡፡
  • እንዲህ ብናደርግስ ክቡር ሚኒስትር?
  • ምን ብናደርግ?
  • ጋዜጣውን አስተባብል ብለን ወጥረን ብንይዘው?
  • እንዴት ተደርጎ እባክህ?
  • የተጻፈው በፍፁም ሐሰት ነው ብለን ነዋ ክቡር ሚኒስትር?
  • ከዚያስ?
  • እያንዳንዱ የተጻፈውን እያስተባበልን በመጨረሻ ማስጠንቀቅ አለብን፡፡
  • ምን ብለን?
  • ይህንን ማስተባበያ የማታወጡ ከሆነ በሕግ እንጠይቃለን ብለን ነዋ፡፡
  • ፍርድ ቤት እንገናኝ ቢሉስ?
  • ይኼንን እንኳ የሚሉ አይመስለኝም ክቡር ሚኒስትር?

[የንግሥት ዘውዲቱ ንግሥና ያደመቁት ሙዚቀኞች]

  • እንዴት እንዲህ አልክ?
  • የሚቀርብባቸው ክስ በወንጀል የሚያስጠይቅና የካሳ ክፍያ እንደሚኖርበት እናስጠነቅቃለና፡፡
  • የእነሱ መልስ የበለጠ ቢሆንስ?
  • እንዴት ሆኖ ክቡር ሚኒስትር?
  • በመረጃና በማስረጃ የተደገፈ!
  • ከልብዎ ነው ክቡር ሚኒስትር?
  • አይዞህ ተረጋጋ፡፡
  • እንዴት ልረጋጋ?
  • ሙያ በልብ ነው!
  • ምን ማለት ነው ክቡር ሚኒስትር?
  • እናስበረግጋቸዋለን?
  • እንዴት ክቡር ሚኒስትር?
  • ሕግ የማይገዛውን ኃይል ይገዛዋል!

 [አማካሪያቸው እንደወጣ ጸሐፊያቸው ገባች]

  • ምን ነበር?
  • ክቡር ሚኒስትር ጨንቆኛል፡፡
  • ምንድነው የጨነቀሽ?
  • የተዝረከረከ አሠራርን ማስተካከል ይሻላል ወይስ. . .
  • ምን አልሽ?
  • መሥሪያ ቤታችንን ማስተካከል ወይስ አምባጓሮ?
  • ለምን እንዲህ አልሽ?
  • አማካሪዎት ሲደነፋ ሰምቼው ነው፡፡
  • ምን አለ?
  • ‹‹ሕግ የማይገዛውን ኃይል ይገዛዋል. . .›› ሲል ሰማሁት፡፡
  • አንቺስ ምን ትያለሽ?
  • እየተወራብን ያለው ጥሩ አይደለም ክቡር ሚኒስትር፡፡
  • ምን ይሻሻል ታዲያ?
  • እኔ አተካራውን ትተን ራሳችንን እናስተካክል ነው የምለው ክቡር ሚኒስትር፡፡
  • አላሠራ ያሉንን ምን እናድርጋቸው እስከዚያ?
  • አዩ ክቡር ሚኒስትር. . .
  • እሺ?
  • ውጤታማ የሆኑት ድምፃቸውን አጥፍተው ይሠራሉ ክቡር ሚኒስትር?
  • እኛ ውጤታማ አይደለንም ማለትሽ ነው?
  • ከውጤታችን ይልቅ አሉታዊ ጎናችን ብሷል እኮ ክቡር ሚኒስትር፡፡
  • አሁን ምን አድርግ ነው የምትይኝ?
  • አሁንም ደግሜ ልናገር ችግራችንን አውቀን እንታረም፡፡
  • እኮ እንዴት አድርገን?
  • በግልጽ ስህተታችንን በማመን ክቡር ሚኒስትር፡፡
  • ገባሽ አላደርገውም፡፡
  • ታዲያ ምን ይሻላል ክቡር ሚኒስትር?
  • ሁሉንም እንደ አመጣጡ እመክተዋለሁ፡፡
  • ጥቅል ተሃድሶው ግን እንዲህ የሚል አይመስለኝም፡፡
  • ይኼ ጥልቅ ተሃድሶ ማስፈራሪያ ነው እንዴ?
  • እንዴ ክቡር ሚኒስትር?
  • ምን ሆንሽ?
  • ኧረ ዝም ይበሉ ክቡር ሚኒስትር?
  • ለምን?
  • ግምገማው ላይ እኮ ምን እንደተባሉ ያውቁት የለ ክቡር ሚኒስትር?
  • እኔ እኮ. . .
  • እርስዎ ምን?
  • የሆዴን በሆዴ ይዤ ነው፡፡
  • በሆድዎ ምን ያዙ ክቡር ሚኒስትር?
  • ቂም ነዋ፡፡
  • የምን ቂም ክቡር ሚኒስትር?
  • ማንም እየተነሳ ባለቀሰ ቁጥር መሰደብ አለብን እንዴ?
  • ኧረ ይኼ ጉዳይ ልክ አይመስለኝም ክቡር ሚኒስትር?
  • ላፕቶፖቼ የት ነው ያሉት?
  • እዚያ መሳቢያ ውስጥ ናቸው ክቡር ሚኒስትር?
  • ቶሎ አምጪልኝ፡፡
  • የትኛውን ክቡር ሚኒስትር?
  • አነስ ያለችውን፡፡
  • ምን ያደርጉበታል ክቡር ሚኒስትር?
  • ፋይሉ ያለው እዚያ ውስጥ ነው፡፡
  • የቱ ፋይል ክቡር ሚኒስትር?
  • ግምገማ ያደረግንበት ጽሑፍ ነዋ፡፡
  • ጽሑፉን አሁን ምን ሊያደርጉት ነው ክቡር ሚኒስትር?
  • እንደገና እገመግመዋለሁ፡፡
  • እርስዎ ክቡር ሚኒስትር?
  • አንቺ ነሽ ታዲያ?

[ክቡር ሚኒስትሩ ከቢሮ እንደወጡ አንደኛው ወጣት ሚኒስትር ቢሮ ሄዱ]

  • ክቡር ሚኒስትር ከየት ተገኙ?
  • አንድ ጉዳይ ላዋይህ መጥቼ ነው፡፡
  • ይንገሩኝ ክቡር ሚኒስትር፡፡
  • የጥልቅ ተሃድሶውን ግምገማ ጽሑፍ አንብበኸዋል?
  • በሚገባ ክቡር ሚኒስትር፡፡
  • እንዴት አገኘኸው?
  • ከሠራንበት ተስፋ ሰጪ ነው፡፡
  • እንዴት ነው የምንሠራበት?
  • ባስቀመጠልን አቅጣጫ መሠረት ነዋ ክቡር ሚኒስትር፡፡
  • አልገባህ ያለኝ እኮ ይኼ ነው?
  • ምኑ ክቡር ሚኒስትር?
  • የነበረንን ጥንካሬ የሚፈታተን ነው ጽሑፉ፡፡
  • ኧረ በተሻለ እንድሠራ ይረዳናል ክቡር ሚኒስትር?
  • እንዴት አድርጎ?
  • መንግሥትና ሕዝብ እንዲቀራረቡና ችግሮች እንዲፈቱ ይረዳናል፡፡
  • ምን?
  • ምን ሆኑ ክቡር ሚኒስትር?
  • ሕዝብና መንግሥት ድሮስ አንድ ላይ አይደሉም እንዴ?
  • ሕዝብና መንግሥት ተቀያይመው አይደል እንዴ ያ ሁሉ ችግር የደረሰው ክቡር ሚኒስትር?
  • በምን ምክንያት?
  • ሕዝብን የሚያማርሩ ችግሮች በመብዛታቸው ነዋ ክቡር ሚኒስትር?
  • አይመስለኝም፡፡
  • እስቲ የእርስዎን ግምገማ ይንገሩኝ ክቡር ሚኒስትር?
  • አንደኛ ጥንካሬያችንን አጥንተን በመልፈስፈሳችን . .
  • እንዴ?
  • ሁለተኛ ጠንካሮች ወጥተው ደካሞች በመብዛታቸው. . .
  • ሆሆ. . .
  • ሦስተኛ አጉል ዴሞክራት ለመሆን መፍጨርጨር ውስጥ በመገባቱ. . .
  • የባሰ አታምጣ?
  • ልጨምርልህ?
  • ምን ይሆን ክቡር ሚኒስትር?
  • አፍሪካ ውስጥ መሆናችንን በመዘንጋት. . .
  • ምን ማለት ነው እሱ ደግሞ?
  • ዴሞክራሲ ቀስ እያለ የሚመጣ እንጂ እንደ በረዶ ድንገት ዱብ ዱብ አይልም ማለት ነው፡፡
  • እርስዎ እንዲህ ነው የሚያስቡት ክቡር ሚኒስትር?
  • አዎን ወጣቱ ሚኒስትር፡፡
  • እንዲህ ዓይነቱን አስተሳሰብ ይዘንማ አብረን መዝለቅ አንችልም ክቡርነትዎ?
  • ጥርግ በሉ!

[ክቡር ሚኒስትሩ ቤታቸው ደርሰው ከባለቤታቸው ጋር እራት እየተመገቡ ነው]

  • ምነው የተቆጣህ ትመስላለህ?
  • በምን አወቅሽ?
  • ፊትህን ጥለኸዋል እኮ?
  • ይኼንን ያህል?
  • ምግቡን መዋጥ አቅቶህ እያየሁ?
  • ምን እባክሽ?
  • ምን ሆንክ?
  • ግማሹ በጋዜጣ ይከተክተኛል. . .
  • እ?
  • ሌላው በስመ ግምገማ ያንገበግበኛል. . .
  • አንተም እኮ አበዛኸው፡፡
  • እንዴት እባክሽ?
  • መሥሪያ ቤቱን መምራት ያቃተህ ትመስላለህ፡፡
  • እኔ?
  • አዎን አንተ!
  • እንዴት ሆኖ?
  • የተጻፈውን ሳነብ ችግሩ በሚገባ  ይታያል፡፡
  • ምን ታየሽ?
  • አንደኛ አንተን ጨምሮ ብቁ አመራሮች የሉም፡፡
  • ምን?
  • ሁለተኛ ሥራና ሠራተኛ አልተገናኙም፡፡
  • ሌላስ እባክሽ?
  • የሒሳብ መዝገቦቻችሁ ያስቃሉ ብቻ ሳይሆን ያሳፍራሉ፡፡
  • አንቺ አብደሻል ወይ?
  • ለምንድነው የማብደው?
  • የጋዜጣ ዘገባ ላይ ባየሽው እንዲህ ትፈርጃለሽ?
  • አምና ምን ተባላችሁ?
  • ማን ምን አለን?
  • ኦዲተር ጄኔራል ነዋ፡፡
  • ምን አለን?
  • የፋይናንስ አያያዛችሁና የግዢ ሥርዓታችን ብልሹ ነው አላለም?
  • እና?
  • ዘንድሮም በዚያው ባለበት መቀጠሉን እኮ አውቃለሁ፡፡
  • ታዲያ ለምን አልነገርሽኝም?
  • አንተ የገንዘብ ነገር ሲነሳብህ ያሳብድህ የለ?
  • ምን?
  • ይህንን ጉዳይ ሳነሳብህ እኮ ልታንቀኝ ነበር፡፡
  • ወይ ጉድ?
  • አሁን የሚሻልህ አንድ ነገር ብቻ ነው፡፡
  • ምንድነው እሱ?
  • የበላይ አለቃህን መለማመጥ፡፡
  • ምን ለመሆን?
  • በሰላም በጡረታ ለመሸኘት፡፡
  • እኔ ጡረታ ልወጣ?
  • አትቸኩል ክቡርነትህ፡፡
  • ጡረታ ወጥቼ ምን ልሆንልሽ?
  • እሱም ከተገኘ ዕድል ነው፡፡
  • እሺ ዕድል ቀንታኝ ጡረታ ወጣሁ. . .
  • ከጡረታው ጋር ቀስ ብለህ ሌላ ውለታ ትጠይቃለህ?
  • የምን ውለታ?
  • ውጭ አገር የሚወስድህ ውለታ፡፡
  • ምን ለመሆን ነው ውጭ አገር የምሄደው?
  • ኧረ ተረጋጋ ሰውዬ፡፡
  • ከዚያስ እባክሽ?
  • ዕድል ቀንታህ ውጭ የምትሄደው እኮ. . .
  • እኔ ውጭ አገር ሄጄ ቤንዚን ቀጂነት ወይም ፓርኪንግ እንድሠራ ፈለግሽ?
  • ሰውዬ እንደምንም ብለህ አለቃሀን አሳምን እንጂ ቤንዚን ቀጂ አትሆንም አንተ፡፡
  • እሺ እንዴት ነው አለቃዬን የማሳምነው?
  • ተለማምጠህ ነዋ ጌታው፡፡
  • ምን ለመሆን ነው የምለማመጠው?
  • አንደኛ ከተጠያቂነት ለመዳን፡፡
  • ምን?
  • ሁለተኛው ደግሞ. . .
  • ንገሪኝ?
  • ኧረ ተረጋጋ እባክህ?
  • ከተጠያቂነት ድኜ ውጭ ብሄድ ምን አገኛለሁ?
  • አየህ አሁን ማሰብ እየጀመርክ ነው፡፡
  • እባክሽ ፍቅሬ ልቤ ተንጠለጠለ እኮ?
  • ዕድለኛ ሆነህ አለቃህ ከፈቀዱልህ. . .
  • ምን እሆናለሁ?
  • አምባሳደር!
  • ብራቮ የእኔ ውድ!