ክቡር ሚንስተር

[ክቡር ሚኒስትሩ ለመሥሪያ ቤቱ በቅርብ ከተቀጠረ ታዋቂ ኤክስፐርት ጋር እየተነጋገሩ ነው]

  • እንዴት ነው ለመድክ?
  • ክቡር ሚኒስትር. . .
  • ምነው?
  • ኧረ መልመድ አቅቶኛል፡፡
  • ምኑ ነው ያቃተህ?
  • ሰው እኮ እየሠራ አይደለም፡፡
  • እንዴት ነው የማይሠራው?
  • አፍ ለአፍ ገጥሞ ወሬ ነው የያዘው፡፡
  • የምን ወሬ?
  • በተለይ ጠዋት ጠዋት ሥራ የለም ማለት ይቻላል፡፡
  • ከሰዓት በኋላስ?
  • ቁጭ ብሎ ማዛጋት ነው ክቡር ሚኒስትር፡፡
  • ሌላ ምን አጋጠመህ?
  • የአነጋገር ዘይቤው ሊገባኝ አልቻለም፡፡
  • የምን አነጋገር?
  • ክቡር ሚኒስትር የአንዳንዶቹ ንግግር በኮድ የተቆለፈ ይመስላል፡፡
  • ምን እያልክ ነው?
  • አንዱ ይነሳና እንደ አቅጣጫ ይላል፡፡
  • ምን?
  • ሌላው ይመጣና ‹ያለበት ሁኔታ ነው ያለው› ይላል፡፡
  • ምን እያልክ ነው?
  • አንዳንዱ ደግሞ. . .
  • አንዳንዱ ምን?
  • አንዳንዱማ የሚናገረው ምን እንደሆነ አይታወቅም፡፡
  • ለምሳሌ?
  • አንዱን ሪፖርት አቅርብልኝ አልኩት፡፡
  • እሺ?
  • ብጠብቀው ብጠብቀው አያመጣም፡፡
  • ከዚያስ?
  • ለምን አታቀርብም ስለው. . .
  • ምናለ እባክህ?
  • በሒደት ላይ ነው ብሎ ገላመጠኝ፡፡
  • የምን ሒደት ነው?
  • ክቡር ሚኒስትር የእኔም ጥያቄ ይኼው ነበር፡፡
  • ታዲያ ምን ዓይነት መልስ አገኘህ?
  • ‹እየተሳለጠ› ነው የሚል ክቡር ሚኒስትር?
  • መጨረሻው ምን ሆነ ታዲያ?
  • ያልተጀመረ ነገር ምን መጨረሻ አለው ክቡር ሚኒስትር?
  • ታዲያ ምን አሰብክ?
  • ወስኛለሁ ክቡር ሚኒስትር፡፡
  • ምን ለማድረግ?
  • ሥራዬን ለመልቀቅ ነዋ ክቡር ሚኒስትር፡፡
  • ለምን ብለህ?
  • በገዛ ቋንቋዬ ለምን ባይተዋር እሆናለሁ?
  • ምን አልከኝ?
  • ቻው ክቡር ሚኒስትር!

[ክቡር ሚኒስትሩ አማካሪያቸውን ጠሩትና መጣ]

  • ምን እየተደረገ እንዳለ ትነግረኛለህ?
  • ስለምኑ ክቡር ሚኒስትር?
  • በስንት መከራ ያመጣነው ኤክስፐርት ሊለቅ ነው እኮ?
  • ምን ሆንኩኝ አለ ደግሞ?
  • የምንነጋገረው አልገባህም መሰል?
  • ክቡር ሚኒስትር ይንገሩኛ?
  • ከአስፈጻሚዎች ጋር መግባባት አቅቶኛል ነው ያለኝ፡፡
  • ለምን ክቡር ሚኒስትር?
  • የንግግራችን ዘይቤ እንዳልገባው ነው የነገረኝ፡፡
  • እንግዲያው ቁጭ አድርጌ አቅጣጫ እሰጠዋለሁ፡፡
  • አንዱ ባዕድ የሆነበት አቅጣጫ የሚባለው ቃል ነው፡፡
  • በቃ መሥሪያ ቤቱ ያለበትን ሁኔታ በሚገባ አስረዳዋለሁ፡፡
  • ያለበት ሁኔታ ነው ያለው የሚባለው አነጋገር ጠንዝቶበታል፡፡
  • ክቡር ሚኒስትር ታዲያ ለምን አናሳልጥለትም?
  • ምኑን ነው የምናሳልጥለት?
  • በግምገማ መወጠር ነዋ ክቡር ሚኒስትር፡፡
  • ምን ልንለው?
  • የነበረበት የኪራይ ሰብሳቢነት አመለካከት. . .
  • ምን?
  • እዚህ ሲመጣ እጅና እግሩን እንዳሰረው ነዋ ክቡር ሚኒስትር፡፡
  • እሺ?
  • የፀረ ሰላም ኃይሎች ፕሮፓጋንዳ ተፅዕኖ. . .
  • እሱ ደግሞ ምን ይሆን?
  • ከልማታዊ አስተሳሰብ ጋር እየተጋጨበት ነዋ ክቡር ሚኒስትር፡፡
  • ሌላስ?
  • ሌላው ተሃድሶ ያስፈልገዋል ክቡር ሚኒስትር፡፡
  • አይ የእኛ አማካሪ?
  • ምነው ክቡር ሚኒስትር?
  • እሱ እኮ በቃኝ ብሏል፡፡
  • በቃ ሄደ ማለት ነው ክቡር ሚኒስትር?
  • አዎን አልኩህ፡፡
  • በቃ ግልግል ነው ክቡር ሚኒስትር፡፡
  • እሱን የመሰለ ኤክስፐርት ከየት ልታመጣልኝ ነው?
  • እናሠለጥናለን ክቡር ሚኒስትር፡፡
  • እንዴት አድርገህ እባክህ?
  • እንኳን አንድ ተራ ኤክስፐርት. . .
  • እህ?
  • አልበርት አንስታይንን የሚያስንቁትን እናሠለጥናለን!

[ክቡር ሚኒስትር ለበላይ አካል የሚያቀርቡት ሪፖርት ግራ አጋብቷቸው ከጸሐፊያቸው ጋር እየተነጋገሩ ነው]

  • ይኼንን ሪፖርት ማን ነው የሠራው?
  • ክቡር ሚኒስትር አማካሪዎ ነው፡፡
  • ብፈልገው አጣሁት የት ነው ያለው?
  • የዘመድ ቀብር ብሎ ከከተማ ወጥቷል፡፡
  • ይኼንን ሪፖርት ምን ብዬ ነው የማቀርበው?
  • ምን ሆነ ክቡር ሚኒስትር?
  • ተጫውቶበታል እኮ?
  • ይኼን ያህል ክቡር ሚኒስትር?
  • ከውሸቱ ብዛት መንግሥት የመደበልንን በጀት በእጥፍ አሳድጎታል፡፡
  • ኧረ ክቡር ሚኒስትር?
  • በዘጠኝ ወራት ሠራነው ያለው በዘጠኝ ዓመት እንኳ የሚሞከር አይመስልም፡፡
  • እንዴ ክቡር ሚኒስትር?
  • በእያንዳንዱ ክንውን ሥር የሰጠው መግለጫማ ያሳፍራል፡፡
  • ምን ብሎ ነው ክቡር ሚኒስትር?
  • የበላይ አካል በሰጠው አቅጣጫ መሠረት ብሎ ሰምቼው የማላውቀውን ያወራል፡፡
  • ሌላስ ክቡር ሚኒስትር?
  • ልማቱን ለማሳለጥ ስንል ዘጠኝ ወራት ሙሉ ተኝተን አናውቅም የሚለው ነገር ደግሞ ግራ ያጋባል፡፡
  • ወይ ክቡር ሚኒስትር?
  • ምነው?
  • ይኼ ማጋነን አቻ የለውም ክቡር ሚኒስትር፡፡
  • ምን ይኼ ብቻ?
  • ምን አለ ደግሞ ክቡር ሚኒስትር?
  • በሒደት ላይ ያሉ በማለት የዘረዘራቸውን እንኳን መንግሥት እኔም አላውቃቸውም፡፡
  • ምንድናቸው ክቡር ሚኒስትር?
  • መያዣ መጨበጫ የላቸውም፡፡
  • ምን ይሻላል ክቡር ሚኒስትር?
  • እኔ ምን አውቄ?
  • ኧረ መላ ይበሉ ክቡር ሚኒስትር፡፡
  • መላ ባውቅማ ይጫወትብኝ ነበር?
  • በእርግጥ ልክ ነዎት ክቡር ሚኒስትር፡፡
  • እንዴት?
  • እዚህ ቤት የቃላት ጨዋታ እንጂ መቼ ይሠራል?
  • ለምን እንዲህ አልሽ?
  • የአፍ ኮማንዶ ያለው ብቻ አይደል እንዴ የተሰባሰበው?
  • ይኼ ደግሞ ምን ማለት ነው?
  • ለመፈክር ቀድሞ ደራሽ የሆኑ ማለት ነው ክቡር ሚኒስትር፡፡
  • እንዲህ ለምን አልሽ?
  • ክቡር ሚኒስትር ያ ኤክስፐርት ምን እንዳለኝ ያውቃሉ?
  • ምናለ እባክሽ?
  • ወሬ ብቻ!

[ክቡር ሚኒስትሩ ኤምባሲ ውስጥ የተዘጋጀ ኮክቴል ላይ ከአንድ የታዋቂ ፓርቲ አመራር ጋር እያወሩ ነው]

  • ሰሞኑን ምነው ድምፅህ ጠፋ?
  • የእኔ ድምፅ የሚሰማው ከወቅታዊ ጉዳይ ጋር ነው ክቡር ሚኒስትር፡፡
  • አንተ በማኅበራዊ ሚዲያ እንጂ ብዙም እኮ አትሰማም፡፡
  • ዕድሜ ለኢሕአዴግ ክቡር ሚኒስትር፡፡
  • የኢሕአዴግን ስም ካልጠራህ ያቃዥሃል አይደል?
  • እንቅልፍም እኮ በእሱ ፈቃድ መስሎኝ ክቡር ሚኒስትር?
  • ትንሽ ቆይተህ በማንኪያ አጉርሰኝ ልትል ነው መሰል?
  • ‹ወጉ ቀርቶብኝ በቅጡ በኮነነኝ› ሲባል አልሰሙም?
  • ምን ማለት ይሆን?
  • መጉረሱና ማጉረሱ ቀርቶ በሥርዓቱ ማውራት ብንችል ጥሩ ነበር፡፡
  • ማን ከለከላችሁ ታዲያ?
  • ኢሕአዴግ ነዋ ክቡር ሚኒስትር?
  • ምን አድርጎ ክቡር ተቃዋሚ?
  • እስትንፋሳችንን ዘግቶት ነዋ ክቡር ሚኒስትር፡፡
  • እንዴት አድርጎ ነው የዘጋው እባክህ?
  • እጃችንን አስሮ፣ አፋችንን ግጥም አድርጎ ዘግቶ ነዋ፡፡
  • ከዚህ ሁሉ ለቅሶ እንደ ሠለጠነ ፓርቲ ለውይይትና ለድርድር መቅረብ አይሻላችሁም?
  • እሱንማ ሞክረን አቃተን እኮ?
  • ከኢሕአዴግ ጋር መነጋገር ነው ያቃታችሁ?
  • በምን ቋንቋ እንግባባ?
  • እንዴት?
  • የእናንተ ንግግር እኮ የተመሰጠረ ነው ክቡርነትዎ፡፡
  • እንዴት ሆኖ ነው የተመሰጠረው?
  • የቃላት ድሪቶዎች ይበዛሉ ክቡር ሚኒስትር፡፡
  • በግልጽ ተናገረው እባክህ?
  • የእናንተን ቃላት ለመረዳት ኮድ ሰባሪ ያስፈልጋል ክቡር ሚኒስትር፡፡
  • ይኼን ያህል አልገባናችሁም እንዴ?
  • እንዴት ክቡር ሚኒስትር?
  • የቋንቋ እጥረት አለባችሁ እንዴ?
  • በዚህ እንኳ አንታማም፡፡
  • ችግራችሁ ምንድነው ታዲያ?
  • ችግሩ የእኛ ሳይሆን የእናንተ ነው ክቡር ሚኒስትር፡፡
  • ምን የሚባል ችግር?
  • ግራ ማጋባት ይባላል!

[ክቡር ሚኒስትሩ ሾፌራቸው ወደ ቤት እየወሰዳቸው ነው]

  • አንተ ቀስ ብለህ ንዳ፡፡
  • ኧረ ቀስ እያልኩ ነው ክቡር ሚኒስትር፡፡
  • መኪናው የፈጠነ መሰለኝ እኮ?
  • ጌጁን ይመልከቱት 30 ላይ ነን ክቡር ሚኒስትር፡፡
  • ምነው መንገዱ ተጨናነቀ?
  • መንገዱ እኮ እንዲህ ነው ክቡር ሚኒስትር፡፡
  • ነው እንዴ?
  • ከፊታችን ያለውን መኪና ያዩታል ክቡር ሚኒስትር?
  • አዎ ይታየኛል፡፡
  • ዋጋው ስንት እንደሆነ ያውቃሉ ክቡር ሚኒስትር?
  • ስንት ነው እባክህ?
  • ሰባት ሚሊዮን ብር ክቡር ሚኒስትር፡፡
  • ምን?
  • ሰባት ሚሊዮን ብር ነው የሚሸጠው ክቡር ሚኒስትር፡፡
  • ለመሆኑ ማን ነው የሚሸጠው?
  • መኪና አስመጪዎች ናቸዋ ክቡር ሚኒስትር፡፡
  • የእዚህ መኪና ባለቤት ማን ነው?
  • ያውቁታል ክቡር ሚኒስትር፡፡
  • ማን ነው እሱ?
  • በአንድ ወቅት ቢሮዎ ሲመላለስ የነበረ ነው ክቡር ሚኒስትር፡፡
  • ለምን ነበረ የሚመላለሰው?
  • መሬት፣ የባንክ ብድርና የውጭ ምንዛሪ ለማግኘት ነው ሲመላለስ የነበረው ክቡር ሚኒስትር፡፡
  • እስቲ በምልክት አስቁመው፡፡
  • እሺ ክቡር ሚኒስትር፡፡

[ሾፌሩ መኪናውን ካስቆመ በኋላ ጥግ ይዞ ሲቆም ክቡር ሚኒስትሩ ስልክ ደወሉ]

  • አንተ ብለህ ብለህ የሰባት ሚሊዮን ብር መኪና ትነዳለህ?
  • ክቡር ሚኒስትር የት ነው ያሉት?
  • ከኋላህ ቆሜያለሁ፡፡
  • ልምጣ እንዴ ክቡር ሚኒስትር?
  • እዚያው አርፈህ ተቀመጥ፡፡
  • ምን ልታዘዝ ክቡር ሚኒስትር?
  • ልማታዊ መንግሥታችን ከየት እንዳነሳህ ታውቃለህ አይደል?
  • በሚገባ ክቡር ሚኒስትር፡፡
  • እኔ እኮ የማውቅህ መርካቶ ስትቸረችር ነበር፡፡
  • ልክ ነው ክቡር ሚኒስትር፡፡
  • መሬት፣ የባንክ ብድር፣ ከቀረጥ ነፃ፣ የውጭ ምንዛሪ. . . ለምነህ ያሰጠሁህ እኔ ነኝ፡፡
  • በትክክል ክቡር ሚኒስትር፡፡
  • አንተ ግን ቀብረር ብለህ የሰባት ሚሊዮን ብር መኪና ትነዳለህ፡፡
  • የልማቱ ውጤት ነው ክቡር ሚኒስትር፡፡
  • ይህንን ማመንህ ጥሩ ነው፡፡
  • በሚገባ ክቡር ሚኒስትር፡፡
  • አሁን አቅጣጫ እሰጥሃለሁ፡፡
  • ወዴት እንድሄድ ክቡር ሚኒስትር?
  • የትም አትሄድም፡፡
  • ካልሄድኩ የምን አቅጣጫ ነው ታዲያ?
  • አቅጣጫ ሲባል ኮምፓስ ነው እንዴት የሚታይህ?
  • የአቅጣጫ መጠቆሚያ እሱ አይደል እንዴ?
  • የእኔ አቅጣጫ ግን. . .
  • ምንድነው ክቡር ሚኒስትር?
  • ትዕዛዝ ነው፡፡
  • ምን የሚባል ክቡር ሚኒስትር?
  • በፍጥነት ታስገባለህ፡፡
  • ምኑን ክቡር ሚኒስትር?
  • ድርሻዬን ነዋ፡፡
  • ታዲያ ዙሪያ ጥምጥም ለምን ሄዱ ክቡር ሚኒስትር?
  • ይልቁንስ ቶሎ አሳልጠው፡፡
  • ማሳለጥ ምንድነው ክቡር ሚኒስትር?
  • ወደ አካውንቴ ክተተው!