ክቡር ሚንስተር

 

[ክቡር ሚኒስትሩ ከአንድ የውጭ ዲፕሎማት ጋር ቢሮአቸው ውስጥ እየተወያዩ ነው]

  • ዛሬ ምን እግር ጣለህ እባክህ?
  • ክቡር ሚኒስትር ችግር ነው ያመጣኝ፡፡
  • የምን ችግር?
  • አገሩን እኮ ዘጋጋችሁት ክቡር ሚኒስትር፡፡
  • ብትፈልግ በቦሌ፣ ብትፈልግ በሞያሌ አገሩ ክፍት አይደል እንዴ?
  • ክቡር ሚኒስትር ምን እያሉ ነው?
  • አገሪቱ አልተዘጋጋችም እያልኩህ ነው፡፡
  • አገሪቱ ከዓለም ጋር ተቆራርጣ እኮ ፍዳችንን አየን፡፡
  • እንዴት ነው የምትቆራረጠው?
  • ኢንተርኔት ዘግታችሁ እኮ ሥራ ፈታን ክቡር ሚኒስትር፡፡
  • እሱን ነው እንዴ የምትለው?
  • ይኼ እኮ ለእኛ ከባድ ነው ክቡር ሚኒስትር፡፡
  • ምኑ ነው የሚከብደው እባክህ?
  • አንድ ሳምንት ሙሉ ኢንተርኔት ሲቋረጥ ምን ማለት ነው?
  • 250 ሚሊዮን ብር የወጣበት ፈተና ይቅለጥ እንዴ?
  • ኧረ ክቡር ሚኒስትር አይቀልዱ?
  • እኔ ቀልድ አላውቅም፡፡
  • ቀልድ ባያውቁማ የአፍሪካ መዲና የሆነች አገር ስትዘጋጋ ዝም አይሉም ነበር፡፡
  • የአፍሪካ መዲና መሆኗንማ ዓለም ያውቀዋል፡፡
  • የአፍሪካ መግቢያ በር ትሆናለች ስንል ጓሮ ልታደርጓት እኮ ነው፡፡
  • እስኪ አንተ በግልህ ምን ተጎዳህ?
  • በዚህ ዲጂታል ዘመን ሥራችን ቆመ እኮ ነው የምለው ክቡር ሚኒስትር፡፡
  • ይኼን ያህል?
  • እኛ እኮ መረጃዎቻችንን በኢሜይልና በትዊተር ነው የምንለዋወጠው፡፡
  • ምን?
  • ከአገራችን ጋር በተለያዩ ጉዳዮች የምንገናኘው በፖስታ ቤት እንዳልሆነም ያውቃሉ ክቡር ሚኒስትር፡፡
  • ሌላስ እባክህ ክቡር ዲፕሎማት?
  • የአገራችን ኢንቨስተሮችም በጣም ግራ ተጋብተዋል፡፡
  • የእነሱም ሥራ በኢንተርኔት ነው በለኛ የእኛ ኮሚክ፡፡
  • ክቡር ሚኒስትር እኛ ከሔክታርና ከካሬ ሜትር ወጥተን ቋንቋችን ሳይቀር ተለውጧል እኮ?
  • ምን ማለት ይሆን ይኼ ደግሞ?
  • ሜጋ ባይትና ጊጋ ባይት ይባላል ክቡር ሚኒስትር፡፡
  • ኋላቀሮች ናችሁ እያልከን ነው?
  • አልወጣኝም ክቡር ሚኒስትር፡፡
  • ምን እያልክ ነው ታዲያ?
  • ዘመኑ የኢንፎርሜሽን ነው፣ መተላለፊያው ደግሞ ኢንተርኔት ነው ማለቴ ነው፡፡
  • እኔ እሱ አልጠፋኝም፡፡
  • ታዲያ ለምን ይሞግቱኛል ክቡር ሚኒስትር?
  • አንድ ሳምንት ተቋረጠ ብለህ አቧራ ለምን ታስነሳለህ?
  • አንድ ደቂቃስ ቢሆን እንዴት ይቋረጣል ክቡር ሚኒስትር?
  • ብሔራዊ ፈተናዎቻችንን ከሌቦች እንዴት እንጠብቅ ታዲያ?
  • በመንግሥትና በሕዝብ መካከል መተማመን መፍጠር ነዋ፡፡
  • እንዴት ነው የሚፈጠረው?
  • ክቡር ሚኒስትር እኔ ዝርዝር ውስጥ መግባት አልፈልግም፡፡
  • በጥቅሉ ንገረኛ?
  • ጥቅሉማ ጠንካራ ሲስተም መገንባት ነው ክቡር ሚኒስትር፡፡
  • ምን ዓይነት ሲስተም እባክህ?
  • ግልጽነትና ተጠያቂነት የሰፈነበት ሲስተም!

[ክቡር ሚኒስትሩ ዲፕሎማቱን ካሰናበቱ በኋላ ለጉዳይ ከመጣ እንግዳ ጋር እየተነጋገሩ ነው]

  • አንተን ደግሞ ምን ይሆን ያመጣህ?
  • ክቡር ሚኒስትር ሥራ መሥራት አቃተኝ፡፡
  • ምን ሆንክ ደግሞ?
  • ድርጅቴ ከ300 በላይ ዜጎችን ቀጥሮ ያሠራል ክቡር ሚኒስትር፡፡
  • በጣም ጥሩ ነው፡፡
  • አሁን ግን መሮኛል ክቡር ሚኒስትር፡፡
  • ለምን?
  • ኢንተርኔት ተቋርጦ ሥራችን ሙሉ በሙሉ ቀጥ አለ፡፡
  • አሁን ተከፍቶ የለ እንዴ?
  • ሌላ ጊዜስ ክቡር ሚኒስትር?
  • ችግሩን የጋራ ማድረግ ነዋ፡፡
  • ኢንተርኔት ድንገት ሳናውቅ እየተቋረጠ እንዴት ችግሩ የጋራ ይሁን ይባላል?
  • የዜግነት ግዴታ ነዋ፡፡
  • እሱ አልጠፋኝም ክቡር ሚኒስትር፡፡
  • ምኑ ነው የጠፋህ ታዲያ?
  • መጀመሪያ ችግሩ ምን እንደሆነ ስንጠይቅ ጂቡቲ ላይ ኬብል ተቆርጦ ነው ተባለ?
  • እሺ?
  • ከዚያ ደግሞ ብሔራዊ ፈተና እንዳይሰረቅ ነው ተባለ፡፡
  • እሺ?
  • ማን አዘዘ? ማን ቆረጠው? ሲባል እኮ በቅጡ የሚመልስ የለም ክቡር ሚኒስትር፡፡
  • ለሁሉም ጥያቄ መልስ እንዴት ይኖራል?
  • ኢንተርኔት ከመቋረጡ በፊት ተዘጋጁ ማለት ማንን ገደለ?
  • አንተ ደግሞ ታበዛዋለህ፡፡
  • ጭራሽ እኔን ይወቅሱኛል ክቡር ሚኒስትር?
  • አይዞህ ታገስ፡፡
  • በየቀኑ እኮ ብዙ ሺሕ ብሮች እየከሰርኩ ነው ክቡር ሚኒስትር፡፡
  • ለአገርህ የምትከፍለው መስዋዕትነት ነው፡፡
  • በደመነፍስ ሲሆን እኮ ለአገር ትልቅ ኪሳራ ነው ክቡር ሚኒስትር፡፡
  • እሱ አልጠፋኝም እባክህ፡፡
  • ታዲያ ለምን ያስጮሁኛል ክቡር ሚኒስትር?
  • የአንድን ሳምንት ችግርን የዓመት አስመሰልከዋ፡፡
  • ለእኔ እኮ እያንዳንዷ ደቂቃ ገንዘብ ናት ክቡር ሚኒስትር፡፡
  • ይኼ መመፃደቅ አይመስልህም?
  • ክቡር ሚኒስትር ይልቅ ቢታሰብበት ይሻላል፡፡
  • ምኑ ነው የሚታሰብበት?
  • በአግባቡ መሥራት ሲያቅተን መዝጋት ልማድ እየሆነብን ነው ክቡር ሚኒስትር፡፡
  • እሺ?
  • ሲስተሙ መሥራት እያቃተው ሥራ ማደናቀፍ ባህሉ ሆኗል፡፡
  • እሺ የእኛ ፈላስፋ?
  • እኔ ይህንን ብያለሁ ክቡር ሚኒስትር፡፡
  • ስለምን ሲስተም ነው የምታወራው?
  • ስለሚሠራና ስለማይሠራ ክቡር ሚኒስትር፡፡
  • የእኛ ሲስተም ምን ሆነ ታዲያ?
  • ተቆራረጠ ክቡር ሚኒስትር!

[ክቡር ሚኒስትሩ አማካሪያቸውን አስጠርተውት እየተነጋገሩ ነው]

  • ኢንተርኔት አንድ ሳምንት ተዘጋ ተብሎ የምን ጫጫታ ነው?
  • ክቡር ሚኒስትር በጣም ያሳዝናል፡፡
  • ምንድነው የሚያሳዝነው?
  • የውጭ ኢንቨስተሮች እየተበሳጩ ነው ክቡር ሚኒስትር፡፡
  • ምን ሆንን አሉ?
  • ፈጽሞ መሥራት አልቻሉም ክቡር ሚኒስትር፡፡
  • ማምረትና ኢንተርኔትን ምን አገናኛቸው?
  • በዚህ ዘመን እንዲህ አይባልም ክቡር ሚኒስትር፡፡
  • ለምን?
  • ሁሉም ነገር የተገናኘው ከኢንተርኔት ጋር ነው ክቡር ሚኒስትር፡፡
  • እስቲ በምሳሌ አስረዳኝ?
  • ለምሳሌ ቻይናዎች እዚህ አገር የአራት ቢሊዮን ዶላር ኢንቨስትመንት አላቸው፡፡
  • እሺ?
  • ከ111 ሺሕ በላይ ሠራተኞች ቀጥረዋል፡፡
  • ጥሩ፡፡
  • ቻይና ካሉ ወይም ከሌሎች ኩባንያዎች ጋር በየቀኑ ብዙ ጊዜ ይገናኛሉ፡፡
  • ስልክ አለ አይደል?
  • የዳታ ልውውጥ ቢሉ፣ የዶክመንቶች ቅብብል ቢሉ በኢንተርኔት እኮ ነው የሚቀላጠፈው፡፡
  • ሌላስ?
  • ቱርኮች፣ ህንዶች፣ ጣሊያኖች፣ አሜሪካኖች … እዚህ ብዙ ሥራ አላቸው፡፡
  • አየህ ጥሩ ደረጃ ላይ እንዳለን?
  • የውጭ ቀጥታ ኢንቨስትመንት የሚመጣው እኮ ምቹ ሁኔታ ሲኖር ነው ክቡር ሚኒስትር፡፡
  • አሁን ምን ጎደለ ታዲያ?
  • የቢሮክራሲው አልበቃ ብሎ አንድ ሳምንት ኢንተርኔት ሲቋረጥ ያሳስባል ክቡር ሚኒስትር፡፡
  • አንድ ሳምንት እኮ ትንሽ ነው ምን ነካህ?
  • ለኢንቨስተር ደቂቃ ማለት እኮ ወርቅ ነው፡፡
  • አታጋን እባክህ፡፡
  • በዚያ ላይ ደግሞ …
  • ደግሞ ምን?
  • ብዙ ዜጎቻችን እንጀራቸው የተያያዘው ከኢንተርኔት ጋር ነው፡፡
  • ለምሳሌ?
  • ሆቴሎች፣ አስጎብኚዎች፣ ባንኮች፣ ላኪዎች፣ አስመጪዎች፣ … ብዙ ማለት ይቻላል፡፡
  • እነሱ ደግሞ ምን ሆኑ?
  • እነሱም ሥራ ፈተው ከረሙ ክቡር ሚኒስትር፡፡
  • አንተ በምን አወቅክ?
  • ከብዙ ሰዎች ጋር ተወያይቻለሁ ክቡር ሚኒስትር፡፡
  • አቶ አማካሪ ምን ይደረግ ታዲያ?
  • አሁን ኢንተርኔቱ እየተለቀቀ ቢሆንም…
  • ቢሆንም ምን?
  • አንድ ነገር ያስፈልገናል ክቡር ሚኒስትር፡፡
  • ምንድነው እሱ?
  • ፈተና ይሰረቃል ብሎ ድርግም ከማድረግ…
  • ምን ይደረግ?
  • ውስጥን መፈተሽና ሥርዓት ማስያዝ ክቡር ሚኒስትር፡፡
  • የፈተና ሌባ እያለ እንዴት ዝም ይባላል?
  • ክቡር ሚኒስትር አንድ ተረት አስታወሱኝ፡፡
  • ምን ይሆን እሱ?
  • አይጥ በበላ ዳዋ ተመታ!

[ክቡር ሚኒስትሩ ምሽት ላይ ቤት ሲደርሱ ብቸኛ ልጃቸው አኩርፎ ጠበቃቸው]

  • አንተ ደግሞ ምን ሆነሃል?
  • ዳዲ ጉድ ሆንኩኝ፡፡
  • የምን ጉድ?
  • የሚቀጥለው ዓመት የምገባበት ዩኒቨርሲቲ ነዋ…
  • ዩኒቨርሲቲው ምን ሆነ?
  • ዩኒቨርሲቲው ዘጋኝ፡፡
  • ልሳኑ ይዘጋና ለምንድነው የሚዘጋህ፡፡
  • ዳዲ ዴድላይኑ አልፎ ነዋ፡፡
  • የምን ዴድላይን ነው የምትለው?
  • ዳዲ ዶክመንቶቼን የምልክበት ነዋ፡፡
  • በጊዜ አትልክም ነበር አንተ ሰነፍ፡፡
  • ጉድ ያደረገኝ መንግሥት ነው፡፡
  • ምን አልክ አንተ?
  • መንግሥት ጉድ አደረገኝ አልኩህ ዳዲ፡፡
  • አንተንና መንግሥት ምን አገናኛችሁ?
  • አሁንማ ተቆራረጥን፡፡
  • በምን ምክንያት?
  • ዕድሌን አበላሸው፡፡
  • መንግሥት ያንተን ዕድል እንዴት ያበላሻል እባክህ?
  • ዘግቶት ነዋ ያበላሸው ዳዲ፡፡
  • ምኑን ነው የዘጋው?
  • ኢንተርኔቱን!