Skip to main content
x
ክቡር ሚኒስትሩ ቢሯቸው አርፍደው ከሰዓት በኋላ ሲገቡ አማካሪያቸውን አስጠሩት

ክቡር ሚኒስትሩ ቢሯቸው አርፍደው ከሰዓት በኋላ ሲገቡ አማካሪያቸውን አስጠሩት

[ክቡር ሚኒስትሩ ቢሯቸው አርፍደው ከሰዓት በኋላ ሲገቡ አማካሪያቸውን አስጠሩት]

  • ሰላም ክቡር ሚኒስትር፡፡
  • እንዴት አደርክ?
  • እንዴት አደርክ?
  • ምነው?
  • ሰዓቱን ዓይተውታል ክቡር ሚኒስትር?
  • ምን ከሰዓት በኋላ ነው ብለህ ነው?
  • እህሳ ክቡር ሚኒስትር?
  • ለማንኛውም የጠዋቱ ስብሰባ እንዴት ነበር?
  • ስብሰባው በጥሩ ሁኔታ ሄዷል፡፡
  • ሪፖርቱ የት አለ?
  • እየተዘጋጀ ነው ክቡር ሚኒስትር፡፡
  • እንደጨረስከው አምጣልኝ፡፡
  • ምን ገጥሞዎት ነው ግን ያረፈዱት ክቡር ሚኒስትር?
  • ትናንት ማታ ግብዣ ነበረብኝ፡፡
  • የልጅዎ ምረቃ ነበር እንዴ?
  • የፈረንጆቹ ምረቃ እኮ እንደ እኛ በክረምት አይደለም፡፡
  • ታዲያ ሎተሪ ወጣልዎት?
  • አንተ እኔ ከመቼ ጀምሮ ነው ሎተሪ የምቆርጠው?
  • ለነገሩ በኮሚሽን የሚያገኙት ራሱ ሎተሪ በሉት፡፡
  • ምን አልክ አንተ?
  • ሰምተዋል፡፡
  • ኧረ ጆሮህን ይድነፈው፡፡
  • ለነገሩ የሁልጊዜ ፀሎትዎ ይኼ ነው አይደል?
  • ማለት?
  • የሚሠሩትን ነገር ሰው እንዳይሰማውና እንዳያየው ነዋ፡፡
  • እስቲ መቀባጠርህን አቁም፡፡
  • ለመሆኑ ምን ገጥሞዎት ነው?
  • የምረዳቸው ልጆች ሊጉን ሊቀላቀሉ ነው፡፡
  • የፓርቲው የወጣቶች ሊግን ነው የሚቀላቀሉት?
  • ምን ይቀባጥራል ይኼ?
  • ምነው?
  • ፕሪሚየር ሊጉን ነው እንጂ የምልህ?
  • ስለ እግር ኳስ ነው እንዴ የሚያወሩት?
  • እህሳ?
  • ለማንኛውም እንኳን ደስ አለዎት፡፡
  • ይኼ ግን በእንኳን ደስ አለዎት ብቻ የሚታለፍ አይደለም፡፡
  • ክቡር ሚኒስትር የሚወራውን ወሬ ግን ሰምተዋል?
  • የምን ወሬ?
  • አንዳንድ ቡድኖች ሊጉን አይመጥኑም እየተባለ ነው፡፡
  • ሳይመጥኑ እንዴት ሊጉን መቀላቀል ቻሉ?
  • ያው በገንዘብ ኃይል ነዋ፡፡
  • የገንዘብ ኃይል ስትል?
  • ፈረንጆቹ ማች ፊክሲንግ የሚሉት ነገር አለ፡፡
  • ምንድነው እሱ?
  • በቃ ቡድኖች ከፍተኛ ገንዘብ ይከፈላቸውና ከአቅም በታች እንዲጫወቱ ይደረጋል፡፡
  • ምን የሚሉት ነገር ነው?
  • ይኼ እኮ በዓለም አቀፍ ደረጃ የታወቀና እንዲያውም በርካታ የጣሊያን ቡድኖች የተዋረዱበት ቅሌት ነው፡፡
  • ስለጣሊያን ታዲያ እኛ ምን አገባን? ጣሊያን እንዲያውም ፋሽስት ነው፡፡
  • ኧረ እንደዚህ አይባልም ክቡር ሚኒስትር?
  • ይኼ እንዲያውም የእነሱ ወሬ እንደሆነ እናውቃለን፡፡
  • እኔ እኮ የሰማሁትን ነው እየነገርኩዎት ያለሁት፡፡
  • የፀረ ሰላም ኃይሎች ወሬ ነው ስልህ?
  • እና እዚህ አገር ማች ፊክሲንግ የለም እያሉኝ ነው?
  • እና የእርስዎ ቡድን በገንዘብ ኃይል ነው ሊጉን የተቀላቀለው እያልከኝ ነው?
  • እንደሰማሁትማ እርስዎም ገንዘብ አዋጥተዋል አሉ፡፡
  • እኔማ ያዋጣሁት 100 ሺሕ ብር ለትጥቅ የሚውል ነው፡፡
  • ትጥቅ ሲሉኝ ቡድኑ የጦር መሣሪያ አለው እንዴ?
  • ምን ይላል ይኼ? ማሊያ፣ ጫማ ምናምን ማለቴ ነው፡፡
  • በነገራችን ላይ ክቡር ሚኒስትር ሌላም ወሬ ሰምቻለሁ፡፡
  • የምን ወሬ?
  • አሁን አሁን ኳሱ ከመዝናኛነት ባለፈ የብሔር ፖለቲካ እየነገሠበት መጥቷል እየተባለ ነው፡፡
  • እንዴት?
  • ማለቴ እግር ኳሳችን የፖለቲካ መድረክ እየሆነ ነው፡፡
  • ታዲያ ምን ችግር አለው?
  • ለነገሩ ሕዝቡ የፖለቲካ ምኅዳሩ ስለጠበበበት የእግር ኳስ ሜዳውን የፖለቲካ መድረክ ቢያደርገው አይገርምም፡፡
  • ለማንኛውም ቡድናችን ግስጋሴውን ገና ይቀጥላል፡፡
  • ወዴት?
  • ወደ ሻምፒዮንስ ሊግ፡፡
  • የትኛውን?
  • የአውሮፓውን!

[ክቡር ሚኒስትሩ አንድ ስብሰባ ተካፍለው ከተሰብሳቢዎቹ ጋር በሻይ ሰዓት እያወሩ ነው]

  • ክቡር ሚኒስትር የእርስዎ በዚህ ስብሰባ ላይ መገኘት በጣም ያስደስታል፡፡
  • ስብሰባውን የተሳተፍኩት እኮ ፓርቲያችን የደረሰበትን ደረጃ ለእናንተ ለማካፈል ነው፡፡
  • ማለት ክቡር ሚኒስትር?
  • ይኸው ፓርቲያችን እኮ ለአፍሪካ የፖለቲካ ፓርቲዎች ምክር ቤት የሚዲያ ፎረም ፕሬዚዳንት ሆኖ ተመርጧል፡፡
  • ሰማን እኮ ክቡር ሚኒስትር፡፡
  • ይኼ ደግሞ የሚያሳየው የምንከተለው ሲስተም ትክክል መሆኑን ያመለክታል፡፡
  • የምን ሲስተም ነው ክቡር ሚኒስትር?
  • የልማታዊ መንግሥት ነዋ፡፡
  • እሱማ ልክ ነው፡፡
  • አያችሁ አብዮታዊ ዴሞክራሲን ከልማታዊ መንግሥት ጋር አዋህደን ትልቅ ግንብ ነው የምንገነባው፡፡
  • የምን ግንብ ነው?
  • የባቢሎን ግንብ የሚያስንቅ ነዋ፡፡
  • እኮ ምን የሚያደርግ?
  • ኒዮሊበራሊዝምን የሚመክት ነዋ፡፡
  • የኢሕአዴግ የሚዲያ ስትራቴጂ ግን እኮ ፕሮአክቲቭ አይደለም ይባላል?
  • ፕሮአክቲቭ ስትል?
  • ያው ከሚዲያው ጋር በየጊዜው እየተገናኘ መረጃ አይሰጥማ፡፡
  • አየህ የተሳሳትከው እዚህ ላይ ነው፡፡
  • እንዴት ክቡር ሚኒስትር?
  • እኛ የምንከተለው ስትራቴጂ ሌላ ነው፡፡
  • ምን ዓይነት ነው?
  • እንዲያውም ለስትራቴጂያችን ጥሩ የእንግሊዝኛ ሐረግ አለን፡፡
  • ምን የምትል?
  • ‹‹Silence is the best answer›› የምትል፡፡
  • እ. . .
  • ስትራቴጂያችን ፀጥ ማስባል ነው፡፡
  • ማለት?
  • ሚዲያውንም ሆነ ማንኛውንም አካል ፀጥ ማስባል ነው፡፡
  • በምንድነው ፀጥ የምታስብሉት?
  • ከቻልክ እንደ ፀረ ሽብር ሕጉ ዓይነት አውጥተህ ፀጥ ታሰኛለህ፡፡
  • እሺ፡፡
  • ካልቻልክ ደግሞ በአስቸኳይ ጊዜ አዋጅ ዝም ታሰኛለህ፡፡
  • ወይ ጉድ፡፡
  • ስለዚህ ጋዜጠኞችን እያስፈራራህና እያሸማቀክ ከአገር እንዲሰደዱ በማድረግ አፍ ማዘጋት ነው፡፡
  • ወይ ግሩም፡፡
  • ከዚያ አገሪቷን በቁጥጥር ሥር ታውላለህ፡፡
  • ይገርማል፡፡
  • ከዚያ የሚወራው ሁሉ ስለልማትና ልማት ብቻ ይሆናል፡፡
  • እና ይኼን ልምድ ነው ለሌሎቹ የምንታካፍሉት?
  • በሚገባ፡፡
  • ለመሆኑ ይኼን ልምድ ከሰሜን ኮሪያ ነው የቀሰማችሁት?
  • የራሳችን ነው እንጂ፡፡ እንዲያውም ከእኛ ሌሎች ኮፒ እያደረጉትም ነው፡፡
  • እነማን?
  • እነ አሜሪካ፡፡
  • ምን?
  • ይኸው ትራምፕ ሚዲያን አላገኝም እያለ አይደለም እንዴ?
  • በጣም ይገርማል፡፡
  • እኛ የሥልጣኔ ምንጭ መሆናችንን አትርሳ፡፡

[ክቡር ሚኒስትሩ ይኼን እያወሩ ሳለ አንድ ባለሥልጣን ወደ መሰብሰቢያ አዳራሹ ሲገቡ ከበዋቸው የነበሩት ተሰብሳቢዎች ትተዋቸው ሄዱ]

  • እንዴ እናንተ?
  • ምነው?
  • ወዴት ነው የምትሄዱት?
  • ሰማንዎት እኮ?
  • አልጨረስኩም እኮ?
  • ለሁሉም ጊዜ አለው፡፡
  • ማለት?
  • እርስዎ. . .
  • እ. . .
  • አልፎብዎታል!

[የክቡር ሚኒስትሩ አማካሪ ቢሯቸውን በርግዶ ገባ]

  • አንተ ሥርዓት የለህም?
  • ክቡር ሚኒስትር በጣም ችግር ውስጥ ገብተናል፡፡
  • የምን ችግር ነው የምታወራው?
  • አገሪቷ ችግር ውስጥ ናት፡፡
  • አንተ ሁሌ ከችግር ውጪ አታወራም እንዴ?
  • ምን ላድርግ ክቡር ሚኒስትር?
  • አንተ ግን ዓይንህ አያይም?
  • ኧረ ያያል ክቡር ሚኒስትር፡፡
  • አገሪቷ እኮ እያደገች መሆኗን አይኤምኤፍና የዓለም ባንክ መስክረዋል፡፡
  • እሱንማ አውቃለሁ፡፡
  • ይኸው ባቡር በየሠፈሩ ልናስገባ ነው፡፡
  • ምን አሉኝ?
  • ኢንዱስትሪ ፓርክ በየሠፈሩ እንደ አበባ እየበቀለ ነው፡፡
  • ስለጃፓን ነው እንዴ የሚያወሩኝ?
  • ስለአገራችን ነው እንጂ፡፡
  • ኧረ ተው ክቡር ሚኒስትር፡፡
  • ምኑን ነው የምተወው? ከዚህ በላይ አገሪቷን ወርቅ እንድንቀባት ነው እንዴ የምትፈልጉት?
  • ኧረ እኔ እንደ እሱ አልወጣኝም፡፡
  • ወይስ ኢንዱስትሪ ፓርክ በየቤቱ ይገንባ?
  • ፅድቁ ቀርቶብኝ በቅጡ በኮነነኝ አሉ፡፡
  • ምን እያልክ ነው?
  • ለማንኛውም እኔ እንደ እሱ አይደለም ያልኩት፡፡ ለምን አያዳምጡም?
  • አንተ ከእሮሮ ውጪ ስለማታወራ አላዳምጥም፡፡
  • ለነገሩ የችግሮቹ ሁሉ ምንጭ እኮ ይኼ ነው፡፡
  • ምኑ?
  • አለማዳመጥ፡፡
  • ማንን?
  • ሕዝቡን ነዋ፡፡
  • ምንድነው የምታወራው?
  • ሕዝቡ ያለበት በሽታ ሌላ፣ እናንተ የምትሰጡት መድኃኒት ሌላ፡፡
  • አልገባኝም?
  • ለካንሰር በሽታ የሳንባ መድኃኒት አይሰጥም፡፡
  • እሺ የእኔ ሐኪም? ለመሆኑ የባህል ሐኪም ነህ ወይስ. . .
  • ቀልዱን ይተውት ክቡር ሚኒስትር?
  • መቼ ነው ሕዝቡ ካንሰር፣ ሳንባ ምናምን የያዘው?
  • ክቡር ሚኒስትሩ አገሪቷ ታማለች፣ በአስቸኳይ መድኃኒት ያሻታል፡፡
  • ምንድን ነው ያመማት?
  • ሕመሟንማ በተደጋጋሚ ሕዝብ ቢናገርም ማዳመጥ አልቻላችሁም፡፡
  • ምንድነው የምትዘባርቀው?
  • ይኸው አገሪቷ ውስጥ ተቃውሞ እንደ አዲስ ተቀስቅሷል፡፡
  • የምን ተቃውሞ ነው?
  • በኦሮሚያ በተለያዩ አካባቢዎች ተቃውሞ ተቀስቅሷል፡፡
  • መፍትሔ ሰጥተነው አልነበር እንዴ?
  • ይኼን እኮ ነው የምልዎት፡፡
  • ማለት?
  • ሕዝቡ የሚፈልገው ሌላ እናንተ የምትሰጡት ሌላ፡፡
  • አልገባኝም?
  • ይኸው በግብር ምክንያት በኦሮሚያ በተለያዩ ቦታዎች ተቃውሞ ተጀምሯል፡፡
  • ግብር አልከፍልም እያሉ ነው?
  • የቀን ገቢ ግምቱ ተቆለለ እያሉ ነው፡፡
  • አየህ አንተ የነጋዴን ባህሪ አታውቀውም፡፡
  • እንዴት ማለት?
  • ቀጣፊዎች ናቸው፡፡
  • ሁሉም እንደዚያ እንዴት ሊሆኑ ይችላሉ?
  • እኔ ባህሪያቸውን ጠንቅቄ አውቀዋለሁ፡፡
  • እንዴ እርስዎም እንደዚያ ነዎት ማለት ነው?
  • ምን
  • አጭበርባሪ!