Skip to main content
x
ክቡር ሚኒስትሩ አንድ የባንክ ኃላፊ ጋ ደወሉ

ክቡር ሚኒስትሩ አንድ የባንክ ኃላፊ ጋ ደወሉ

  • ሰላም ክቡር ሚኒስትር፡፡
  • እንዴት ነህ ወዳጄ?
  • አለሁ ክቡር ሚኒስትር፡፡
  • አንተ በቃ እኔ ካልደወልኩ አትደውልም?
  • ምን ክቡር ሚኒስትር ያው ጊዜው ሒሳብ የምንዘጋበት ወቅት እኮ ነው?
  • እሱማ የጠፋኸው ለምን እንደሆነ ይገባኛል?
  • በጣም ቢዚ ነበርን፡፡
  • ያው ካገኘኸው ቦነስ ጋብዘኝ እንዳልልህ ነው አይደል?
  • ኧረ ሰሞኑን እንዲያውም አመም አድርጎኝ ነበር፡፡
  • ውይ ምነው?
  • ለሕክምና ወደ ውጭ ሄጄ ነበር፡፡
  • ያው ዳጐስ ያለ አበል ይዘህ ነዋ የሄድከው?
  • ኪኪኪ…
  • እንደ እርስዎ መስሎዎት ነው አይደል?
  • ማለት? አበል አልተሰጠኝም ለማለት ነው?
  • ኧረ እኔ ራሴ ባጠራቀምኳት ገንዘብ ነው የምታከመው፡፡
  • እሱን እንኳን ተወው፡፡፡
  • እንዴት ክቡር ሚኒስትር?
  • የውጭ ምንዛሪው በእጅህ አይደል እንዴ ያለው?
  • ቢኖርስ ክቡር ሚኒስትር?
  • ያው የቻልከውን ያህል ዘገን አድርገህ ነው የምትሄደው ብዬ ነዋ፡፡
  • ክቡር ሚኒስትር ባንኩ እኮ የግሌ ሳይሆን የሕዝብ ነው፡፡
  • ታዲያ መቼም ውጭ አገር በኢትዮጵያ ብር አትገበያይ?
  • ክቡር ሚኒስትር እኔ ግን በራሴ ገንዘብ ነው የምታከመው፡፡
  • እኔ እኮ ጉንፋን ሲያመኝ ለአበሏ ስል ዘልዬ ባንኮክ ነው የምሄደው፡፡
  • ክቡር ሚኒስትር እኛ ጋ ግን እንደዚያ የለም፡፡
  • ለማንኛውም ዛሬ ለቁም ነገር ፈልጌህ ነው፡፡
  • ምን ልታዘዝ ክቡር ሚኒስትር?
  • አዲሱ የበጀት ዓመት ጀመራችሁ አይደል እንዴ?
  • ልክ ነው ክቡር ሚኒስትር፡፡
  • አዲሱን ዓመትም እየተቃረበ ነው፡፡
  • እሱማ ትንሽ ይቀረዋል፡፡
  • አይ ያው ዝግጅቱን ከዚሁ ነው የምትጀምሩት ብዬ ነው፡፡
  • የምን ዝግጅት ክቡር ሚኒስትር?
  • ይኼ የካላንደርና የአጀንዳ ኅትመቱን ነዋ፡፡
  • እሱንማ ጨረታ አውጥተናል፡፡
  • ጨረታ ምን ያደርጋል?
  • እንዴት ማለት ክቡር ሚኒስትር?
  • እኛው ነና ጉዳዩን መጨረስ ያለብን፡፡
  • እንዴት ክቡር ሚኒስትር?
  • ባለፈው ነግሬህ ነበር እኮ?
  • ምኑን ክቡር ሚኒስትር?
  • አዲስ ያቋቋምኩት ማተሚያ ቤት አለ ብዬ ነዋ፡፡
  • ተወዳደሩ እንጂ ክቡር ሚኒስትር?
  • እኔ እኮ በውድድር አላምንም፡፡
  • ታዲያ በምንድነው የሚያምኑት?
  • ልማታዊ አስተሳሰብ አለው ወይ በሚለው ነዋ፡፡
  • ይቅርታ ያድርጉልኝና ክቡር ሚኒስትር፣ እኛ ደግሞ በውድድር ነው የምናምነው፡፡
  • አንተ አይገባህም እንዴ?
  • ጨረታውን ካልተወዳደሩ ምንም ልረዳዎት አልችልም፡፡
  • እኔ እኮ ሁላችንም የምንጠቀምበትን መንገድ አስቤ ነው፡፡
  • ክቡር ሚኒስትር አጣብቂኝ ውስጥ እየከተቱኝ ነው፡፡
  • የምን አጣብቂኝ ነው?
  • ያው ባንኩ እኮ በቦርድ ነው የሚመራው፡፡
  • ለሥራው አዲስ ነህ እንዴ? ከሌሎቹስ ጋር እንደዚህ አይደል እንዴ የምሠራው?
  • እኔ የሌሎቹን አላውቅም፡፡
  • አንተ ሐሳብ የሆነብህ ነገር ምንድነው?
  • ሥራዬን እንዳያሳጡኝ ነዋ፡፡
  • ስለእሱ አታስብ፡፡
  • የልጆች አባት እንደሆንኩ ያውቃሉ?
  • ከተባረርክም እኔ አስቀጥርሃለሁ፡፡
  • የት?
  • የእኛው ባንክ!

[ክቡር ሚኒስትሩ አንድ የመንግሥት የልማት ድርጀት ኃላፊ ጋ ይደውላሉ]

  • ሰላም ወዳጄ፡፡
  • እንዴት ነው ክቡር ሚኒስትር?
  • ዛሬ እንዴት ደወሉልኝ እባክዎ?
  • ለብርቱ ጉዳይ ፈልጌህ ነው፡፡
  • ምነው ያቺን ሪፖርት ፈልገው ነው?
  • የምን ሪፖርት ነው?
  • ባለፈው ቦርድ ስብሰባ ላይ የቀረበውን ነዋ፡፡
  • ስማ እኔና አንተ ከቦርድ ባለፈ ወዳጅነታችንን ማጠንከር አለብን፡፡
  • ካሉማ ደስ ይለኛል፡፡
  • አንተን ሳይህ ንቁ ነገር ስለሆንክ አንድ ፕሮጀክት አስቤልህ ነበር፡፡
  • አመሰግናለሁ ክቡር ሚኒስትር፡፡
  • ያው ከፊታችን አዲስ ዓመት አለ፡፡
  • ግን ገና ነው እኮ ክቡር ሚኒስትር?
  • ቢሆንም አንድ ነገር አስቤ ነበር፡፡
  • ምንድነው ክቡር ሚኒስትር?
  • ያው ድርጅታችሁ ካላንደርና አጀንዳ ማሳተሙ አይቀርም ብዬ ነው፡፡
  • እሱማ በመላው አገሪቷና በውጭ ባሉን ኤምባሲዎቻችን ነው የምናሰራጨው፡፡
  • አየህ እዚህ ላይ ነው ጥሩ ሥራ የምንሠራው፡፡
  • ምን ክቡር ሚኒስትር?
  • ሥራውን ለእኔ ትሰጠኛለህ?
  • የምን ሥራ ክቡር ሚኒስትር?
  • የካላንደሩንና የአጀንዳውን ሥራ ነዋ፡፡
  • እንዴ ክቡር ሚኒስትር አካሄዱን እያወቁት?
  • አካሄዱ ምን ችግር አለው?
  • ማለቴ ስንትና ስንት የግዢ ሒደት አለዋ፡፡
  • ምን በፊት ከነበረው ኃላፊ ጋር እንደዚህ አይደል እንዴ የምንሠራው?
  • ቢሆንም ግን ትንሽ ያሠጋል፡፡
  • እኔው አይደለሁ እንዴ የቦርድ ሰብሳቢ?
  • እሱንማ አውቃለሁ፡፡
  • ታዲያ ከሥራዬ እንዳልፈናቀል ብዬ ነዋ፡፡
  • ብትፈናቀልስ?
  • የልጆች አባት መሆኔን ረሱት እንዴ?
  • ከዚህ የምታገኘው ኮሚሽን እኮ አንቀባሮ ነው የሚያኖርህ፡፡
  • ስለዚህ ክቡር ሚኒስትር?
  • ያዋጣሃል፡፡
  • ምኑ?
  • ሙስናው!

[ለክቡር ሚኒስትሩ አንድ ኢንቨስተር ይደውልላቸዋል]

  • ሄሎ ክቡር ሚኒስትር፡፡
  • ዛሬ ከየት ተገኘህ እባክህ?
  • እኔ እኮ ዘመድ ጠያቂ ነኝ ክቡር ሚኒስትር፡፡
  • እሱ እንኳን ጉዳይ ሲኖርህ ነው የምትደውለው፡፡
  • በእውነት ዛሬ ሰላም ልልዎት ነው የደወልኩት፡፡
  • ቁም ነገረኛ ወጥቶሃል ማለት ነው?
  • በዚህ እንኳን አልታማም ክቡር ሚኒስትር፡፡
  • ሥራ እንዴት ነው ታዲያ?
  • ያውቁት የለ የእኛን ሥራ፣ አንዱ ሲደክም ሌላው ይነሳል፡፡
  • ጥሩ ነው ይልቁንስ እንኳን ደወልክ፡፡
  • ምነው ክቡር ሚኒስትር?
  • እናንተ ካላንደርና አጀንዳ ታሳትማላችሁ አይደል?
  • ኧረ ለእኛ ሥራ እኮ እንደዚህ ዓይነቱ ነገር ብዙም አይጠቅምም፡፡
  • አየህ ቢዝነስህ የሚደክመው እኮ ለዚህ ነው፡፡
  • እንዴት?
  • ፕሮሞሽን ላይ እየሠራህ አይደለም?
  • ያው የእኛ ሥራ እኮ ኤክስፖርት ማድረግና እዚህ አገር የምናስገባቸውን ዕቃዎች መጋዘን ተከራይቶ መሸጥ ነው፡፡
  • ቢሆንም አየህ የምትሠራውን ሥራ ለመንግሥትም ሆነ ለሌሎች አካላት ማስተዋወቅ አለብህ፡፡
  • ታዲያ ምን እየመከሩኝ ነው ክቡር ሚኒስትር?
  • ካላንደርና አጀንዳ ማሳተም ግዴታ ነው፡፡
  • ችግሩ ደግሞ የማውቀው ማተሚያ ቤትም የለም፡፡
  • ስለእሱ አታስብ፡፡
  • እንዴት?
  • እኔ ያስመጣሁዋቸው የማተሚያ ማሽኖች አሉ፡፡
  • እንደዚያ ከሆነማ ለእኔ ሥራ አቀለሉልኝ፡፡
  • ስለዚህ ሥራውን ትሰጠኛለህ?
  • አዎ ግን ከእርስዎም የምፈልገው ነገር አለ፡፡
  • ምን?
  • 10 ሺሕ ሔክታር መሬት!

[የክቡር ሚኒስትሩ ሚስት ስልክ ደወሉላቸው]

  • እሺ የእኛ አዋቂዎች፡፡
  • ምን እያልሽ ነው?
  • ምን እያደረጋችሁ እንደሆነ ታውቃላችሁ?
  • ያው አገሪቷን በልማት ጎዳና እያስጓዝናት ነው፡፡
  • እኔ አንድ ጥያቄ ልጠይቅህ?
  • ጠይቂኝ፡፡
  • ከልጅ ልጅ ቢለዩ፣ ዓመትም አይቆዩም ሲባል አልሰማህም?
  • ሰምቻለሁ፡፡
  • እኛ ታዲያ የእንጀራ ልጆች ነን?
  • ማን ናችሁ እናንተ?
  • እኛ ‹‹ሀ››ዎች፡፡
  • ‹‹ሀ››ዎች ስትይ?
  • እኛ ደረጃ ‹‹ሀ›› ግብር ከፋዮች፡፡
  • ራስሽን ከጉሊትና ከጀበና ቡና ሻጭ እኩል ማየት ጀመርሽ?
  • አየህ ግብር እኮ ለሁሉም ፍትሐዊ መሆን አለበት፡፡
  • እሱማ ፍትሐዊ ነው፡፡
  • ታዲያ ለምንድነው አንድ አገር ውስጥ ሁለት ዓይነት አሠራር የሚኖረው?
  • አንቺ ሴትዮ ጤነኛ ነሽ?
  • በጣም ጤነኛ ነኝ፡፡
  • ምን እያልሽ ነው ታዲያ?
  • በጣም ብዙ ሰዎችን እያስከፋችሁ ነው፡፡
  • ማለት?
  • የከተማው ሚሊየነር፣ ቢሊየነር እንዲሁም የከተማው ከፍተኛ ኢንቨስተር ተከፍቷል፡፡
  • እንዴት ነው እናንተ ከጉሊት ቸርቻሪ ጋር አንድ የምትሆኑት?
  • ምን አለበት?
  • ሴትዮ ምን ይደረግ እያልሽ ነው?
  • እኛ እንደ ጉሊት ቸርቻሪዎቹ ያመነውን እንክፈል፡፡
  • ኪኪኪ…
  • ምን ያስቅሃል?
  • ሲባል አልሰማሽም እንዴ?
  • ምን?
  • ነጋዴን ያመነ…
  • እ…
  • ጉም የዘገነ!

[ክቡር ሚኒስትሩ ለአንድ ኢንቨስተር ስልክ ደወሉ]

  • ሄሎ ወዳጄ እንዴት ነህ?
  • እንዴት ነዎት ክቡር ሚኒስትር?
  • ዛሬ ከየት ተገኙ?
  • ያው አንተ ስለማትደውል፣ እኔ ልደውል ብዬ ነው፡፡
  • ሥራ ስለሚበዛብኝ እኮ ነው፡፡
  • እስቲ ስለአንዳንድ ነገር እንወያይ ብዬ ነው፡፡
  • ስለምን ክቡር ሚኒስትር?
  • ያው እናንተ ትልልቅ ባለሀብቶች ስለሆናችሁ ካልረዳችሁን የት እንደርሳለን ብለህ ነው?
  • የቻልነውን እያደረግን ነው እንግዲህ?
  • አሁን ካሳዑዲ የሚመጡ ወገኖቻችንን እዚህ ለማቋቋም አስበናል፡፡
  • ጥሩ ነው ክቡር ሚኒስትር፡፡
  • ግን የእናንተንም ዕርዳታ እንፈልጋለን፡፡
  • እና ከሕዝብ ገንዘብ ሊሰበስቡ ነው?
  • መጀመሪያማ ከባለሀብቱ ነው እንጂ፡፡
  • እኛ ምን በወጣን?
  • ምን እያልክ ነው?
  • በቃ ሁሉም በዚህ መዋጮ በምትሉት ነገር ደስተኛ አይደለም፡፡
  • ለምን?
  • የሚወራውን አይሰሙም እንዴ ክቡር ሚኒስትር?
  • ምን ተወራ ደግሞ?
  • ባለፈው ለቆሼ ተብሎ በገንዘብና በዓይነት ከመቶ ሚሊዮን ብር በላይ ነው የተሰበሰበው፡፡
  • ጥሩ ነዋ ታዲያ?
  • ግን ተጎጂዎቹ በሚገባ እየተረዱ አለመሆኑን ሚዲያዎች እያናፈሱት ነው፡፡
  • ወሬኞች በላቸው፣ አርፈው ሥራቸውን አይሠሩም?
  • ይኼ አይደል እንዴ ሥራቸው?
  • ማቃጠር?
  • ማቃጠር ሳይሆን በተለያዩ አካላት የሚሠሩ ስህተቶችን ማጋለጥ፡፡
  • እነሱ እባክህ ያልበላቸውን ነው የሚያኩት፡፡
  • እሱ ብቻ አይደለም፡፡
  • ሌላ ምን አለ?
  • ይኸው በዚህ 40/60 እንኳን ስንቱ ሙሉ ክፍያ ከፍሎ ቤት ሲጠባበቅ ጥቂቶች ብቻ ነው ቤት ያገኙት፡፡
  • መንግሥት እንግዲህ የቻለውን እያደረገ ነው፣ ከዚህ በላይ ምን ይደረግ?
  • እኔማ ክቡር ሚኒስትር ለሳዑዲ ተመላሾች ብለው አፍዎን እንዳያበላሹ ብዬ ነው፡፡
  • ማለት?
  • የሚወራውማ መንግሥት በተለያዩ የመዋጮ ጉዳዮች ጨዋታ ጀምሯል እየተባለ ነው፡፡
  • የምን ጨዋታ?
  • እሟ ቀሊጦ!